ສປປ.ລາວ-ກຳປູເຈຍ ຈະສືບຕໍ່ປະຕິບັດຕາມ 3 ເງື່ອນໄຂ ໃນການແກ້ໄຂບັນຫາຊາຍແດນຮ່ວມກັນ

ໂດຍຕອບສະໜອງຕາມຄຳເຊີນຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ.ລາວ, ສົມເດັດ ອັກຄະມະຫາເສນາບໍດີ ເຕໂຈ ຮຸນ ເຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ.ລາວ ຢ່າງເປັນທາງການ ໃນລະຫວ່າງວັນທີ 05-06 ທັນວາ  2018. ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນຢ່າງສົມກຽດ ທີ່ ສໍານັກງານນາຍົກລັດຖະມົນຕີ ໃນຕອນເຊົ້າ ຂອງວັນທີ 05 ທັນວາ 2018 ໂດຍມີບັນດາການນຳຂັ້ນສູງຂອງ ສປປ.ລາວ ເຂົ້າຮ່ວມຢ່າງພ້ອມພຽງ.

PHOTO: Lao Government office

ພາຍຫຼັງສຳເລັດພິທີຕ້ອນຮັບທາງການ, ທັງສອງນາຍົກລັດຖະມົນຕີ ໄດ້ນຳພາຄະນະຜູ້ແທນຂັ້ນສູງ ເຂົ້າຮ່ວມກອງປະຊຸມພົບປະສອງຝ່າຍ, ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການທີ່ພົ້ນເດັ່ນຂອງສອງປະເທດ ພ້ອມທັງທົບທວນຄືນ ການຮ່ວມມືສອງຝ່າຍໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ. ພ້ອມດຽວກັນນັ້ນ, ສອງຝ່າຍຍັງໄດ້ປຶກສາຫາລືກັນດ້ວຍບັນຍາກາດສະໜິດສະໜົມ ກ່ຽວກັບ ການຮ່ວມມືສອງຝ່າຍໃນດ້ານຕ່າງໆຕື່ມອີກ ເຊັ່ນ: ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານກົງສຸນ, ດ້ານໂຍທາທິການ ແລະ ຂົນສົ່ງ, ດ້ານວັດທະ ນະທໍາ ແລະ ທ່ອງທ່ຽວ, ດ້ານການຄ້າ ແລະ ການລົງທຶນ, ບັນຫາຊາຍແດນ ແລະ ການຮ່ວມມື ໃນຂອບວຽກງງານດ້ານເສດຖະກິດພູມີພາກ (ເຂດສາມຫຼ່ຽມເສດຖະກິດ CLV). ພ້ອມນັ້ນ, ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນ ຕໍ່ບັນຫາພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈຮ່ວມກັນ. ໂອກາດນີ້, ທ່ານນາຍົກລັດຖະມົນຕີຮຸນ ເຊນ ໄດ້ເຊື້ອເຊີນ ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະ ເດີນທາງໄປຢ້ຽມຢາມຣາຊະອານາຈັກກໍາປູເຈຍາງການ ໃນປີ 2019.

PHOTO: Lao Government office

ພາຍຫຼັງສຳເລັດການພົບປະສອງຝ່າຍ, ສອງນາຍົກລັດຖະມົນຕີ ໄດ້ເຂົ້າຮ່ວມເປັນສັກຂີພິຍານ ໃນການລົງນາມເອກະສານ ຈໍານວນ 4 ສະບັບ ຄື:
1). ບົດບັນທຶກຄວາມເຂົ້າໃຈ ລະຫວ່າງ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງ ຣາຊະອານາຈັກ ກຳປູເຈຍ ວ່າດ້ວຍການຮ່ວມມືດ້ານ ວັດທະນະທຳ ແລະ ສີລະປະກຳ ສົກປີ 2019-2021;

2).ສັນຍາ ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງສຶກສາ, ຊາວໜຸ່ມ ແລະ ກິລາ ແຫ່ງ ຣາຊະອານາຈັກ ກໍາປູເຈຍ ວ່າດ້ວຍການຮ່ວມມືດ້ານການສຶກສາ ໃນໄລຍະປີ 2019-2023;

3). ບົດບັນທຶກຄວາມເຂົ້າໃຈ ລະຫວ່າງ ກະຊວງກຳສິກຳ ແລະ ປ່າໄມ້ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງກະສິກຳ, ປ່າໄມ້ ແລະ ການປະມົງ ຣາຊະອານາຈັກ ກຳປູເຈຍ ວ່າດ້ວຍການສົ່ງຊ້າງລ້ຽງໄປສະແດງສີລະປະ ແລະ ແລກປ່ຽນວັດທະນະທຳ ທີ່ສວນສັດຊາຟາຣີ ນະຄອນຫຼວງພະນົມເປັນ ຣາຊະອານາຈັກກຳປູເຈຍ; ແລະ

4). ບົດບັນທຶກຄວາມເຂົ້າໃຈ ລະຫວ່າງ ລັດວິສາຫະກິດໄຟຟ້າລາວ ແລະ ໄຟຟ້າກຳປູເຈຍ ກ່ຽວກັບສັນຍາຊື້ຂາຍໄຟຟ້າແຮງສູງຂະໜາດ 230 kV ແລະ 500 kV ຈາກ ສະຖານີໄຟຟ້າບ້ານຫາດ, ສປປ ລາວ ຫາ ສະຖານີໄຟຟ້າ ສະຕຣອງ ແຕຣງ, ກຳປູເຈຍ.

PHOTO: Lao Government office

ພາຍຫຼັງສຳເລັດພິທີລົງນາມເອກະສານ, ກໍ່ໄດ້ມີຖະແຫຼງການຮ່ວມ ຂອງສອງນາຍົກລັດຖະມົນຕີ, ທັງສອງຝ່າຍຕ່າງກໍ່ໄດ້ຢືນຢັນຄືນເຖິງຄວາມມຸ່ງໝັ້ນ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ ທີ່ເປັນມູນເຊື້ອ ແລະ ການຮ່ວມມືທີ່ດີ ທີ່ມີມາແຕ່ດົນນານ ລະຫວ່າງ ສອງປະເທດ ກໍ່ຄືສອງລັດຖະບານ ໃຫ້ນັບມື້ແໜ້ນແຟ້ນຍິ່ງໆຂຶ້ນ ບົນພື້ນຖານເຄົາລົບອະທິປະໄຕ, ຄວາມສະເໝີພາບ, ຕ່າງຝ່າຍຕ່າງມີຜົນປະໂຫຍດຮ່ວມກັນ. ສອງຝ່າຍໄດ້ເຫັນດີໃຫ້ບັນດາກະຊວງ ແລະ ຂະແໜງການກ່ຽວຂ້ອງ ສືບຕໍ່ຈັດຕັ້ງປະຕິບັດຕາມເນື້ອໃນສັນຍາ ແລະ ຂໍ້ຕົກລົງຕ່າງໆ ທີ່ສອງຝ່າຍໄດ້ເຊັນກັນຜ່ານມາ ໃຫ້ນັບມື້ແຕກດອກອອກຜົນຫຼາຍຂຶ້ນ ໂດຍຜ່ານກົນໄກການຮ່ວມມືສອງຝ່າຍ ຄື: ຄະນະກໍາມະການຮ່ວມມື ວ່າດ້ວຍການຮ່ວມມືສອງຝ່າຍ ລາວ-ກໍາປູເຈຍ (JC) ກໍ່ຄືກົນໄກຮ່ວມມືອື່ນໆ.

ສອງຝ່າຍໄດ້ເຫັນດີເປັນເອກະພາບກັນ ຊຸກຍູ້ພາກສ່ວນກ່ຽວຂ້ອງ ຈັດຕັ້ງປະຕິບັດຕາມເນື້ອໃນຈິດໃຈ ຂອງການພົບປະ ຂອງສອງນາຍົກລັດຖະມົນຕີລາວ ແລະ ກຳປູເຈຍ 3 ຄັ້ງ ທີ່ຜ່ານມາຄື: ຄັ້ງທີ 1 ຢູ່ ນະຄອນຫຼວງວຽງຈັນ; ຄັ້ງທີ 2 ທີ່ ພະນົມເປັນ ແລະ ຄັ້ງທີ 3 ໃນວັນທີ 13 ກັນຍາ 2018 ທີ່ນະຄອນຫຼວງຮ່າໂນ້ຍ ໂດຍສອງຝ່າຍ ໄດ້ເປັນເອກະພາບກັນແລ້ວວ່າ ບໍລິເວນ ແກ້ງຕໍມໍຄອຍ-ຫ້ວຍຕະເງົາ ເປັນລິເວນຄົງຄ້າງ ທີ່ຍັງບໍ່ທັນໄດ້ຮັບການແກ້ໄຂ, ດັ່ງນັ້ນ ຈຶ່ງໄດ້ເຫັນດີເປັນເອກະພາບກັນ 3 ເງື່ອນໄຂ ຄື: 1. ບໍ່ໃຫ້ມີກຳລັງທະຫານຢູ່ໃນບໍລິເວນນີ້; 2. ບໍ່ໃຫ້ມີປະຊາຊົນອາໄສຢູ່ ຫຼື ດຳເນີນທຸລະກິດຢູ່ບໍລິເວນດັ່ງກ່າວ ແລະ 3. ໃຫ້ມີການກວດກາຮ່ວມກັນ ທັງທາງບົກ, ທາງນໍ້າ ແລະ ທາງອາກາດ. ການກວດກາຮ່ວມສອງຝ່າຍ ແມ່ນສາມາດໃຊ້ກຳລັງຄົນ ຫຼື ເຮືອບິນບໍ່ມີຄົນຂັບ (Drone). ສອງຝ່າຍໄດ້ເຫັນດີ ໃຫ້ຮັກສາສະຖານະພາບເດີມ ໃນບໍລິເວນຊາຍແດນທີ່ຍັງຄົງຄ້າງ ໂດຍປາສະຈາກສິ່ງປຸກສ້າງຕ່າງໆ ທີ່ພາໃຫ້ມີການປ່ຽນແປງສະພາບບໍລິເວນດັ່ງກ່າວ ຈົນກວ່າສອງຝ່າຍຈະສຳເລັດການສຳຫຼວດ ແລະ ປັກຫຼັກໝາຍຊາຍແດນ.