ເກົາຫຼີເໜືອ ທົດສອບອາວຸດດ້ານຍຸດທະວິທີລຸ້ນໃໝ່ຫຼ້າສຸດ

ສຳນັກຂ່າວຕ່າງປະເທດລາຍງານ 16 ພະຈິກ 2018 ວ່າ: ໂດຍອ້າງອີງຈາກການລາຍງານຂອງສຳນັກຂ່າວກາງເກົາຫຼີ (KCNA) ວ່າທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອໄດ້ສັງເກດການການທົດສອບປະສິດທິພາບຂອງອາວຸດດ້ານຍຸດທະວິທີລຸ້ນໃໝ່ ທີ່ສະຖາບັນວິທະຍາສາດ ແລະ ເຕັກໂນໂລຊີປ້ອງກັນປະເທດ, ໃນນະຄອນຫຼວງປຽງຢາງເມື່ອບໍ່ດົນມານີ້, ໂດຍການທົດສອບປະສົບຄວາມສຳເລັດດ້ວຍດີ ເປັນໄປຕາມເປົ້າໝາຍຂອງທ່ານຜູ້ນຳໃນການມີອາວຸດຊະນິດດັ່ງກ່າວ ເພື່ອປ້ອງກັນອະທິປະໄຕຂອງປະເທດ ແລະ ປ້ອງກັນການຮຸກຮານຈາກສັດຕູພາຍນອກ, ເຖິງຢ່າງໃດກໍ່ຕາມ ລາຍງານຂອງ KCNA ບໍ່ໄດ້ລະບຸວ່າ ວາວຸດທີ່ມີການທົດສອບນັ້ນແມ່ນຫຍັງ.

ຫາກລາຍງານດັ່ງກ່າວເປັນຄວາມຈິງຈະຖືເປັນຄັ້ງທຳອິດທີ່ເກົາຫຼີເໜືອທົດສອບອາວຸດ ນັບຕັ້ງແຕ່ການທົດສອບຂີປະນາວຸດຂ້າມທະວີບ Hwasong-15 ເມື່ອເດືອນພະຈິກ ປີທີ່ຜ່ານມາ, ນອກຈາກນີ້ ການເຄື່ອນໄຫວທີ່ເກີດຂຶ້ນຍິ່ງບົ່ງບອກວ່າການຮ່ວມມືລະຫວ່າງເກົາຫຼີເໜືອ ກັບ ສະຫະລັດ ອາເມຣິກາ ໃນການເຮັດໃຫ້ແຫຼມເກົາຫຼີເປັນເຂດປອດອາວຸດນິວເຄຼຍ ນັບຕັ້ງແຕ່ການພົບປະຫາລືລະຫວ່າງທ່ານ ຄິມ ຈອງ-ອຶນ ກັບ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ທີ່ສິງກະໂປ ເມື່ອເດືອນມິຖຸນາ ທີ່ຜ່ານມາບໍ່ມີຄວາມຄືບໜ້າ ແລະ ຍັງສອດຄ່ອງກັບລາຍງານໃນອາທິດນີ້ວ່າ ເກົາຫຼີເໜືອມີຖານຂີປະນາວຸດລັບຢ່າງໜ້ອຍ 13 ແຫ່ງອີກດ້ວຍ.

ຂະນະທີ່ລັດຖະບານສະຫະລັດ ອາເມຣິກາ ຍັງບໍ່ສະແດງທ່າທີຕໍ່ການເຄື່ອນໄຫວທີ່ເກີດຂຶ້ນ ເຊັ່ນດຽວກັບເກົາຫຼີໃຕ້ ແຕ່ໃນຂະນະດຽວກັນ KCNA ລາຍງານອີກວ່າ ທ່ານຜູ້ນຳມີຄຳສັ່ງໃຫ້ນຳໝາກກ້ຽງ 200 ໂຕນ ຂອງດີຈາກເກາະເຊຈູ ຂອງຂວັນສະແດງມິດໄມຕີຈາກທ່ານ ມູນ ແຈ-ອິນ ປະທານປະເທດເກົາຫຼີໃຕ້ ທີ່ຍົນລຳລຽງຂອງກອງທັບເກົາຫຼີໃຕ້ນຳມາສົ່ງໃຫ້ເມື່ອຕົ້ນອາທິດນີ້ ໄປແຈກຢາຍໃຫ້ກັບເດັກນ້ອຍ ແລະ ເຍົາວະຊົນ ຕະຫຼອດຮອດຜູ້ໃຊ້ແຮງງານໃນປະເທດ ເຊິ່ງຜູ້ນຳຂອງເກົາຫຼີເໜືອໄດ້ສົ່ງເຫັດສົນຄຸນນະພາບດີນ້ຳໜັກ 2 ໂຕນໃຫ້ແກ່ເກົາຫຼີໃຕ້ ເມື່ອເດືອນກັນຍາ ທີ່ຜ່ານມາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube