ນະຄອນຫຼວງປາຣີສລຸກເປັນໄຟ ຂະບວນການປະທ້ວງຈູດເຜົາຕໍ່ຕ້ານນະໂຍບາຍຂຶ້ນພາສີນ້ຳມັນ (ວິດີໂອ)

ສຳນັກຂ່າວຕ່າງປະເທດລາຍງານ 2 ທັນວາ 2018 ວ່າ: ທ່ານ ເອມມານູເອວ ມາຄຣົງ ປະທານປະເທດຝຣັ່ງ ຖະແຫຼງຜ່ານສະຖານີໂທລະພາບແຫ່ງຊາດ ເມື່ອວັນເສົາທີ່ຜ່ານມາວ່າ ທ່ານເຄົາລົບສິດ ແລະ ເສລີພາບຂອງປະຊາຊົນຝຣັ່ງທຸກຄົນໃນການສະແດງອອກທາງການເມືອງຫາກບໍ່ເຫັນດີກັບນະໂຍບາຍເລື່ອງໃດກໍ່ຕາມຂອງລັດຖະບານ ແຕ່ຕ້ອງເປັນໄປດ້ວຍຄວາມສະຫງົບ ໂດຍຜູ້ນຳຝຣັ່ງໄດ້ປະນາມເຫດການປະທ້ວງຕໍ່ຕ້ານລັດຖະບານທີ່ເກີດຂຶ້ນຕໍ່ເນື່ອງເປັນອາທິດທີ່ສາມ ຈົນບານປາຍກາຍເປັນການຈະລາຈົນ ແລະ ມີການປະທະກັນຢ່າງດຸເດືອນທົ່ວປະເທດ.

ໂດຍສະຖານະການທີ່ຮຸນແຮງທີ່ສຸດຄືບໍລິເວນຊັອງເຊລີເຊ ສະຖານທີ່ທີ່ລັດຖະບານປະກາດໃຫ້ເປັນພື້ນທີ່ອ່ອນໄຫວ ຫ້າມບໍ່ໃຫ້ມີການຈັດກິດຈະກຳທາງການເມືອງທຸກຮູບແບບຫາກບໍ່ໄດ້ຮັບອະນຸຍາດ ແຕ່ຍັງຄົງມີການເດີນຂະບວນ ແລະ ປະທະກັນຢ່າງດຸເດືອດກັບເຈົ້າໜ້າທີ່ຕຳຫຼວດປາບຈະລາຈົນ, ໂດຍຜູ້ນຳຝຣັ່ງກ່າວວ່າ ຈະບໍ່ມີທາງຍອມຮັບກັບສິ່ງທີ່ເກີດຂຶ້ນ ແລະ ຢືນຢັນວ່າລັດຖະບານຈະບໍ່ປ່ຽນຈຸດຢືນເລື່ອງການຂຶ້ນພາສີນ້ຳມັນເຊື້ອໄຟ ເຊິ່ງທ່ານ ເອມມານູເອວ ມາຄຣົງຢ້ຳວ່າ ເພື່ອເປັນການກະຕຸ້ນໃຫ້ປະຊາຊົນຫັນມາໃຊ້ພະລັງງານສະອາດ ແລະ ເປັນການເພີ່ມຄວາມເຂົ້າໃຈເຖິງຜົນກະທົບຈາກສິ່ງແວດລ້ອມໃຫ້ຫຼາຍຂຶ້ນ.

ເຖິງຢ່າງໃດກໍ່ຕາມ, ປັດຈຸບັນປະຊາຊົນຝຣັ່ງຍັງຄົງໃຊ້ນ້ຳມັນເຊື້ອໄຟເປັນຫຼັກ ເຊິ່ງລາຄານ້ຳມັນແອັດຊັງຕອນນີ້ມີລາຄາ 2.9 ເຊນ (ເອີໂຣ) ຕໍ່ລິດ (ປະມານ 2,800 ກີບ) ແລະ ລາຄານ້ຳມັນກາຊວນລິດລະ 6.5 ເຊນ (ເອີໂຣ) (ປະມານ 6,400 ກີບ) ເຊິ່ງຖືເປັນລາຄາທີ່ສູງທີ່ສຸດໃນຮອບ 18 ປີ ແລະ ເພີ່ມຂຶ້ນຈາກອັດຕາປົກກະຕິໃນຮອບ 12 ເດືອນທີ່ຜ່ານມາເຖິງ 23% ແລະ ຜູ້ນຳຝຣັ່ງຍັງປະກາດເມື່ອກາງເດືອນທີ່ຜ່ານມາອີກວ່າ ຈະຂຶ້ນລາຄານ້ຳມັນເຊື້ອໄຟອີກໃນປີໜ້າ ອັນໄດ້ສົ່ງຜົນໃຫ້ເກີດການລວມຕົວໃນນາມກຸ່ມແນວຮ່ວມເສື້ອກັກເຫຼືອງ ຕັ້ງແຕ່ຕອນນັ້ນເປັນຕົ້ນມາ.

ຂະນະທີ່ທ່ານ ຄຣິສຕັອບ ຄາສຕາເນີ ລັດຖະມົນຕີກະຊວງປ້ອງກັນຄວາມສະຫງົບຝຣັ່ງ ປະກາດຂະຫຍາຍໄລຍະເວລາປິດການຈະລາຈອນທີ່ຊັອງເຊລີເຊໂດຍບໍ່ມີກຳນົດ ເນື່ອງຈາກເຈົ້າໜ້າທີ່ຍັງບໍ່ສາມາດຄວບຄຸມສະຖານະການໄດ້ໃນບາງຈຸດ ແລະ ຍອມຮັບວ່າສະຖານະການການປະທ້ວງຄັ້ງນີ້ຮຸນແຮງທີ່ສຸດ ນັບຕັ້ງແຕ່ມີການເຄື່ອນໄຫວຕໍ່ຕ້ານລັດຖະບານເມື່ອປີ 2005.

(Photo by Abdulmonam EASSA / AFP)

ໂດຍສະຖານະການການປະທ້ວງທີ່ຮຸນແຮງທີ່ສຸດແມ່ນຢູ່ບໍລິເວນປະຕູໄຊ ເຊິ່ງກຸ່ມຜູ້ປະທ້ວງໄດ້ທຸບທຳລາຍສິ່ງກໍ່ສ້າງ ແລະ ຈຸດໄຟເຜົາທຳລາຍອາຄານຫຼາຍສິບແຫ່ງ ທີ່ລວມເຖິງຮ້ານຄ້າຈຳໜ່ວຍສິນຄ້າລາຄາແພງ ຕະຫຼອດຮອດລົດຫຼາຍສິບຄັນທີ່ຈອດຢູ່ບໍລິເວນນັ້ນ ແລະ ຍັງມີການສີດສີສະເປຂຽນເປັນຄຳກ່າວຕໍ່ຕ້ານລັດຖະບານຕາມກຳແພງ.

ໃນດ້ານຕຳຫຼວດປາບຈະລາຈົນໄດ້ໃຊ້ທັງລົດສີດນ້ຳແຮງດັນສູງ ແລະ ຍິງແກັສນ້ຳຕາ ລວມທັງຍິງປືນລູກຢາງເປັນໄລຍະໆ ເພື່ອຄວບຄຸມສະຖານະການ ໂດຍມີລາຍງານຜູ້ຖືກຈັບກຸມສະເພາະໃນນະຄອນຫຼວງປາຣີສຫຼາຍກວ່າ 220 ຄົນ ແລະ ມີຜູ້ໄດ້ຮັບບາດເຈັບຈາກເຫດປະທະຫຼາຍກວ່າ 110 ຄົນ ລວມເຈົ້າໜ້າທີ່ປະມານ 20 ຄົນ, ສ່ວນຈຳນວນຜູ້ເສຍຊີວິດຈາກການປະທ້ວງນັບຕັ້ງແຕ່ວັນທີ 17 ພະຈິກ ທີ່ຜ່ານມາ ມີ 2 ຄົນ.

(Photo by Alain JOCARD / AFP)

(Photo by Geoffroy VAN DER HASSELT / AFP)

(Photo by Lucas BARIOULET / AFP)

(Photo by Lucas BARIOULET / AFP)


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube