ການປະທ້ວງ ການຂຶ້ນພາສີນ້ຳມັນ ທີ່ປະເທດຝຣັ່ງດຳເນີນໄປຢ່າງດຸເດືອດ

ສຳນັກຂ່າວຕ່າງປະເທດລາຍງານ 25 ພະຈິກ 2018 ວ່າ: ທຳນຽບເລລີເຊ (ທຳນຽບປະທານປະເທດຝຣັ່ງ) ອອກຖະແຫຼງການເມື່ອວັນເສົາ ທີ່ຜ່ານມາ ວ່າທ່ານ ເອມມານູເອວ ມາຄຼອງ ປະທານປະເທດຝຣັ່ງຕີລາຄາສະຖານະການຄວາມວຸ້ນວາຍ ແລະ ຄວາມຮຸນແຮງທົ່ວປະເທດຈາກກະແສຕໍ່ຕ້ານລາຄານ້ຳມັນເຊື້ອໄຟທີ່ແພງຂຶ້ນ ໂດຍສະເພາະໃນນະຄອນຫຼວງປາຣີສ ທີ່ມີການທຳຮ້າຍຮ່າງກາຍຂອງເຈົ້າໜ້າທີ່ ແລະ ປະຊາຊົນຜູ້ບໍລິສຸດຈຳນວນຫຼາຍວ່າ “ເປັນພາບລັກທີ່ໜ້າອັບອາຍ” ເຊິ່ງບໍ່ສົມຄວນຈະເກີດຂຶ້ນຢ່າງຍິ່ງໃນປະເທດແຫ່ງນີ້ ພ້ອມທັງຢືນຢັນວ່າລັດຖະບານຈະບໍ່ເປັນຝ່າຍຖອຍ.

ໃນດ້ານຂອງທ່ານ ຄຼິສໂຕເຟີ ຄາສຕາເນີ ລັດຖະມົນຕີກະຊວງປ້ອງກັນຄວາມສະຫງົບຝຣັ່ງ ປະນາມພັກການໂຮມຊຸມນຸມແຫ່ງຊາດ (RN) ເຊິ່ງເປັນພັກການເມືອງຊາດນິຍົມຂວາຈັດຂອງທ່ານ ນາງ ມາຣີ ເລີ ແປນ ຢູ່ເບື້ອງຫຼັງການປະທ້ວງຄັ້ງນີ້ ຈາກການທີ່ທ່ານ ນາງ ກ່າວເມື່ອຕົ້ນອາທິດທີ່ຜ່ານມາ ປຸກລະດົມໃຫ້ປະຊາຊົນທີ່ສ່ວນໃຫຍ່ລວມຕົວກັນໃນນາມ “ເສື້ອກັກເຫຼືອ” ເຊິ່ງເປັນເຄື່ອງແຕ່ງກາຍທີ່ທັງເຈົ້າໜ້າທີ່ສຸກເສີນ ແລະ ປະຊາຊົນທົ່ວໄປມີຕິດລົດ ເພື່ອໄວ້ນຸ່ງອັນເປັນສັນຍາລັກໃນຍາມເກີດເຫດສຸກເສີນ ໃຫ້ມາໂຮມຊຸມນຸມກັນທີ່ຊອງເຊລີເຊ ເຖິງແມ່ນວ່າລັດຖະບານຈະປະກາດຫ້າມຈັດກິດຈະກຳທາງການເມືອງທຸກປະເພດໃນເຂດດັ່ງກ່າວ.

(Photo by Bertrand GUAY / AFP)

ເຊິ່ງກະຊວງປ້ອງກັນຄວາມສະຫງົບຝຣັ່ງ ປະເມີນວ່າມີປະຊາຊົນເຂົ້າຮ່ວມການປະທ້ວງຫຼາຍກວ່າ 100,000 ຄົນທົ່ວປະເທດ ໃນຈຳນວນນີ້ປະມານ 5,000 ຄົນລວມຕົວໃນນະຄອນຫຼວງປາຣີສ ເພື່ອຕໍ່ຕ້ານນະໂຍບາຍຂອງລັດຖະບານ ໃນການເກັບພາສີນ້ຳມັນແອັດຊັງເພີ່ມເປັນ 2.9 ເຊັນ (ເອີໂຣ) ຕໍ່ລິດ ແລະ ລາຄານ້ຳມັນກາຊວນເປັນລິດລະ 6.5 ເຊັນ (ເອີໂຣ) ສູງທີ່ສຸດໃນຮອບ 18 ປີ ຕັ້ງແຕ່ວັນທີ 1 ມັງກອນ 2019 ເພື່ອຫວັງກະຕຸ້ນໃຫ້ປະຊາຊົນຫັນມາໃຊ້ພະລັງງານສະອາດຫຼາຍຂຶ້ນ ໂດຍຜູ້ນຳຝຣັ່ງອ້າງອີງຄວາມຜັນຜວນຂອງລາຄານ້ຳມັນໃນຕະຫຼາດໂລກ ແລະ ອັດຕານີ້ເພີ່ມຂຶ້ນຈາກອັດຕາປົກກະຕິໃນຮອບ 12 ເດືອນທີ່ຜ່ານມາເຖິງ 23%.

ຂະນະທີ່ຕຳຫຼວດປາບຈະລາຈົນໄດ້ໃຊ້ທັງລົດສີດນ້ຳແຮງດັນສູງ, ແກັດນ້ຳຕາ ແລະ ລູກປືນຢາງໃນການຄວບຄຸມກຸ່ມຜູ້ປະທ້ວງ ໂດຍມີລາຍງານການຈັບກຸ່ມຜູ້ກໍ່ຄວາມບໍ່ສະຫງົບຢ່າງໜ້ອຍ 130 ຄົນທົ່ວປະເທດ ໃນຈຳນວນນີ້ກວ່າ 40 ຄົນຢູ່ໃນນະຄອນຫຼວງປາຣີສ ແລະ ມີຜູ້ໄດ້ຮັບບາດເຈັບຢ່າງໜ້ອຍ 24 ຄົນ ໃນຈຳນວນນີ້ 5 ຄົນເປັນເຈົ້າໜ້າທີ່, ເຖິງແມ່ນວ່າແກນນຳຂອງການເຄື່ອນໄຫວຄັ້ງນີ້ກ່າວວ່າການທ້ວງທີ່ເກີດຂຶ້ນຄືການປະທ້ວງຄັ້ງທີ 2 ເປັນການສົ່ງສັນຍານວ່າຈະເກີດຂຶ້ນອີກ ແຕ່ສະຖິຕິຂອງຕຳຫຼວດລະບຸວ່າຈຳນວນຜູ້ເຂົ້າຮ່ວມນ້ອຍລົງຈາກການປະທ້ວງຄັ້ງທຳອິດ ເມື່ອວັນທີ 17 ພະຈິກ ທີ່ຜ່ານມາ ທີ່ມີຫຼາຍເຖິງ 282,000 ຄົນທົ່ວປະເທດ ແຕ່ຈົນເຖິງຕອນນີ້ມີຜູ້ເສຍຊີວິດແລ້ວ 2 ຄົນ.

(Photo by Bertrand GUAY / AFP)

(Photo by Bertrand GUAY / AFP)

(Photo by FRANCOIS GUILLOT / AFP)

(Photo by Bertrand GUAY / AFP)

(Photo by Bertrand GUAY / AFP)

(Photo by FRANCOIS GUILLOT / AFP)


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube