ສ.ອາເມຣິກາ ແລະ ຈີນ ຢຸດຕິສົງຄາມການຄ້າລະຫວ່າງກັນເປັນເວລາ 90 ວັນ

(Photo by SAUL LOEB / AFP)

ສຳນັກຂ່າວຕ່າງປະເທດລາຍງານ 2 ທັນວາ 2018 ວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ທ່ານ ສີ ຈິ້ນຜິງ ປະທານປະເທດຈີນ ໄດ້ພົບປະຫາລື ແລະ ຮັບປະທານອາຫານຮ່ວມກັນ ນອກຮອບກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ນະຄອນຫຼວງບົວໂນສໄອເຣສ ປະເທດອາກຊັງຕິນ ເມື່ອວັນເສົາທີ່ຜ່ານມາ, ເຖິງແມ່ນວ່າຈະບໍ່ມີການຖະແຫຼງຮ່ວມກັນຢ່າງເປັນທາງການ ແຕ່ແຫຼ່ງຂ່າວຈາກທັງສອງຝ່າຍລະບຸວ່າ ຜູ້ນຳສະຫະລັດ ອາເມຣິກາ ແລະ ຜູ້ນຳຈີນ ເຫັນດີຮ່ວມກັນໃນທາງຫຼັກການ ໃນການຢຸດຕິການຕັ້ງກຳແພງພາສີຕໍ່ກັນເປັນເວລາ 90 ວັນ ແລ້ວໃຊ້ໄລຍະເວລາດັ່ງກ່າວໃນການເຈລະຈາກັນຢ່າງມີປະສິດທິພາບ ເພື່ອຜົນປະໂຫຍດຂອງທັງສອງຝ່າຍ ແຕ່ອາດມີການປ່ຽນແປງຫາກການປຶກສາຫາລືໃນໄລຍະດັ່ງກ່າວບໍ່ປະສົບຜົນສຳເລັດ.

ການບັນລຸຂໍ້ຕົກລົງດັ່ງກ່າວ ເຖິງຈະເປັນພຽງການເລີ່ມຕົ້ນແຕ່ໝາຍຄວາມວ່າ ລັດຖະບານສະຫະລັດ ອາເມຣິກາຈະຍັງບໍ່ປັບເພີ່ມອັດຕາພາສີສຳລັບສິນຄ້ານຳເຂົ້າຈາກຈີນມູນຄ່າ 200,000 ລ້ານໂດລາສະຫະລັດ ຈາກອັດຕາປັດຈຸບັນທີ່ 10% ໃຫ້ເພີ່ມເປັນ 25% ນັບຕັ້ງແຕ່ວັນທີ 1 ມັງກອນ 2019 ສ່ວນແຫຼ່ງຂ່າວໃນລັດຖະບານຈີນໃຫ້ຂໍ້ມູນວ່າ ຈີນຈະເພີ່ມການຊື້ສິນຄ້າດ້ານພະລັງງານ, ຜະລິດຕະພັນກະສິກຳ ແລະ ສິນຄ້າອື່ນໆຈາກອາເມຣິກາ ແຕ່ບໍ່ມີການລະບຸປະລິມານ ແລະ ມູນຄ່າຢ່າງຊັດເຈນ ໂດຍລັດຖະບານຈີນຈະຢຸດຕິການໃຊ້ມາດຕະການກຳແພງພາສີຕໍ່ສະຫະລັດ ອາເມຣິກາເຊັ່ນກັນ ຕາບໃດທີ່ອີກຝ່າຍຍັງຄົງຮັກສາຄຳໝັ້ນສັນຍາ.

ເຊິ່ງທ່ານ ໂດໂນ ທຣຳ ໄດ້ຂຶ້ນພາສີຫຼາຍອັດຕາຕໍ່ມູນຄ່າການນຳເຂົ້າສູນຄ້າຂອງຈີນໄປແລ້ວ 250,000 ລ້ານໂດລາສະຫະລັດ ຕັ້ງແຕ່ເດືອນກໍລະກົດ ທີ່ຜ່ານມາ, ຂະນະທີ່ຈີນກໍ່ໄດ້ຕອບໂຕ້ດ້ວຍການຕັ້ງກຳແພງພາສີຕໍ່ສິນຄ້າຂອງສະຫະລັດ ອາເມຣິກາທີ່ມີມູນຄ່າການນຳເຂົ້າຢ່າງໜ້ອຍ 110,000 ລ້ານໂດລາສະຫະລັດ.

ຂະນະທີ່ກຸ່ມສະມາຊິກ G20 ຮ່ວມທັງສະຫະພາບເອີຣົບ ໄດ້ອອກຖະແຫຼງການຮ່ວມກັນໂດຍຍອມຮັບວ່າບັນດາສະມາຊິກ ຍັງມີຈຸດຢືນທີ່ແຕກຕ່າງກັນໃນຫຼາຍບັນຫາ ເຊິ່ງກ່ຽວຂ້ອງກັບການຄ້າ, ສະພາບອາກາດ ແລະ ການປະຕິຮູບອົງການການຄ້າໂລກ (WTO) ໂດຍໃນການປະຊຸມມື້ທຳອິດ ຈີນເຊິ່ງເປັວຫົວເຮືອໃຫຍ່ຂອງກຸ່ມປະເທດເສດຖະກິດບຣິດ ທີ່ມີສະມາຊິກຮ່ວມໄດ້ແກ່: ບຣາຊິນ, ລັດເຊຍ, ອາຟຣິກາໃຕ້ ແລະ ອິນເດຍ ວິຈານມາດຕະການກີດກັນການຄ້າຂອງສະຫະລັດ ອາເມຣິກາຢ່າງໜັກໜ່ວງ ພ້ອມທັງສະແດງການສະໜັບສະໜູນໃນການດຳເນີນງານຂອງອົງການການຄ້າໂລກ.