ສະມັດຊາໃຫຍ່ UN ປະນາມອິດສະຣາແອນ ທີ່ກົດຂີ່ຂົ່ມເຫງປະຊາຊົນຊີຣີ ແລະ ປາແລັດສະຕິນ

ສຳນັກຂ່າວຕ່າງປະເທດລາຍງານເມື່ອວັນທີ 16 ພະຈິກ 2018 ທີ່ຜ່ານມາວ່າ: ສະມັດຊາໃຫຍ່ແຫ່ງສະຫະປະຊຊາດ ມີມະຕິສຽງສ່ວນໃຫຍ່ໃນກອງປະຊຸມເມື່ອວັນສຸກ ທີ່ຜ່ານມາ 151 ສຽງ, ຄັດຄ້ານ 2 ສຽງ ແລະ ງົດອອກສຽງ 14 ສຽງ ສ່ວນທີ່ເຫຼືອບໍ່ເຂົ້າຮ່ວມກອງປະຊຸມ ຜ່ານມະຕິ “ການຢຶດຄອງພູພຽງໂກລັນຂອງຊີຣີ” ປະນາມການທີ່ອິດສະຣາແອນໃຊ້ມາດຕະການກົດຂີ່ຂົ່ມເຫງຕໍ່ປະຊາຊົນຊີຣີ ທີ່ອາໄສຢູ່ໃນພູພຽງໂກລັນ ໂດຍປະເທດທີ່ອອກສຽງຄັດຄ້ານມີພຽງສະຫະລັດ ອາເມຣິກາ ແລະ ອິດສະຣາແອນ.

(Photo by Andrei BORODULIN / AFP)

ຂະນະດຽວກັນກອງປະຊຸມສະມັດຊາໃຫຍ່ຍັງໄດ້ອອກສຽງຮັບຮອງມະຕິ “ພຶດຕິກຳຂອງອິດສະຣາແອນສົ່ງຜົນກະທົບຕໍ່ສິດທິມະນຸດຂອງຊາວປາແລັດສະຕິນ” ດ້ວຍຄະແນນສະໜັບສະໜູນສ່ວນໃຫຍ່ 153 ສຽງ, ຄັດຄ້ານ 6 ສຽງ ແລະ ງົດອອກສຽງ 9 ສຽງ ໂດຍກຸ່ມປະເທດທີ່ບໍ່ສະໜັບສະໜູນນີ້ໄດ້ແກ່: ສະຫະລັດ ອາເມຣິກາ, ອິດສະຣາແອນ, ອົດສະຕຣາລີ, ການາດາ, ມາດໂຊນ ອິດສະແລນ ແລະ ໄມໂຄຣນີຊີ, ເຖິງຢ່າງໃດກໍ່ຕາມ ໃນສ່ວນຂອງມະຕິໃຫ້ມີການຈັດຕັ້ງຄະນະປະຕິບັດງານສະເພາະກິດເພື່ອກວດສອບພຶດຕິກຳຂອງອິດສະຣາແອນຢູ່ພູພຽງໂກລັນ ແລະ ຕໍ່ປະຊາຊົນປາແລັດສະຕິນ ມີປະເທດງົດອອກສຽງສູງເຖິງ 79 ສຽງ, ສະໜັບສະໜູນ 77 ສຽງ ແລະ ຄັດຄ້ານ 8 ສຽງໄດ້ແກ່ສະຫະລັດ ອາເມຣິກາ, ອິດສະຣາແອນ, ການາດາ, ກົວເຕມາລາ, ຮົງດູຣັສ, ອິດສະຣາແອນ, ມາດໂຊນ ອິດສະແລນ ແລະ ໄມໂຄຣນີຊີ.

ເຊິ່ງການລົງມະຕິດັ່ງກ່າວຖືເປັນຄັ້ງທຳອິດທີ່ສະຫະລັດ ອາເມຣິກາຄັດຄ້ານໃນທຸກມະຕິ ທີ່ເປັນການປະນາມອິດສະຣາແອນຕໍ່ສະຖານະການຢູ່ພູພຽງໂກລັນ ຫຼັງຈາກທີ່ງົດອອກສຽງຕະຫຼອດໄລຍະເວລາທີ່ຜ່ານມາ, ໂດຍທ່ານ ນາງ ນິກກີ້ ເຮລີ ເອກອັກຄະລັດຖະທູດສະຫະລັດ ອາເມຣິກາປະຈຳສະຫະປະຊາຊາດ ກ່າວວ່າການລົງມະຕິຂອງສະມັດຊາໃຫຍ່ຕໍ່ກັບບັນຫາດັ່ງກ່າວນີ້ ແມ່ນບໍ່ມີປະໂຫຍດຫຍັງ, ໃນດ້ານຂອງທ່ານ ແດນນີ ດານອນ ເອກອັກຄະລັດຖະທູດອິດສະຣາແອນປະຈຳສະຫະປະຊາຊາດ ກ່າວວ່າການປັບປ່ຽນທ່າທີຂອງສະຫະລັດ ອາເມຣິກາໃນຄັ້ງນີ້ຖືເປັນການຍົກລະດັບສາຍພົວພັນສອງຝ່າຍໃຫ້ຮັດແໜ້ນຍິ່ງຂຶ້ນ.

ເຊິ່ງພູພຽງໂກລັນມີເນື້ອທີ່ປະມານ 1,800 ຕາລາງກິໂລແມັດ ຕັ້ງຢູ່ທາງພາກຕາເວັນອອກຂອງອິດສະຣາແອນ ແລະ ຕາເວັນຕົກຂອງຊີຣີ ແຕ່ອິດສະຣາແອນຢຶດຄອງເຂດດັ່ງກ່າວໄປໄດ້ຫຼາຍເຖິງ 1,200 ຕາລາງກິໂລແມັດ ພາຍຫຼັງຊະນະສົງຄາມຫົກວັນ ເມື່ອປີ 1967, ເຖິງຢ່າງໃດກໍ່ຕາມ ສະຫະປະຊາຊາດບໍ່ເຄີຍຮັບຮອງວ່າອານາເຂດຢູ່ພູພຽງໂກລັນ ທີ່ອິດສະຣາແອນຢຶດຄອງໄປນັ້ນເປັນດິນແດນພາຍໃຕ້ອະທິປະໄຕຂອງອິດສະຣາແອນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube