ຈີນເປີດໂຕຕົ້ນແບບ ໂດຣນຮົບລ່ອງຫົນ CH-7 ມີແຜນຂາຍອອກຕ່າງປະເທດ ໂດຍສະເພາະຕາເວັນອອກກາງ

(Photo by WANG ZHAO / AFP)

ສຳນັກຂ່າວຕ່າງປະເທດລາຍງານເມື່ອວັນທີ 7 ພະຈິກ 2018 ທີ່ຜ່ານມາວ່າ: ບໍລິສັດຜະລິດຍານພາຫະນະທາງອາກາດຂອງລັດຖະບານຈີນ ໄດ້ເປີດໂຕຍານພະຫະນະທາງອາກາດລອງຫົນທີ່ໄຮ້ຄົນຂັບ (ໂດຣນ) CH-7 ເຊິ່ງຖືເປັນການເນັ້ນຢ້ຳໃຫ້ເຫັນເຖິງຄວາມສາມາດໃນການແຂ່ງຂັນທີ່ກຳລັງເຕີບໃຫຍ່ຂອງຈີນ ໃນຕະຫຼາດໂດຣນໂລກທີ່ກຳລັງຂະຫຍາຍຕົວ ບໍລິສັດຜູ້ຜະລິດໃນຈີນໄດ້ຮັບໃບສັ່ງຊື້ຈຳນວນຫຼາຍຈາກຕາເວັນອອກກາງ ແລະ ອື່ນໆ ດ້ວຍຂໍ້ສະເໜີໂດຣນລາຄາຖືກກວ່າ ແລະ ໂດຍບໍ່ມີເງື່ອນໄຂທາງການເມືອງມາຕິດພັນ ຄືກັບການຂາຍໂດຣນຂອງສະຫະລັດ ອາເມຣິກາ.

(Photo by WANG ZHAO / AFP)

ໂດຣນຮົບລ່ອງຫົນ CH-7 ລຸ້ນຕົ້ນແບບ ຖືກນຳອອກຈັດສະແດງໃນງານເຫດສະການການບິນ ແລະ ອະວະກາດສາກົນຈີນ ຄັ້ງທີ 12 ຫຼື Airshow China 2018 ທີ່ເມືອງຈູໄຫ່ ມົນທົນກວາງຕຸ້ງ ທາງພາກຕາເວັນອອກສຽງໃຕ້ຂອງຈີນ.

ທ່ານ ສີ ເຫວິນ ຫົວໜ້າຄະນະວິສະວະກອນຜູ້ອອກແບບກ່າວວ່າ CH-7 ສາມາດບິນໄດ້ເປັນເວລາດົນ ນອກຈາກນັ້ນຍັງສອດແນມ ແລະ ໂຈມຕີເປົ້າໝາຍໄດ້ເມື່ອຈຳເປັນ “ຂ້າພະເຈົ້າເຊື່ອວ່າອີກບໍ່ເກີນໜຶ່ງ ຫຼື ສອງປີ ພວກເຮົາຈະໄດ້ເຫັນ CH-7 ບິນຂຶ້ນສູ່ທ້ອງຟ້າ ພ້ອມທັງຈະຄ່ອຍໆກາຍເປັນຜະລິດຕະພັນທີ່ໃຊ້ງານໄດ້ຈິງ ແລະ ເປັນປະໂຫຍດໃນອະນາຄົດ”.

ທ່ານ ສີ ເຫວິນ ກ່າວອີກວ່າ ບໍລິສັດຜູ້ຜະລິດ CH-7 ນັ້ນກໍ່ຄື China Aerospace Science and Technology Corporation (CASTC) ມີແຜນທົດລອງການບິນ CH-7 ໃນປີໜ້າ ກ່ອນຈະເລີ່ມການຜະລິດໃນທາງທຸລະກິດໃນປີ 2022 ໂດຍຈະເນັ້ນການຂາຍໃນຕ່າງປະເທດ.

CH-7 ມີຂະໜາດຄວາມຍາວແຕ່ຫົວເຖິງທ້າຍ 10 ແມັດ ແລະ ຄວາມຍາວປີກ 22 ແມັດ ຂະໜາດເທົ່າກັບຍົນຮົບ ແລະ ເຄື່ອງຈັກດ່ຽວຂອງມັນສາມາດຂັບເຄື່ອນດ້ວຍຄວາມໄວເທົ່າກັບຍົນໂດຍສານທົ່ວໄປ.