ພຶດຕິກຳເສື່ອມ ຫວຽດນາມເປີດສາຍດ່ວນຮັບແຈ້ງຈາກປະຊາຊົນ ຫາກພົບເຫັນຕຳຫຼວດປະຕິບັດບໍ່ຖືກຕ້ອງ

ສຳນັກຂ່າວຕ່າງປະເທດລາຍງານ 4 ທັນວາ 2018 ໂດຍອ້າງອີງຈາກການລາຍງານຂອງສຳນັກຂ່າວແຫ່ງຊາດຫວຽດນາມ (VNA) ວ່າກະຊວງປ້ອງກັນຄວາມສະຫງົບຫວຽດນາມ ໄດ້ເປີດໝາຍເລກໂທລະສັບສາຍດ່ວນ ເພື່ອຮັບການລາຍງານຈາກປະຊາຊົນ ກ່ຽວກັບພຶດຕິກຳທີ່ເປັນການສໍ້ລາດບັງຫຼວງຂອງເຈົ້າໜ້າທີ່ຕຳຫຼວດ.

ເຊິ່ງຜູ້ແຈ້ງຈະຕ້ອງຍິນຍອມເປີດເຜີຍຂໍ້ມູນສ່ວນບຸກຄົນໃນເບື້ອງຕົ້ນແກ່ທາງການ ເພື່ອເພີ່ມຄວາມສະດວກ ແລະ ປະສິດທິພາບໃນການປະຕິບັດໜ້າທີ່ ເຊິ່ງແນ່ນອນວ່າເຈົ້າໜ້າທີ່ຈະຮັກສາຂໍ້ມູນດັ່ງກ່າວເປັນຄວາມລັບຂັ້ນສູງສຸດ, ເຖິງຢ່າງໃດກໍ່ຕາມ ຫາກຂໍ້ມູນບໍ່ເປັນຄວາມຈິງ ຫຼື ເປັນການສ້າງເລື່ອງ ໜ່ວຍງານທີ່ກ່ຽວຂ້ອງຈະຕິດຕາມຕົວຜູ້ແຈ້ງເລື່ອງດັ່ງກ່າວມາຮັບໂທດຕາມກົດໝາຍ ເນື່ອງຈາກຖືເປັນການໝິ່ນປະມາດເຈົ້າໜ້າທີ່.

ການເຄື່ອນໄຫວດັ່ງກ່າວຂອງລັດຖະບານຫວຽດນາມ ເກີດຂຶ້ນພາຍຫຼັງທີ່ສານປະຊາຊົນໃນນະຄອນຫຼວງຮາໂນຍ ມີຄຳຕັດສິນເມື່ອທ້າຍເດືອນທີ່ຜ່ານມາ ໃຫ້ອະດີດຕຳຫຼວດລະດັບສູງ 2 ຄົນ ຮັບໂທດຕິດຄຸກເປັນເວລາ 10 ປີ ໃນຂໍ້ຫາລັກລອບດຳເນີນກິດຈະການເປີດແຫຼ່ງການພະນັນທີ່ຜິດກົດໝາຍ ທີ່ມີປະລິມານເງິນໝຸນວຽນຫຼາຍຮ້ອຍລ້ານໂດລາສະຫະລັດ.