ກາຕາ ຍື່ນໃບລາອອກຈາກການເປັນສະມາຊິກອົງການ OPEC

(Photo by KARIM JAAFAR / AFP)

ສຳນັກຂ່າວຕ່າງປະເທດລາຍງານ 3 ທັນວາ 2018 ວ່າ: ທ່ານ ຊາອັດ ເຊີຣີດາ ອັນ-ຄາອາບີ ລັດຖະມົນຕີກະຊວງພະລັງງງານກາຕາຖະແຫຼງວ່າ: ລັດຖະບານກາຕາໄດ້ຍື່ນໜັງສືຕໍ່ສຳນັກງານເລຂາທິການອົງການປະເທດຜູ້ສົ່ງອອກນ້ຳມັນ (OPEC) ທີ່ມີສຳນັກງານໃຫຍ່ຢູ່ທີ່ນະຄອນຫຼວງວຽນນາ ປະເທດໂອຕຣິດ, ເພື່ອຂໍລາອອກຈາກການເປັນສະມາຊິກ ເຊິ່ງຈະມີຜົນຕັ້ງແຕ່ວັນທີ 1 ມັງກອນ 2019, ເຊິ່ງກາຕາສະໝັກເຂົ້າເປັນສະມາຊິກ OPEC ເມື່ອປີ 1961 ຫຼື ພຽງປີດຽວພາຍຫຼັງການສ້າງຕັ້ງອົງການດັ່ງກ່າວ.

Saad Sherida Al-Kaabi, Qatari Minister of State for Energy Affairs. (Photo by Anne LEVASSEUR / AFP)

ສຳລັບປັດໄຈທີ່ເປັນຜົນຫຼັກປະກອບການຕັດສິນໃຈການລາອອກ ທ່ານລັດຖະມົນຕີກະຊວງພະລັງງານກາຕາກ່າວວ່າ ກາຕາຕ້ອງການເພີ່ມກຳລັງການຜະລິດແກັດທຳມະຊາດຈາກປັດຈຸບັນ 77 ລ້ານໂຕນຕໍ່ປີ ເປັນປີລະ 110 ລ້ານໂຕນ ພາຍໃນອີກບໍ່ພໍເທົ່າໃດປີຂ້າງໜ້າ, ປັດຈຸບັນກາຕາເປັນປະເທດຜູ້ຜະລິດ ແລະ ສົ່ງອອກແກັດທຳມະຊາດລາຍໃຫຍ່ທີ່ສຸດຂອງໂລກ ດ້ວຍອັດຕາສ່ວນຕະຫຼາດ 30% ນອກຈາກນີ້ລັດຖະບານກາຕາຍັງຮ່ວມບໍລິຫານແຫຼ່ງແກັດທຳມະຊາດ North fields ຮ່ວມກັບອິຣານ ເຊິ່ງຖືເປັນແຫຼ່ງແກັດທຳມະຊາດຂະໜາດໃຫຍ່ທີ່ສຸດຂອງໂລກໃນປັດຈຸບັນ ໂດຍກາຕາຄົ້ນພົບແຫຼ່ງແກັດທຳມະຊາດດັ່ງກ່າວເມື່ອປີ 1971 ກົງກັບປີທີ່ກາຕາເປັນເອກະລາດຈາກອັງກິດ.