ສົມເດັດຮຸນ ເຊນ ບໍ່ສົນຕໍ່ຄຳວິຈານ ໃນການແຕ່ງຕັ້ງລູກຊາຍ 3 ຄົນຢູ່ໃນຕຳແໜ່ງສຳຄັນທາງການເມືອງ ແລະ ການທະຫານ

(Photo by TANG CHHIN Sothy / AFP)

ສຳນັກຂ່າວຕ່າງປະເທດລາຍງານ 9 ພະຈິກ 2018 ວ່າ: ສົມເດັດຮຸນ ເຊນ ນາຍົກລັດຖະມົນຕີກຳປູເຈຍ ກ່າວເມື່ອວັນພະຫັດ ທີ່ຜ່ານມາປະຕິເສດຂໍ້ກ່າວຫາຂອງຫຼາຍຝ່າຍທັງໃນ ແລະ ຕ່າງປະເທດກ່ຽວກັບການຫຼິ້ນພັກຫຼິ້ນພວກ ແລະ ສະແຫວງຫາຜົນປະໂຫຍດໃຫ້ກັບວົງຄະນາຍາດຕົນເອງ ຈາກກໍລະນີທີ່ຜູ້ນຳກຳປູເຈຍໄດ້ແຕ່ງຕັ້ງລູກຊາຍ 3 ຄົນ ໃຫ້ດຳລົງຕຳແໜ່ງສຳຄັນທັງທາງການທະຫານ ແລະ ການເມືອງ ໂດຍຢືນຢັນວ່າບຸກຄົນທີ່ໄດ້ຮັບການແຕ່ງຕັ້ງທັງໝົດລ້ວນແຕ່ເປັນຜູ້ທີ່ມີຄຸນສົມບັດເໝາະສົມ.

ເຊິ່ງທ່ານ ພົນໂທ ຮຸນ ມາເນດ ລູກຊາຍກົກຂອງສົມເດັດຮຸນ ເຊນ ໄດ້ຮັບແຕ່ງຕັ້ງໃຫ້ດຳລົງຕຳແໜ່ງປະທານຄະນະເສນາທິການທະຫານຂອງກຳປູເຈຍ ແລະ ຜູ້ບັນຊາການກອງທັບບົກ ເມື່ອເດືອນກັນຍາ ທີ່ຜ່ານມາ ໂດຍທ່ານ ພົນໂທ ຮຸນ ມາເນດ ອາຍຸ 41 ປີ ຈົບການສຶກສາຈາກໂຮງຮຽນນາຍຮ້ອຍເວສພອຍຂອງສະຫະລັດ ອາເມຣິກາ, ຂະນະທີ່ທ່ານພົນເອກພິເສດ ຮຸນ ມານິດ ລູກຊາຍຜູ້ທີ່ສອງ ອາຍຸ 37 ປີ ດຳລົງຕຳແໜ່ງຜູ້ບັນຊາການສຳນັກຂ່າວກອງທະຫານ.

ໃນດ້ານຂອງທ່ານ ຮຸນ ມານີ ລູກຊາຍຫຼ້າຈາກທັງໝົດ 5 ຄົນ ດຳລົງຕຳແໜ່ງສະມາຊິກສະພາປະຊາຊົນປະຈຳແຂວງກຳປົງສະປື ແລະ ແນ່ນອນວ່າສັງກັດພັກປະຊາຊົນກຳປູເຈຍ ພາຍໃຕ້ການນຳພາຂອງຜູ້ເປັນພໍ່ ທີ່ສາມາດຍາດໄດ້ໄຊຊະນະທຸກສຽງໃນສະພາ ທັງ 125 ສຽງ ຈາກການເລືອກຕັ້ງເມື່ອທ້າຍເດືອນກໍລະກົດ ທີ່ຜ່ານມາ, ນອກຈາກນີ້ ທ່ານ ຮຸນ ມານີ ຍັງຄຸ້ມຄອງວຽກງານຂອງສະຫະພັນເຍົາວະຊົນແຫ່ງຊາດ ທີ່ເປັນອົງການມະຫາຊົນຂຶ້ນກັບພັກປະຊາຊົນກຳປູເຈຍອີກດ້ວຍ.