ເຫດຄົນຮ້າຍບຸກຍິງໂບສຊາວຢິວ ລັດເພັນສິນວາເນຍ ສ.ອາເມຣິກາ ເສຍຊີວິດແລ້ວ 11 ຄົນ

(Photo by Brendan Smialowski / AFP)

ສຳນັກຂ່າວຕ່າງປະເທດລາຍງານເມື່ອວັນທີ 27 ຕຸລາ 2018 ທີ່ຜ່ານມາວ່າ: ກະຊວງຍຸຕິທຳສະຫະລັດ ອາເມຣິກາອອກຖະແຫຼງການ ເລື່ອງການຕັ້ງຂໍ້ຫາ 29 ຂໍ້ຫາ ທີ່ລວມເຖິງການເຈດຕະນາຂ້າຜູ້ອື່ນໂດຍໃຊ້ອາວຸດປືນກັບທ້າວ ໂຣເບິດ ໂບເວີສ ອາຍຸ 46 ປີ ທີ່ກໍ່ເຫດບຸກຍິງພາຍໃນໂບຢິວ “Tree of Life” ທີ່ມີອາຍຸເກົ່າແກ່ກວ່າ 150 ປີ ຕັ້ງຢູ່ໃນເຂດສະແຄວໂຣ ຮິວ ເຊິ່ງເປັນຊຸມຊົນຊາວຢິວຂະໜາດໃຫຍ່ທີ່ສຸດໃນເມືອງພິດສະເບິກ ລັດເພັນສິນວາເນຍ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 11 ຄົນ ແລະ ມີຜູ້ໄດ້ຮັບບາດເຈັບອີກ 6 ຄົນ ລວມມີຕຳຫຼວດ 4 ຄົນ ແຕ່ມີລາຍງານວ່າຜູ້ໄດ້ຮັບບາດເຈັບທີ່ເປັນປະຊາຊົນມີອາການສາຫັດ.

(Photo by Brendan Smialowski / AFP)

ເຊິ່ງພະນັກງານສືບສວນສອບສວນຕັ້ງສົມມຸດຕິຖານວ່າ ທ້າວ ໂຣເບິດ ໂບເວີສ ກໍ່ເຫດພຽງລຳພັງ ແລະ ໂສກອະນາດຕະກຳຄັ້ງນີ້ ເປັນອາຊະຍາກຳທີ່ມີແຮງຈູງໃຈມາຈາກຄວາມກຽດຊັງ ແລະ ຂໍ້ຫາສ່ວນໃຫຍ່ທີ່ລັດຖະບານສະຫະລັດ ອາເມຣິກາເປັນຜູ້ດຳເນີນການຮ້ອງຟ້ອງມັກມີບົດລົງໂທດສູງສຸດຄືການປະຫານຊີວິດ, ຂະນະທີ່ສື່ທ້ອງຖິ່ນຫຼາຍແຫ່ງລາຍງານວ່າ ເຈົ້າໜ້າທີ່ຕຳຫຼວດໄດ້ສືບຄົ້ນປະຫວັດການໃຊ້ສື່ສັງຄົມອອນລາຍຂອງທ້າວ ໂຣເບິດ ໂບເວີສ ຂະນະທີ່ຫຼົບລີ້ຢູ່ພາຍໃນໂບສລະຫວ່າງທີ່ຕຳຫຼວດຍົກກຳລັງເຂົ້າຈັບກຸມ ພົບການລົງຂໍ້ຄວາມ ແລະ ພາບທີ່ລ້ວນແຕ່ມີເນື້ອໃນກຽດຊັງຊາວຢິວ.

ໃນດ້ານຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາປະນາມເຫດການດັ່ງກ່າວ ເຊິ່ງຖືເປັນການທຳຮ້າຍສະມາຊິກຊຸມຊົນຊາວຢິວຄັ້ງຮຸນແຮງທີ່ສຸດໃນສະຫະລັດ ອາເມຣິກາ ວ່າເປັນອາຊະຍາກຳຕໍ່ມະນຸດຊາດ ແລະ ຮຽກຮ້ອງໃຫ້ຊາວອາເມຣິກາສະແດງຄວາມເປັນນ້ຳໜຶ່ງໃຈດຽວກັນ ເພື່ອຕໍ່ສູ້ກັບຄວາມກຽດຊັງທາງເຊື້ອຊາດ ພ້ອມທັງກ່າວວ່າເຫດການນີ້ ມີການເຊື່ອມໂຍງໜ້ອຍຫຼາຍກັບຄວາມພະຍາຍາມຂອງຫຼາຍຝ່າຍໃນການປະຕິຮູບກົດໝາຍອາວຸດປືນ ໃນເວລາດຽວກັນທາງການລັດນິວຢອກກໍ່ໄດ້ສັ່ງເພີ່ມກຳລັງເຈົ້າໜ້າທີ່ໃນເຄື່ອງແບບອາລັກຂາຄວາມປອດໄພຕາມໂບສຢິວທຸກແຫ່ງໃນພື້ນທີ່.

ນອກຈາກນີ້, ທຳນຽບນາຍົກລັດຖະມົນຕີອິດສະຣາແອນ ໄດ້ເຜີຍແຜ່ຖະແຫຼງການຂອງທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ສະແດງຄວາມຕື່ນຕົກໃຈຕໍ່ເຫດການບຸກຍິງໂບສຂອງຊາວຢິວໃນເມືອງພິດສະເບິກ ແລະ ຮ່ວມສົ່ງກຳລັງໃຈໃຫ້ຜູ້ໄດ້ຮັບບາດເຈັບມີອາການດີຂຶ້ນໂດຍໄວ.

(Photo by Brendan Smialowski / AFP)
(Photo by Dustin Franz / AFP)