ລັດເຊຍຕິດຕັ້ງ S-400 ທີ່ໄຄຣເມຍ ທ່າມກາງຄວາມເຄັ່ງຕຶງກັບອູແກຣນ ທີ່ເພີ່ມທະວີສູງຂຶ້ນ

ສຳນັກຂ່າວຕ່າງປະເທດລາຍງານ 30 ພະຈິກ 2018 ວ່າ: ກອງພັນທີ 4 ກອງທັບລັດເຊຍ, ໄດ້ນຳເອົາລະບົບປ້ອງກັນໄພທາງອາກາດ S-400 ໄປຕິດຕັ້ງໃນເມືອງດີຊານກອຍ ແຫຼມໄຄຣເມຍ ເມື່ອວັນພະຫັດ ທີ່ຜ່ານມາ ຕາມຄຳສັ່ງຂອງກະຊວງປ້ອງກັນປະເທດລັດເຊຍ ເຊິ່ງການເຄື່ອນໄຫວດັ່ງກ່າວເກີດຂຶ້ນທ່າມກາງຄວາມເຄັ່ງຕຶງທີ່ໄດ້ເພີ່ມທະວີສູງຂຶ້ນລະຫວ່າງລັດເຊຍ ກັບ ອູແກຣນ ຈາກກໍລະນີທີ່ລັດເຊຍຢຶດເຮືອລາດຕະເວນ 3 ລຳຂອງກອງທັບອູແກຣນ ທີ່ລະເມີດນ່ານນ້ຳບໍລິເວນຊ່ອງແຄບເຄິສ ເຊິ່ງເປັນເສັ້ນທາງເດີນເຮືອທາງດຽວທີ່ລັດເຊຍ ແລະ ອູແກຣນໃຊ້ຮ່ວມກັນ ໃນການຜ່ານເຂົ້າສູ່ທະເລອາຊັອບ ເມື່ອວັນອາທິດ (25 ພະຈິກ) ທີ່ຜ່ານມາ.

PHOTO: Sergei Malgavko/TASS

ຈາກກໍລະນີດັ່ງກ່າວ, ເມື່ອວັນທີ 26 ພະຈິກ 2018 ສະພາແຫ່ງຊາດອູແກຣນໄດ້ມີມະຕີໃນກອງປະຊຸມວາລະສຸກເສີນ ອະນຸມັດຄຳຮ້ອງຂອງທ່ານ ເປໂຕຣ ໂປໂຣເຊນໂກ ປະທານປະເທດອູແກຣນ ໃນການປະກາດກົດໄອຍະການເສິກຄວບຄຸມພື້ນທີ່ເບື້ອງຕາເວັນອອກຂອງປະເທດ ທີ່ມີຊາຍແດນຕິດກັບລັດເຊຍ ເປັນເວລາຢ່າງໜ້ອຍ 30 ວັນ ອັນໄດ້ເຮັດໃຫ້ບັນຍາກາດສາຍພົວພັນລະຫວ່າງລັດເຊຍ ແລະ ອູແກຣນ ກັບເຂົ້າສູ່ພາລະເຄັ່ງຕຶງອີກຄັ້ງ.

- Advertisement -