ສ.ອາເມຣິກາ, ຍີ່ປຸ່ນ ແລະ ອິນເດຍ ຈະຮ່ວມມືກັນເພື່ອຄານອຳນາດຈີນ

(Photo by SAUL LOEB / AFP)

ສຳນັກຂ່າວຕ່າງປະເທດລາຍງານ 2 ທັນວາ 2018 ວ່າ: ຜູ້ນຳຝ່າຍຂວາ 3 ປະເທດທີ່ນຳໂດຍທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ, ທ່ານ ນະເຣນທຣາ ໂດດີ ນາຍົກລັດຖະມົນຕີອິນເດຍ ແລະ ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ໄດ້ພົບປະຫາລືກັນນອກຮອບກອງປະຊຸມສຸດຍອດກຸ່ມປະເທດມະຫາອຳນາດເສດຖະກິດໂລກ G20 ທີ່ນະຄອນຫຼວງບົວໂນສໄອເຣສ ປະເທດອາກຊັງຕິນ ເມື່ອວັນທີ 30 ພະຈິກ ທີ່ຜ່ານມາ.

ການປະຊຸມສຸດຍອດ 3 ຝ່າຍດັ່ງກ່າວໃຊ້ພຽງ 15 ນາທີ ເຊິ່ງເປັນການພົບປະທາງສັນຍາລັກຫຼາຍກວ່າການວາງແຜນຍຸດທະສາດ ແລະ ເກີດຂຶ້ນໃນຂະນະທີ່ທັງ 3 ປະເທດມີຄວາມເປັນຫ່ວງຮ່ວມກັນກ່ຽວກັບອິດທິພົນຂອງຈີນທີ່ກຳລັງພົ້ນເດັ່ນໃນເວທີສາກົນ.

ເຊິ່ງຍີ່ປຸ່ນ ແລະ ອິນເດຍຕ່າງກໍ່ມີກໍລະນີຄວາມຂັດແຍ່ງທາງດ້ານດິນແດນມາຢ່າງຍາວນານກັບຈີນ, ຂະນະທີ່ທ່ານ ໂດໂນ ທຣຳ ກໍ່ກົດດັນຈີນຢ່າງໜັກໜ່ວງກ່ຽວກັບການຄ້າ ແລະ ກ້າວຢ້ຳເຖິງຄວາມແຂງກະດ້າງຂອງຈີນຕໍ່ກັບຄວາມຂັດແຍ່ງໃນທະເລຈີນໃຕ້.

ທ່ານ ຊິນໂຊ ອາເບະ ກ່າວວ່າຍີ່ປຸ່ນ, ສະຫະລັດ ອາເມຣິກາ ແລະ ອິນເດຍ ມີຄ່ານິຍົມບົນພື້ນຖານ ແລະ ຜົນປະໂຫຍດທາງຍຸດທະສາດຮ່ວມກັນ ຫາກທັງ 3 ປະເທດຮ່ວມມືກັນ ພວກເຮົາຈະສ້າງຄວາມຈະເລີນຮຸ່ງເຮືອງ ແລະ ສະຖຽນລະພາບໃຫ້ກັບພູມມິພາກ ແລະ ທົ່ວໂລກ.

ທາງດ້ານຂອງທ່ານ ນະເຣນທຣາ ໂມດີ ກ່າວວ່າ ອັກສອນຫຍໍ້ພາສາອັງກິດຕົວທຳອິດຂອງຍີ່ປຸ່ນ, ສະຫະລັດ ອາເມຣິກາ ແລະ ອິນເດຍ ລວມກັນເປັນ ໄຈ (JAI) ໝາຍເຖິງອາຍຸຍືນ ຫຼື ຈະເລີນຮຸ່ງເຮືອງໃນພາສາອິນດີ, ສ່ວນທ່ານ ນາງ ຊາຣາ ແຊນເດີ ໂຄສົກປະຈຳທຳນຽບຂາວ ກ່າວໃນຖະແຫຼງການວ່າ ການປະຊຸມສຸດຍອດ 3 ຝ່າຍທີ່ບົວໂນສໄອເຣສ ຢືນຢັນເຖິງຄວາມສຳຄັນຂອງວິໄສທັດອິນໂດ-ປາຊີຟິກທີ່ເສລີ ແລະ ເປີດກວ້າງ ສຳລັບສະຖຽນລະພາບ ແລະ ຄວາມຈະເລີນຮຸ່ງເຮືອງຂອງໂລກ ແລະ ຜູ້ນຳທັງສາມໄດ້ໃຫ້ຄຳໝັ້ນທີ່ຈະເພີ່ມການຮ່ວມມືສາມຝ່າຍໃຫ້ແໜ້ນແຟ້ນຍິ່ງໆຂຶ້ນ.

ອິນເດຍ ເຖິງແມ່ນວ່າຈະມີຂໍ້ຂັດແຍ່ງທາງດ້ານດິນແດນກັບຈີນມາຫຼາຍທົດສະວັດ ແຕ່ທີ່ຜ່ານມາບໍ່ເຄີຍເຂົ້າຮ່ວມເປັນພັນທະມິດກັບກຸ່ມປະເທດມະຫາອຳນາດໃດໆ, ສ່ວນຄວາມເຄັ່ງຕຶງລະຫວ່າງຈີນ ກັບ ຍີ່ປຸ່ນ ໃນໄລຍະນີ້ແມ່ນໄດ້ຜ່ອນຄາຍລົງແນ່ແລ້ວ ຈາກການທີ່ທ່ານ ຊິນໂຊ ອາເບະ ເດີນທາງຢ້ຽມຢາມນະຄອນຫຼວງປັກກິ່ງ ເມື່ອເດືອນຕຸລາ ທີ່່ຜານມາ ເຊິ່ງເປັນການຢ້ຽມຢາມຈີນແຜ່ນດິນໃຫຍ່ເປັນຄັ້ງທຳອິດໃນຮອບ 7 ປີຂອງນາຍົກລັດຖະມົນຕີຍີ່ປຸ່ນ.