ທ່ານນາຍົກ ຈະເດີນທາງຢ້ຽມຢາມ ສປ.ຈີນ ເພື່ອເຂົ້າຮ່ວມງານວ່າງສະແດງສິນຄ້ານຳເຂົ້າສາກົນຈີນ ຄັ້ງທີ 1

(Photo by NICOLAS ASFOURI / POOL / AFP)

ກະຊວງການຕ່າງປະເທດລາຍງານວ່າ: ໂດຍຕອບສະໜອງຕາມການເຊື້ອເຊີນຂອງ ທ່ານ ສີ ຈິ້ນຜິງ ປະທານປະເທດ ແຫ່ງສາທາລະນະລັດ ປະຊາຊົນຈີນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ.ລາວ ຈະນຳພາຄະນະຜູ້ແທນລາວ ເດີນທາງເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 1 (China International Import Expo) ພາຍໃຕ້ຫົວຂໍ້: “ຍຸກສະໄໝໃໝ່, ຊົມໃຊ້ອະນາຄົດຮ່ວມກັນ (New Era, Shared Future)”, ທີ່ຈະຈັດຂຶ້ນໃນວັນທີ 05-10 ພະຈິກ 2018, ທີ່ ນະຄອນຊຽງໄຮ້, ສປ.ຈີນ.

ງານວາງສະແດງສິນຄ້ານຳເຂົ້າສາກົນຈີນຄັ້ງນີ້ ຈັດຂຶ້ນເປັນຄັ້ງທຳອິດ ເຊິ່ງຄາດຄະເນວ່າ ຈະມີບັນດາຜູ້ນຳ, ຕົວແທນບໍລິສັດ ແລະ ນັກທຸລະກິດລະດັບສາກົນຈາກ 130 ປະເທດທົ່ວໂລກເຂົ້າຮ່ວມ, ໃນນັ້ນ 12 ປະເທດຈະຖືກຄັດເລືອກໃຫ້ເປັນປະທານຮ່ວມກັບ ສປ.ຈີນ. ຈຸດປະສົງ ແລະ ເປົ້າໝາຍສຳຄັນ ຂອງການຈັດງານວາງສະແດງຄັ້ງນີ້ ແມ່ນເພື່ອສົ່ງເສີມການຮ່ວມມືດ້ານການຄ້າ ລະຫວ່າງ ສປ.ຈີນ ກັບ ພາກພື້ນ ແລະ ສາກົນ ແນ່ໃສ່ຮັກສາ ແລະ ຊຸກຍູ້ເສດຖະກິດໂລກ ໃຫ້ພັດທະນາໄປໃນທິດທາງທີ່ເປີດກວ້າງ, ສົມດຸນ ແລະ ຕ່າງຝ່າຍຕ່າງມີຜົນປະໂຫຍດຫຼາຍຂຶ້ນກວ່າເກົ່າ.

ໃນໂອກາດເຂົ້າຮ່ວມງານວາງສະແດງຄັ້ງນີ້, ທ່ານ ທອງລຸນ ສີສຸລິດ ຈະໄດ້ພົບປະສອງຝ່າຍກັບທ່ານ ສີ ຈິ້ນຜິງ ເພື່ອປຶກສາຫາລືກ່ຽວກັບການເພີ່ມທະວີ ແລະ ເສີມຂະຫຍາຍການພົວພັນຮ່ວມມືຍຸດທະສາດຮອບດ້ານໝັ້ນຄົງຍາວນານ ລະຫວ່າງສອງປະເທດຕາມທິດ 4 ດີ ແລະ ການເປັນຄູ່ຮ່ວມຊາຕາກຳສັງຄົມນິຍົມ ລາວ-ຈີນ ໃຫ້ແໜ້ນແຟ້ນຍິ່ງຂື້ນ. ທ່ານ ທອງລຸນ ສີສຸລິດ ຍັງຈະໄດ້ພົບປະກັບພາກສ່ວນທຸລະກິດຈີນ ແລະ ຢ້ຽມຢາມພື້ນຖານການຜະລິດຈຳນວນໜຶ່ງ.