ກຸ່ມກະບົດຊີຣີ ໃຊ້ແກັດພິດໂຈມຕີເມືອງອາເລບໂປ ປະຊາຊົນໄດ້ຮັບບາດເຈັບຈຳນວນຫຼາຍ

ສຳນັກຂ່າວຕ່າງປະເທດລາຍງານເມື່ອວັນທີ 25 ພະຈິກ 2018 ທີ່ຜ່ານມາວ່າ: ກຸ່ມສັງເກດການສິດທິມະນຸດຊີຣີ (SOHR) ເປີດເຜີຍວ່າ ມີການໂຈມຕີດ້ວຍຈະຫຼວດບັນຈຸແກັດພິດເຮັດໃຫ້ປະຊາຊົນນັບຮ້ອຍຄົນ ມີບັນຫາກ່ຽວກັບການຫາຍໃຈ ແລະ ຖືກນຳສົ່ງໂຮງໝໍທ້ອງຖິ່ນ, ຂະນະທີ່ສຳນັກຂ່າວ SANA ຂອງທາງການຊີຣີ ລາຍງານເມື່ອວັນອາທິດ ທີ່ຜ່ານມາວ່າ: ປະຊາຊົນ 107 ຄົນໄດ້ຮັບບາດເຈັບໃນເມືອງອາເລບໂປ ພາຍຫຼັງກຸ່ມກະບົດໂຈມຕີ 2 ເຂດໃນເມືອງ ດ້ວຍລູກປືນໃຫຍ່ບັນແກັດພິດທີ່ເຮັດໃຫ້ຫາຍໃຈບໍ່ອອກ.

(Photo by George OURFALIAN / AFP)

ຖືເປັນການໂຈມຕີທີ່ມີຜູ້ເສຍຊີວິດ ແລະ ບາດເຈັບຫຼາຍທີ່ສຸດໃນເມືອງອາເລບໂປ ນັບຕັ້ງແຕ່ກອງທັບລັດຖະບານ ແລະ ກອງກຳລັງແນວຮ່ວມບຸກຢຶດເມືອງຄືນຈາກກະບົດເມື່ອ 2 ປີກ່ອນ.

ກຸ່ມກະບົດອອກຖະແຫຼງການປະຕິເສດວ່າບໍ່ໄດ້ໃຊ້ອາວຸດເຄມີ ແລະ ກ່າວຫາລັດຖະບານຊີຣີພະຍາຍາມໃສ່ຮ້າຍ.

ທາງດ້ານຖະແຫຼງການຂອງກະຊວງປ້ອງກັນປະເທດລັດເຊຍ ໃນນະຄອນຫຼວງມົດສະກູ ທີ່ຖະແຫຼງເມື່ອວັນອາທິດ ທີ່ຜ່ານມາ ກ່າວວ່າກະບົດຊີຣີຍິງຈະຫຼວດບັນຈຸແກັດກໍລໍຣົວ ໂຈມຕີໃນເມືອງອາເລບໂປ ເຮັດໃຫ້ປະຊາຊົນໄດ້ຮັບບາດເຈັບຈາກພິດ 46 ຄົນ ລວມເຖິງເດັກນ້ອຍ 8 ຄົນ ໂດຍກຸ່ມຄົນຮ້າຍຍິງຈະຫຼວດຈາກພື້ນທີ່ຫຼຸດຜ່ອນຄວາມຂັດແຍ່ງ ໃນແຂວງອິດລິບ ທີ່ຢູ່ພາຍໃຕ້ການຄວບຄຸມຂອງກຸ່ມຕິດອາວຸດ ນຸສຣາ ຟຣອນ ແນວຮ່ວມຂອງກຸ່ມອັນ-ກໍອະດະ.

ຖະແຫຼງການກ່າວອີກວ່າ ລັດເຊຍຈະຫາລືກັບຕວັກກີ ເຊິ່ງເປັນປະເທດທີ່ໃຫ້ການສະໜັບສະໜູນກະບົດຊີຣີບາງກຸ່ມ ແລະ ເປັນຕົວກາງຂໍ້ຕົກລົງຢຸດຍິງກັບລັດເຊຍໃນແຂວງອິດລິບ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube