ສ.ອາເມຣິກາໃຫ້ເວລາລັດເຊຍ 60 ວັນ ເພື່ອຍົກເລີກໂຄງການພັດທະນາອາວຸດລຸ້ນໃໝ່

(Photo by Alexander NEMENOV / AFP)

ສຳນັກຂ່າວຕ່າງປະເທດລາຍງານ 5 ທັນວາ 2018 ວ່າ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວໃນລະຫວ່າງການພົບປະຫາລືກັບທ່ານ ເຢນ ສະໂຕນເທນເບິກ ເລຂາທິການອົງການສົນທິສັນຍາອາກລັງຕິກເໜືອ (NATO) ນອກຮອບກອງປະຊຸມລັດຖະມົນຕີກະຊວງການຕ່າງປະເທດຂອງສະມາຊິກອົງການ NATO ທັງ 29 ປະເທດ ທີ່ນະຄອນຫຼວງຣັສເຊວ ປະເທດແບນຊິກ ເມື່ອວັນອັງຄານທີ່ຜ່ານມາວ່າ: ລັດຖະບານສະຫະລັດ ອາເມຣິກາໄດ້ແບ່ງປັນຂໍ້ມູນລັບບາງສ່ວນຕໍ່ອົງການ NATO ກ່ຽວກັບໂຄງການພັດທະນາຂີປະນາວຸດນຳວິຖີຈາກພື້ນສູ່ພື້ນ ພາຍໃຕ້ລະຫັດ SSC-8 ຫຼື 9M729 ເຊິ່ງເປັນໂຄງການພັດທະນາອາວຸດລຸ້ນໃໝ່ຂອງລັດເຊຍ ທີ່ມີລັດສະໝີການທຳລາຍພຽງພໍທີ່ຈະໂຈມຕີພື້ນທີ່ທຸກແຫ່ງໃນເອີຣົບ.

U.S. Secretary of State Mike Pompeo (L) speaks with NATO Secretary General Jens Stoltenberg prior to a meeting at NATO heaquarters in Brussels on December 4, 2018. (Photo by Francisco Seco / POOL / AFP)

ເຊິ່ງທ່ານ ໄມ ພອມແພວ ກ່າວຢ້ຳວ່າໂຄງການດັ່ງກ່າວຂອງລັດເຊຍ ຖືເປັນການລະເມີດສົນທິສັນຍາອາວຸດນິວເຄຼຍພິໄສກາງ (INF) ທີ່ລົງນາມຮ່ວມກັນເມື່ອ ປີ 1987 ຢ່າງຊັດເຈນ, ເນື່ອງຈາກເນື້ອໃນສຳຄັນຂອງຂໍ້ຕົກລົງດັ່ງກ່າວຄືການຫ້າມທັງສອງປະເທດຜະລິດ ແລະ ທົດລອງຂີປະນາວຸດທີ່ມີໄລຍະການຍິງລະຫວ່າງ 500-5,500 ກິໂລແມັດ, ຂະນະດຽວກັນ ເຖິງແມ່ນວ່າທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ປະກາດເມື່ອເດືອນຕຸລາ ທີ່ຜ່ານມາວ່າ ທ່ານຈະນຳສະຫະລັດ ອາເມຣິກາຖອນຕົວອອກຈາກການເປັນພາຄີຂອງ INF ແຕ່ສະຫະລັດ ອາເມຣິກາ ພ້ອມ ແລະ ຍິນດີປ່ຽນແປງທ່າທີ ຫາກລັດເຊຍຢຸດຕິໂຄງການພັດທະນາ SSC-8 ພາຍໃນໄລຍະເວລາ 60 ວັນ ເລີ່ມຕັ້ງແຕ່ວັນທີ 1 ມັງກອນ 2019 ແລະ ຢືນຢັນວ່າ ສະຫະລັດ ອາເມຣິກາຢຶດໝັ້ນຕາມຂໍ້ຕົກລົງ INF ຕະຫຼອດໄລຍະເວລາກວ່າ 30 ປີທີ່ຜ່ານມາ ແຕ່ບໍ່ໄດ້ກ່າວວ່າສະຫະລັດ ອາເມຣິກາຈະດຳເນີນມາດຕະການໃດເມື່ອຜ່ານພົ້ນເສັ້ນຕາຍ 60 ວັນ.

ຂະນະທີ່ກະຊວງການຕ່າງປະເທດລັດເຊຍ ອອກຖະແຫຼງການກ່ຽວກັບບັນຫາດັ່ງກ່າວພຽງແຕ່ວ່າ ໄລຍະການຍິງຂອງຂີປະນາວຸດດັ່ງກ່າວຍັງບໍ່ເຖິງ 500 ກິໂລແມັດ, ເຖິງຢ່າງໃດກໍ່ຕາມ ເປັນທີ່ໜ້າສັງເກດວ່າ NATO ຍັງຮັກສາທ່າທີຕໍ່ຄຳຮ້ອງຂໍຂອງອູແກຣນ ທີ່ຕ້ອງການການຄຸ້ມຄອງທາງທະຫານຈາກ NATO ດ້ວຍການສົ່ງກອງເຮືອຮົບເຂົ້າສູ່ທະເລອາຊັອບ ເຊິ່ງກຳລັງເປັນພື້ນທີ່ແຫ່ງຄວາມຂັດແຍ່ງກັບລັດເຊຍ ແລະ ຄຳຖະແຫຼງຂອງທ່ານ ໄມ ພອມແພວ ເກີດຂຶ້ນພຽງວັນດຽວ ພາຍຫຼັງທີ່ທ່ານ ໂດໂນ ທຣຳ ກ່າວວ່າທ່ານຕ້ອງການປຶກສາຫາລືກັບທັງລັດເຊຍ ແລະ ຈີນ ເພື່ອສ້າງຄວາມເຂົ້າໃຈໃນເລື່ອງການແຂ່ງຂັນດ້ານອາວຸດ.