ສະຫະລັດ ອາເມຣິກາ ຈະຖອນຕົວຈາກຂໍ້ຕົກລົງນິວເຄຼຍກັບລັດເຊຍ

(Photo by Brendan Smialowski / AFP)

ສຳນັກຂ່າວຕ່າງປະເທດລາຍງານເມື່ອວັນທີ 20 ຕຸລາ 2018 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວໃນລະຫວ່າງການຢ້ຽມຢາມເມືອງເອວໂກ ລັດເນວາດາ ເມື່ອວັນເສົາທີ່ຜ່ານມາວ່າ ສະຫະລັດ ອາເມຣິກາຈະຖອນຕົວອອກຈາກສົນທິສັນຍາອາວຸດນິວເຄຼຍໄລຍະການຍິງລະດັບກາງ (INF) ກັບລັດເຊຍ ເຊິ່ງເປັນຂໍ້ຕົກລົງສອງຝ່າຍມາຕັ້ງແຕ່ສະໄໝສົງຄາມເຢັນ ທີ່ເປັນການລົງນາມຮ່ວມກັນເມື່ອເດືອນທັນວາ 1987 ໃນສະໄໝການເປັນປະທານປະເທດສະຫະລັດ ອາເມຣິກາຂອງທ່ານ ໂຣໂນ ເຣແກນ ແລະ ສະໄໝການເປັນປະທານປະເທດສະຫະພາບໂຊວຽດຂອງທ່ານ ມິຄາອິວ ກໍບາຊັອບ ທີ່ມີເນື້ອໃນສຳຄັນຄືການຫ້າມທັງສອງປະເທດຜະລິດ ແລະ ທົດລອງຂີປະນາວຸດທີ່ມີໄລຍະການຍິງລະດັບຫວ່າງແຕ່ 500-5,500 ກິໂລແມັດ.

(Photo by Nicholas Kamm / AFP)

ເຊິ່ງທ່ານ ໂດໂນ ທຣຳ ໃຫ້ເຫດຜົນທີ່ຈະຍົກເລີກວ່າ ເປັນເພາະລັດຖະບານລັດເຊຍລະເມີດຂໍ້ຕົກລົງສະບັບດັ່ງກ່າວມາດົນນານແລ້ວ, ໃນຂະນະທີ່ສະຫະລັດ ອາເມຣິກາຢຶດໝັ້ນຕາມຂໍ້ຕົກລົງມາໂດຍຕະຫຼອດ ແລະ ຕັ້ງຂໍ້ສົງໄສວ່າເພາະເຫດໃດລັດຖະບານສະຫະລັດ ອາເມຣິກາຊຸດກ່ອນໜ້ານີ້ ນັ້ນກໍ່ຄືໃນສະໄໝການນຳຂອງທ່ານ ບາຣັກ ໂອບາມາ ຈຶ່ງບໍ່ເຈລະຈາ ຫຼື ຖອນຕົວອອກຈາກສົນທິສັນຍາສະບັບດັ່ງກ່າວ.

ຕໍ່ຈາກນັ້ນບໍ່ດົນ, ກະຊວງການຕ່າງປະເທດລັດເຊຍອອກຖະແຫຼງການກ່ຽວກັບບັນຫາດັ່ງກ່າວວ່າ ການຖອນຕົວອອກຈາກ INF ຍິ່ງສະທ້ອນໃຫ້ເຫັນໄດ້ຢ່າງຊັດເຈນເຖິງຄວາມໃຝ່ຝັນຂອງສະຫະລັດ ອາເມຣິກາ ທີ່ຕ້ອງການຈັດຕັ້ງລະບຽບໂລກໃຫ້ມີມະຫາອຳນາດຂົ້ວດຽວ, ເຖິງຢ່າງໃດກໍ່ຕາມ ເລື່ອງດັ່ງກ່າວບໍ່ມີທາງເປັນໄປໄດ້ ເພາະນອກເໜືອຈາກ INF ແລ້ວ ທັງສອງປະເທດຍັງມີສົນທິສັນຍາສັນຕິພາບສອງຝ່າຍ ວ່າດ້ວຍການຫຼຸດຈຳນວນອາວຸດນິວເຄຼຍ “New Start” ທີ່ລົງນາມຮ່ວມກັນເມື່ອປີ 2010 ລະຫວ່າງທ່ານ ບາຣັກ ໂອບາມາ ແລະ ທ່ານ ເດິມີຕຣີ ເມດເວດເດບ ຜູ້ນຳລັດເຊຍໃນຂະນະນັ້ນ ເຊິ່ງສົນທິສັນຍາມີຜົນເມື່ອເດືອນກຸມພາ 2011 ແລະ ຈະໝົດອາຍຸໃນປີ 2021.

ສຳລັບການປະກາດກຽມຖອນຕົວອອກຈາກ INF ຂອງຜູ້ນຳສະຫະລັດ ອາເມຣິກາ ເກີດຂຶ້ນໃນຂະນະທີ່ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດປະຈຳທຳນຽບຂາວ ມີກຳນົດການເດີນທາງຢ້ຽມຢາມນະຄອນຫຼວງມົດສະກູໃນອາທິດນີ້ ເພື່ອປຶກສາຫາລືກັບທ່ານ ເຊີເກ ລາວະຣົບ ລັດຖະມົນຕີກະຊວງການຕ່າງປະເທດລັດເຊຍ, ທ່ານ ນິໂຄໄລ ປາຕຣູເຊັບ ປະທານສະພາຄວາມໝັ້ນຄົງແຫ່ງຊາດລັດເຊຍ ແລະ ທ່ານ ຢູຣິ ຢູຊາຄັອບ ທີ່ປຶກສາອາວຸໂສຂອງທ່ານ ວະລາດິເມຍ ປະຕິນ ປະທານປະເທດລັດເຊຍ ກ່ຽວກັບໂອກາດໃນການຈັດປະຊຸມສອງຝ່າຍຢ່າງເປັນທາງການຮອບທີສອງ ລະຫວ່າງຜູ້ນຳສະຫະລັດ ອາເມຣິກາ ກັບ ຜູ້ນຳລັດເຊຍ ເພື່ອຕໍ່ຍອດການພົບປະຫາລືຄັ້ງທຳອິດທີ່ນະຄອນຫຼວງເຮວຊິງກິ ປະເທດແຟງລັງ ເມື່ອເດືອນກໍລະກົດ ທີ່ຜ່ານມາ.