ລັດເຊຍເສີມກຳລັງອາວຸດເບື້ອງຕາເວັນຕົກ ພ້ອມທັງເຕືອນອູແກຣນທີ່ປະກາດກົດໄອຍະການເສິກໂດຍບໍ່ໄຕ່ຕອງ

ສຳນັກຂ່າວຕ່າງປະເທດລາຍງານ 28 ພະຈິກ 2018 ວ່າ: ທຳນຽບເຄຣມລິນ (ທຳນຽບປະທານປະເທດລັດເຊຍ) ເຜີຍແຜ່ບົດສົນທະນາທາງໂທລະສັບລະຫວ່າງທ່ານ ວະລາດິເມຍ ປູຕິນ ປະທານປະເທດລັດເຊຍ ກັບ ທ່ານ ນາງ ອັງເກລາ ແມເຄິ ນາຍົກລັດຖະມົນຕີເຢຍລະມັນ ເມື່ອວັນອັງຄານ ທີ່ຜ່ານມາ ມີເນື້ອໃນສຳຄັນວ່າ ຜູ້ນຳລັດເຊຍມີຄວາມເປັນຫ່ວງຢ່າງຍິ່ງ ຕໍ່ກັບການທີ່ອູແກຣນປະກາດກົດໄອຍະການເສິກເປັນເວລາຢ່າງໜ້ອຍ 30 ວັນ ຄວບຄຸມພື້ນທີ່ສ່ວນໃຫຍ່ໃນພາກຕາເວັນອອກຂອງປະເທດ ທີ່ມີຊາຍແດນຕິດກັບລັດເຊຍ ໂດຍທ່ານ ປູຕິນ ຕີລາຄາວ່າທ່ານ ໂປໂຕຣ ໂປໂຣເຊນໂກ ປະທານປະເທດອູແກຣນໃຊ້ບັນຫາດັ່ງກ່າວເປັນເຄື່ອງມືທາງການເມືອງ ເພື່ອຫາສຽງກັບປະຊາຊົນໃນການເລືອກຕັ້ງທີ່ຈະເກີດຂຶ້ນໃນເດືອນມີນາ 2019 ທີ່ຈະມາເຖິງ.

(Photo by STR / AFP)

ຂະນະດຽວກັນ, ຜູ້ນຳລັດເຊຍໄດ້ວິຈານກົດໄອຍະການເສິກຂອງອູແກຣນວ່າ ເປັນການຕັດສິນໃຈທີ່ຂາດການໄຕ່ຕອງຢ່າງຮອບຄອບ ແລະ ຫວັງເປັນຢ່າງຍິ່ງວ່າເຢຍລະມັນຈະສາມາດທ່ວງດຶງອູແກຣນໄວ້ໄດ້, ເຖິງຢ່າງໃດກໍ່ຕາມ ທ່ານ ປູຕິນ ຫຼີກລ້ຽງທີ່ຈະກ່າວໂດຍກົງເຖິງກໍລະນີທີ່ກອງທັບລັດເຊຍປະເຊີນໜ້າກັບເຮືອຮົບ 3 ລຳຂອງອູແກຣນ ຢູ່ບໍລິເວນຂົວຂ້າມຊ່ອງແຄບເຄິສ ທີ່ທະເລອາຊັອບ ເມື່ອວັນອາທິດທີ່ຜ່ານມາ ຈົນເກີດການປະເຊີນໜ້າ ແລະ ມີທະຫານອູແກຣນໄດ້ຮັບບາດເຈັບຈຳນວນໜຶ່ງ ກ່ອນທີ່ລັດເຊຍຢຶດເຮືອທັງສາມລຳພ້ອມທັງຄວບຄຸມຕົວລູກເຮືອຊາວອູແກຣນທັງ 24 ຄົນ ເພື່ອດຳເນີນອະດິອາຍາ ໂດຍສື່ທ້ອງຖິ່ນຂອງທັງສອງປະເທດເຜີຍແຜ່ພາບຖ່າຍລູກເຮືອບາງສ່ວນ ທີ່ຂະນະກຳລັງເດີນທາງໄປຂຶ້ນສານ ແລະ ຢູ່ໃນຫ້ອງຂັງ.

ໃນດ້ານຂອງທ່ານ ເປໂຕຣ ໂປໂຣເຊນໂກ ປະທານປະເທດອູແກຣນ ກ່າວວ່າອູແກຣນ ແລະ ລັດເຊຍກຳລັງປະເຊີນກັບຄວາມສ່ຽງທີ່ຈະເກີດສົງຄາມເຕັມຮູບແບບ ແລະ ອ້າງວ່າພົບການເຄື່ອນໄຫວທາງທະຫານຂອງລັດເຊຍ ທີ່ເພີ່ມຂຶ້ນຢ່າງຊັດເຈນຕະຫຼອດແນວຊາຍແດນເບື້ອງຕາເວັນຕົກຂອງລັດເຊຍ ທີ່ຕິດກັບພາກຕາເວັນອອກຂອງອູແກຣນ, ສ່ວນທ່ານ ພາຟໂລ ຄລິມກິນ ລັດຖະມົນຕີກະຊວງການຕ່າງປະເທດອູແກຣນ ປຽບລູກເຮືອທັງ 24 ຄົນຄືຊະເລີຍເສິກ ໂດຍສານທີ່ເມືອງຊິມເຟິໂຣໂພນໃນໄຄຣເມຍສັ່ງກັກຂັງລູກເຮືອ 15 ຄົນໄວ້ 2 ເດືອນເພື່ອລໍຖ້າການສືບສວນ ແຕ່ໃນຈຳນວນນີ້ 3 ຄົນຕ້ອງໄດ້ເຂົ້າຮັບການປິ່ນປົວຢູ່ໂຮງໝໍ ແລະ ລູກເຮືອອີກ 9 ຄົນມີກຳນົດທີ່ຈະນຳຕົວຂຶ້ນສານໃນໄວໆນີ້.

(Photo by Sega VOLSKII / AFP)

ເຊິ່ງຄວາມຂັດແຍ່ງໃໝ່ລະຫວ່າງລັດເຊຍ ກັບ ອູແກຣນທີ່ມີຄວາມເຄັ່ງຕຶງມາຕັ້ງແຕ່ກໍລະນີແຫຼມໄຄຣເມຍ ເມື່ອປີ 2014 ເກີດຂຶ້ນຈາກການທີ່ສຳນັກງານຄວາມໝັ້ນຄົງແຫ່ງລັດ (FSB) ເຊິ່ງເປັນໜ່ວຍງານຂ່າວກອງທີ່ມີໜ້າທີ່ຄວບຄຸມຊາຍແດນ ໄດ້ຢຶດເຮືອທັງ 3 ລຳຂອງອູແກຣນທີ່ແລ່ນຜ່ານກ້ອງຂົວຂ້າມຊ່ອງແຄບເຄິສ ທີ່ລັດເຊຍກໍ່ສ້າງສຳເລັດໃນປີນີ້ ໂດຍບໍ່ມີການແຈ້ງລ່ວງໜ້າ ເຊິ່ງທ່ານ ເຊີເກ ລາວະຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວວ່າໃນຄວາມເປັນຈິງການປະເຊີນໜ້າດັ່ງກ່າວບໍ່ຄວນເກີດຂຶ້ນ ຖ້າລັດຖະບານອູແກຣນປະຕິບັດຕາມຂໍ້ຕົກລົງ.

HTML tutorial