ທ່ານ ປູຕິນກ່າວວ່າ ອູແກຣນບໍ່ມີຄວາມຈິງໃຈ ທີ່ຈະແກ້ໄຂຄວາມຂັດແຍ່ງກັບລັດເຊຍ

(Photo by ALBERTO RAGGIO / AFP)

ສຳນັກຂ່າວຕ່າງປະເທດລາຍງານ 2 ທັນວາ 2018 ວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວເມື່ອວັນເສົາ ທີ່ຜ່ານມາ ພາຍຫຼັງສຳເລັດການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ນະຄອນຫຼວງບົວໂນສໄອເຣສ ປະເທດອາກຊັງຕິນ ໂດຍມີເນື້ອໃນຕອນໜຶ່ງກ່ຽວກັບບັນຫາອູແກຣນ ວ່າສະຖານະການໃນພູມມິພາກດອນບາສ ທີ່ໝາຍເຖິງພາກຕາເວັນອອກຂອງປະເທດອູແກຣນຈະບໍ່ມີທາງສະຫງົບລົງໄດ້ ຕາບໃດທີ່ລັດຖະບານອູແກຣນຄະນະປັດຈຸບັນຍັງຢູ່ໃນອຳນາດ ເນື່ອງຈາກຕະຫຼອດໄລຍະກວ່າ 4 ປີທີ່ຢູ່ໃນອຳນາດ ທ່ານ ເປໂຕຣ ໂປໂຣເຊນໂກ ປະທານປະເທດອູແກຣນ ບໍ່ເຄີຍສະແດງອອກຢ່າງຈິງໃຈ ແລະ ຈິງຈັງວ່າຕ້ອງການແກ້ໄຂຄວາມຂັດແຍ່ງກັບລັດເຊຍ.

ເຊິ່ງສະຖານະການສູ້ຮົບໃນພູມມິພາກດອນບາສທີ່ແກ່ຍາວມາຕັ້ງແຕ່ເດືອນເມສາ 2014 ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 10,000 ຄົນ ຕາມການປະເມີນໂດຍອົງການສະຫະປະຊາຊາດ ແລະ ປະມານ 1 ໃນ 3 ຂອງຜູ້ເສຍຊີວິດເປັນປະຊາຊົນ ເຊິ່ງບັນຍາກາດຄວາມບໍ່ສະຫງົບໃນພາກຕາເວັນອອກຂອງອູແກຣນສົ່ງຜົນໃຫ້ລັດຖະບານອູແກຣນເພີ່ມງົບປະມານປ້ອງກັນປະເທດຕະຫຼອດໄລຍະທີ່ຜ່ານມາ ຈົນອາດກາຍເປັນການມອງຂ້າມຄວາມສຳຄັນທີ່ແທ້ຈິງຂອງພູມມິພາກ ທີ່ເປັນເຂດອຸດສາຫະກຳສຳຄັນຂອງຊາດ ແລະ ນັບຕັ້ງແຕ່ເກີດເຫດກອງທຶນການເງິນລະຫວ່າງປະເທດ (IMF) ໄດ້ອະນຸມັດເງິນຊ່ວຍເຫຼືອໃຫ້ແກ່ອູແກຣນພຽງເຄິ່ງໜຶ່ງຈາກທັງໝົດຄື 17,500 ໂດລາສະຫະລັດ ໂດຍ IMF ໃຫ້ເຫດຜົນວ່າລັດຖະບານອູແກຣນໃຫ້ຄວາມສຳຄັນກັບການແກ້ໄຂບັນຫາເສດຖະກິດໃນປະເທດໜ້ອຍເກີນໄປ ເມື່ອທຽບກັບຄວາມຂັດແຍ່ງທາງທະຫານກັບລັດເຊຍ.

ຂະນະດຽວກັນ, ທ່ານ ປູຕິນ ກ່າວຢ້ຳວ່າທະຫານເຮືອອູແກຣນທັງ 24 ຄົນ ທີ່ລັດເຊຍຄວບຄຸມຕົວໄວ້ຕັ້ງແຕ່ອາທິດທີ່ຜ່ານມານັ້ນ ລະເມີດນ່ານນ້ຳບໍລິເວນຊ່ອງແຄບເຄິສ ຂອງທະເລອາຊັອບ ເຊິ່ງຢູ່ພາຍໃຕ້ອະທິປະໄຕຂອງລັດເຊຍ ແລະ ຢືນຢັນວ່າລັດຖະບານລັດເຊຍຈະບໍ່ຕອບໂຕ້ອູແກຣນດ້ວຍການປະກາດກົດໄອຍະການເສິກຕາມຊາຍແດນທີ່ຕິດກັບອູແກຣນ ແລະ ການຫ້າມຜູ້ຊາຍລັດເຊຍອາຍຸລະຫວ່າງ 16-60 ປີເຂົ້າປະເທດອູແກຣນ, ພ້ອມທັງກ່າວອີກວ່າອູແກຣນຍັງບໍ່ເຄີຍຕິດຕໍ່ເພື່ອຂໍເຈລະຈາຕໍ່ຂໍ້ຂັດແຍ່ງດັ່ງກ່າວ.

ເຖິງຢ່າງໃດກໍ່ຕາມ, ໃນເວລາດຽວກັນທ່ານ ເປໂຕຣ ໂປໂຣເຊນໂກ ຖະແຫຼງທີ່ນະຄອນຫຼວງຄຽບ ວ່າທ່ານໄດ້ຮຽກຮ້ອງໃຫ້ທ່ານ ປູຕິນ ປ່ອຍຕົວທະຫານເຮືອອູແກຣນທັງ 24 ຄົນ ພ້ອມເຮືອທັງ 3 ລຳທີ່ລັດເຊຍຢຶດໄປ ແລະ ຂໍເຈລະຈາກັບຜູ້ນຳລັດເຊຍໄປແລ້ວ ແຕ່ບໍ່ໄດ້ຮັບການຕອບສະໜອງ, ແຕ່ທ່ານ ເປໂຕຣ ໂຊໂຣເຊນໂກ ຫຼີກລ້ຽງທີ່ຈະກ່າວເຖິງບັນຫາທີ່ວ່າ ຕົນຜິດຫວັງຫຼືບໍ່ ຕໍ່ທ່າທີຂອງຕາເວັນຕົກທີ່ມີຕໍ່ສະຖານະການໃນທະເລອາຊັອບ ຈາກການທີ່ອົງການສົນທິສັນຍາອາກລັງຕິກເໜືອ (NATO) ບໍ່ຕອບສະໜອງຄຳຮຽກຮ້ອງຂອງທ່ານ ໃນການຂໍການຄຸ້ມຄອງທາງທະຫານຈາກ NATO.