ດ່ວນ…! ອູແກຣນປະກາດກົດໄອຍະການເສິກ ໃນເຂດແຂວງທີ່ຕິດກັບລັດເຊຍ

ສຳນັກຂ່າວຕ່າງປະເທດລາຍງານ 27 ພະຈິກ 2018 ວ່າ: ສະພາແຫ່ງຊາດອູແກຣນ ມີມະຕິໃນກອງປະຊຸມວາລະສຸກເສີນເມື່ອວັນຈັນ ທີ່ຜ່ານມາ ອະນຸມັດຄຳຮ້ອງຂອງທ່ານ ເປໂຕຣ ໂປໂຣເຊນໂກ ປະທານປະເທດ ໃນການບັງຄັບໃຊ້ກົດໄອຍະການເສິກຄວບຄຸມ 10 ຈາກ 27 ແຂວງທົ່ວປະເທດ ເປັນເວລາຢ່າງໜ້ອຍ 30 ວັນ ນັບຕັ້ງແຕ່ວັນພຸດ 28 ພະຈິກ ນີ້ເປັນຕົ້ນໄປ ໂດຍພື້ນທີ່ໆຢູ່ພາຍໃຕ້ກົດໄອຍະການເສິກສ່ວນໃຫຍ່ມີຊາຍແດນຕິດກັບລັດເຊຍ, ເບລາຣຸດຊີ ແລະ ໂມນດາວີ, ເຖິງຢ່າງໃດກໍ່ຕາມ ນະຄອນຫຼວງຄຽບ ບໍ່ໄດ້ຢູ່ພາຍໃຕ້ກົດໄອຍະການເສິກດັ່ງກ່າວ.

ທ່ານ ເປໂຕຣ ໂປໂຣເຊນໂກ ໃຫ້ເຫດຜົນປະກອບການຕັດສິນໃຈຂໍໃຫ້ສະພາອະນຸມັດໃຊ້ກົດໄອຍະການເສິກ ວ່າກ່ຽວຂ້ອງກັບໄພຮຸກຮານຮ້າຍແຮງຈາກປະຕິບັດການພາກພື້ນດິນ ທີ່ມີຕໍ່ອູແກຣນ ໂດຍປະຕິເສດລົງເລິກລາຍລະອຽດ ແລະ ຢືນຢັນວ່າກົດໄອຍະການເສິກ ບໍ່ແມ່ນການປະກາດສົງຄາມ ແຕ່ຄືການຍົກລະດັບມາດຕະການດ້ານຄວາມໝັ້ນຄົງຂອງອູແກຣນ ໃນການປົກປ້ອງອະທິປະໄຕຂອງຊາດຈາກລັດເຊຍ.

(Photo by Emmanuel DUNAND / AFP)

ໃນດ້ານຂອງທ່ານ ເຢນ ສະໂຕນເທນເບິກ ເລຂາທິການອົງການສົນທິສັນຍາອາກລັງຕິກເໜືອ (NATO) ກ່າວວ່າ ເຖິງແມ່ນວ່າອູແກຣນບໍ່ໄດ້ເປັນສະມາຊິກຂອງ NATO ແຕ່ສະຫະພາບທາງທະຫານແຫ່ງນີ້ມີຄວາມພ້ອມສະໜັບສະໜູນໃນຖານະພັນທະມິດ, ເຖິງຢ່າງໃດກໍ່ຕາມ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວວ່າບັນຍາກາດຂອງສາຍພົວພັນລະຫວ່າງລັດເຊຍ ກັບ ອູແກຣນໃນຕອນນີ້ມີທ່າທີບໍ່ດີປານໃດ ແລະ ທ່ານຂໍໃຫ້ຄູ່ກໍລະນີຮ່ວມກັນຜ່ອນຄາຍສະຖານະການຜ່ານການເຈລະຈາຕາມຫຼັກການທູດ ແລະ ຫຼີກລ້ຽງການໃຊ້ຄວາມຮຸນແຮງຕໍ່ກັນ, ຂະນະທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວໄປໃນທິດທາງດຽວກັນກັບທ່ານ ໂດໂນ ທຣຳ.

ເຮືອລາດຕະເວນ ຂອງກອງທັບເຮືອອູແກຣນ ທີ່ທາງການລັດເຊຍຢຶດ (ລຳຂວາ)

ຕໍ່ມາກະຊວງການຕ່າງປະເທດລັດເຊຍອອກຖະແຫຼງການກ່ຽວກັບເລື່ອງນີ້ວ່າ: ລັດຖະບານອູແກຣນຍຸຍົງ ແລະ ເຈດຕະນາປະກາດກົດໄອຍະການເສິກໃນຕອນນີ້ ເພື່ອໂອນອ່ຽງຄວາມສົນໃຈຈາກການເລືອກຕັ້ງປະທານປະເທດໃນເດືອນມີນາ 2019 ທີ່ຈະມາເຖິງ, ທີ່ທ່ານ ເປໂຕຣ ໂປໂຣເຊນໂກ ມີທ່າອ່າງວ່າຈະເປັນຝ່າຍແພ້, ເຊິ່ງສະຖານະການຄວາມເຕັ່ງຕຶງເກີດຂຶ້ນເມື່ອສຳນັກງານຄວາມໝັ້ນຄົງແຫ່ງລັດ (FSB) ຂອງລັດເຊຍລາຍງານວ່າ ໄດ້ຢຶດເຮືອລາດຕະເວນ 3 ລຳຂອງກອງທັບເຮືອອູແກຣນ ທີ່ລະເມີດນ່ານນ້ຳບໍລິເວນຊ່ອງແຄບເຄິສ ເຊິ່ງເປັນເສັ້ນທາງເດີນເຮືອເສັ້ນທາງດຽວທີ່ລັດເຊຍ ແລະ ອູແກຣນໃຊ້ຮ່ວມກັນ ໃນການຜ່ານເຂົ້າສູ່ທະເລອາຊັອບ ເມື່ອວັນອາທິດ ທີ່ຜ່ານມາ ໂດຍການປະເຊີນໜ້າສົ່ງຜົນໃຫ້ມີລູກເຮືອຂອງອູແກຣນໄດ້ຮັບບາດເຈັບ ແຕ່ທັງສອງປະເທດໃຫ້ຂໍ້ມູນບໍ່ກົງກັນວ່າມີຈັກຄົນ.

ເຖິງແມ່ນວ່າສົນທິສັນຍາສອງຝ່າຍ ເມື່ອປີ 2000 ລະບຸວ່າຊ່ອງແຄບເຄິສ ແລະ ທະເລອາຊັອບ ເປັນນ່ານນ້ຳໃກ້ກັບແຫຼມໄຄຼເມຍ ທີ່ລັດເຊຍ ແລະ ອູແກຣນໃຊ້ຮ່ວມກັນ ແຕ່ລັດເຊຍກ່າວວ່າການທີ່ອູແກຣນບໍ່ແຈ້ງລ່ວງໜ້າຈະເດີນເຮືອຜ່ານກ້ອງຂົວຂ້າມຊ່ອງແຄບທີ່ລັດເຊຍກໍ່ສ້າງສຳເລັດໃນປີນີ້ ຖືເປັນການລະເມີດຈຶ່ງຈຳເປັນຕ້ອງມີການຢຶດເຮືອ.

HTML tutorial