ກູເວດ ມີຄວາມຕ້ອງການແຮງງານຈາກ ສປປ.ລາວ ຫຼາຍກວ່າ 1,000 ຄົນ

PHOTO: Kuwait Embassy in Laos

ສຳນັກຂ່າວສານປະເທດລາວລາຍງານວ່າ:​ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ກຽດຕ້ອນຮັບທ່ານ ນາງ ຮິນ ອໍ ເຊາະເບຍ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມແຫ່ງກູເວດ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ປະຕິບັດໜ້າທີ່ຢູ່ ສປປ.ລາວ ໃນວັນທີ 23 ຕຸລາ 2018 ທີ່ຜ່ານມາ ທີ່ໂຮງແຮມລາວພຣາຊາ ນະຄອນຫຼວງວຽງຈັນ ເຊິ່ງທັງສອງຝ່າຍໄດ້ປຶກສາຫາລືຄວາມເປັນໄປໄດ້ ໃນການຈັດສົ່ງແຮງງານລາວ ໄປເຮັດວຽກຢູ່ລັດກູເວດ ໃນຂອບຂອງສັນຍາແຮງງານປີ 2009.

PHOTO: Kuwait Embassy in Laos

ໂດຍລັດກູເວດ ໄດ້ມີຄວາມຕ້ອງການແຮງງານທີ່ບໍ່ທັນມີສີມືຈາກ ສປປ.ລາວ ຫຼາຍກວ່າ 1,000 ຄົນ ເພື່ອໄປເຮັດວຽກ ແລະ ປະກອບອາຊີບຕ່າງໆໃນທຸກຂະແໜງການເປັນຕົ້ນແມ່ນ ແມ່ບ້ານ, ຄົນສວນ, ຄົນຂັບລົດ ໂດຍບໍ່ຈຳກັດເພດ ແລະ ບໍ່ກຳນົດວຸດທິການສຶກສາ, ຄວາມຮູ້ຄວາມສາມາດ ລວມທັງພາສາ.

ທ່ານ ຄຳແພງ ໄຊສົມແພງ ໄດ້ກ່າວວ່າ: ໃນປີຜ່ານມາ ສປປ.ລາວ ກໍ່ໄດ້ມີການຈັດສົ່ງແຮງງານລາວ ໄປເຮັດວຽກຢູ່ຕ່າງປະເທດຫຼາຍກວ່າ 50 ພັນຄົນ, ຍິງ 27,176 ຄົນ ເປັນຕົ້ນແມ່ນຢູ່ປະເທດໄທ, ຍີ່ປຸ່ນ ແລະ ເກົາຫຼີໃຕ້. ການພົບປະຫາຄັ້ງນີ້ ເປັນໂອກາດດີທີ່ທາງກູເວດຕ້ອງການແຮງງານທີ່ບໍ່ທັນມີສີມືຈາກ ສປປ.ລາວ ເພື່ອໄປເຮັດວຽກໃນຂະແໜງການຕ່າງໆ ເຊິ່ງທາງກະຊວງແຮງງານລາວ ຈະພິຈາລະນາຄົ້ນຄວ້າຕາມຄວາມເໝາະສົມ.

ເຖິງຢ່າງໃດກໍ່ຕາມ, ທ່ານ ຄຳແພງ ໄຊສົມແພງ ຊີ້ໃຫ້ເຫັນວ່າ ປັດຈຸບັນແຮງງານລາວ ຍັງມີຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານ ເປັນຕົ້ນພາສາ, ຄວາມຮູ້ຄວາມສາມາດບໍ່ສູງ, ລວມທັງວິຊາຊີບ ແລະ ສີມືແຮງງານຕ່າງໆ ເຊິ່ງຍັງເປັນບັນຫາສຳຄັນຂອງການສົ່ງອອກແຮງງານໄປຕ່າງປະເທດໃນໄລຍະຜ່ານມາ.

PHOTO: Kuwait Embassy in Laos
PHOTO: Kuwait Embassy in Laos
PHOTO: Kuwait Embassy in Laos
PHOTO: Kuwait Embassy in Laos