ທ່ານ ປູຕິນ ກ່າວວ່າ ສ.ອາເມຣິກາ ຕ້ອງການສ້າງຄວາມປັ່ນປວນ ທີ່ຢາກຖອນຕົວຈາກຂໍ້ຕົກລົງນິວເຄຼຍ

(Photo by Maxim SHIPENKOV / POOL / AFP)

ສຳນັກຂ່າວຕ່າງປະເທດລາຍງານ 24 ຕຸລາ 2018 ວ່າ: ທ່ານ ວະລາດີເມຍ ປູຕິນ ປະທານປະເທດລັດເຊຍ ໄດ້ພົບປາຫາລືກັບທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງປະຈຳທຳນຽບປະທານປະເທດສະຫະລັດ ອາເມຣິກາ ທີ່ທຳນຽບເຄຣມລິນ ໃນນະຄອນຫຼວງມົດສະກູ ເມື່ອວັນອັງຄານ ທີ່ຜ່ານມາ ເຊິ່ງຜູ້ນຳລັດເຊຍກ່າວເຖິງການທີ່ສະຫະລັດ ອາເມຣິກາຕ້ອງການຖອນຕົວອອກຈາກການເປັນພາຄີຂອງສົນທິສັນຍາອາວຸດນິວເຄຼຍໄລຍະການຍິ່ງລະດັບກາງ (INF) ທີ່ໄດ້ລົງນາມຮ່ວມກັນມາຍາວນານກວ່າ 3 ທົດສະວັດ ຫຼື ຕັ້ງແຕ່ສະໄໝສົງຄາມເຢັນ ແຕ່ໃນເວລາດຽວກັນສະຫະລັດ ອາເມຣິກາມີຄວາມຕ້ອງການຕໍ່ອາຍຸສົນທິສັນຍາສັນຕິພາບ “New Start” ວ່າດ້ວຍການຫຼຸດຈຳນວນອາວຸດນິວເຄຼຍ ທີ່ມີອາຍຸ 10 ປີ ແລະ ກຳລັງຈະຄົບກຳນົດໃນປີ 2021 ວ່າທ່າທີຂອງສະຫະລັດ ອາເມຣິກາໃນຕອນນີ້ ບໍ່ມີຄວາມແນ່ນອນຊັດເຈນ ແລະ ເປັນການເຮັດໃຫ້ເກີດຄວາມປັ່ນປວນ.

(Photo by Maxim SHIPENKOV / POOL / AFP)

ຂະນະທີ່ທ່ານ ຈອນ ໂບຕັ້ນ ກ່າວເຖິງສາເຫດຂອງການທີ່ລັດຖະບານສະຫະລັດ ອາເມຣິກາ ຕ້ອງການຖອນຕົວຈາກ INF ທີ່ລົງນາມຮ່ວມກັນເມື່ອເດືອນທັນວາ 1987 ເຊິ່ງເປັນຊ່ວງໄລຍະປາຍຂອງສົງຄາມເຢັນ ໂດຍທ່ານ ມິຄາອິວ ກໍບາຊັອບ ອະດີດປະທານປະເທດສະຫະພາບໂຊວຽດ ແລະ ທ່ານ ໂຣໂນ ເຣແກນ ອະດີດປະທານປະເທດສະຫະລັດ ອາເມຣິກາ ວ່າສົນທິສັນຍາສະບັບດັ່ງກ່າວ “ບໍ່ທັນສະໄໝອີກຕໍ່ໄປ” ໂດຍເປັນຂໍ້ຕົກລົງທີ່ຄວບຄຸມພຽງສອງປະເທດ ບໍ່ສອດຄ່ອງກັບໂລກປັດຈຸບັນທີ່ມີຫຼາຍຂົ້ວອຳນາດ ແລະ ຍອມຮັບວ່າທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຈະຕ້ອງໄດ້ມີການທົບທວນການຕັດສິນໃຈໃນເລື່ອງນີ້ຄືນ.

ເຖິງຢ່າງໃດກໍ່ຕາມ, ທ່ານ ປູຕິນ ເຊື່ອວ່າການພົບປະຫາລືກັບຜູ້ນຳສະຫະລັດ ອາເມຣິກາໂດຍກົງອີກຄັ້ງ ຈະເປັນປະໂຫຍດກວ່າ ພາຍຫຼັງເຄີຍປະຊຸມຮ່ວມກັນຢ່າງເປັນທາງການຄັ້ງທຳອິດທີ່ນະຄອນຫຼວງເຮວຊິງກິ ປະເທດແຟງລັງ ເມື່ອເດືອນກໍລະກົດ ທີ່ຜ່ານມາ ໂດຍຜູ້ນຳລັດເຊຍ ແລະ ທ່ານ ຈອນ ໂບຕັ້ນ ຕົກລົງກັນໃນເບື້ອງຕົ້ນ ວ່າຜູ້ນຳທັງສອງປະເທດອາດພົບປະຫາລືນອກຮອບງານລະນຶກ 100 ປີຂໍ້ຕົກລົງຢຸດຍິງສົງຄາມໂລກຄັ້ງທີ 1 ທີ່ຈະຈັດຂຶ້ນທີ່ນະຄອນຫຼວງປາຣີສ ໃນວັນທີ 11 ກັນຍາ 2018 ນີ້.

(Photo by Maxim SHIPENKOV / POOL / AFP)