ລັດເຊຍກ່າວວ່າ ສ.ອາເມຣິກາກ່າວຫາແບບລອຍໆ ເລື່ອງໂຄງການອາວຸດລັບ

ສຳນັກຂ່າວຕ່າງປະເທດລາຍງານ 6 ທັນວາ 2018 ວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວເມື່ອວັນພຸດ ທີ່ຜ່ານມາວ່າ: ສະຫະລັດ ອາເມຣິກາປ່າວປະກາດຕັ້ງແຕ່ເດືອນຕຸລາ ທີ່ຜ່ານມາວ່າ ຕ້ອງການຖອນຕົວອອກຈາກການເປັນພາຄີຂອງສົນທິສັນຍາອາວຸດນິວເຄຼຍພິໄສກາງ (INF) ທີ່ລົງນາມເມື່ອປີ 1987 ຫຼື ຕັ້ງແຕ່ສະໄໝສະຫະພາບໂຊວຽດ, ເຖິງຢ່າງໃດກໍ່ຕາມ ຈົນເຖິງທຸກວັນນີ້ລັດຖະບານສະຫະລັດ ອາເມຣິກາກໍ່ຍັງບໍ່ສາມາດຫາເຫດຜົນທີ່ໜ້າເຊື່ອຖືພຽງພໍ ມາຮອງຮັບຄຳກ່າວອ້າງຂອງຕົນເອງໄດ້ ຈຶ່ງເປັນເລື່ອງທຳມະດາທີ່ຕ້ອງຄິດຫາຂໍ້ແກ້ຕົວ ເພື່ອຮັກສາພາບລັກ ນັ້ນກໍ່ຄືການກ່າວຫາວ່າລັດເຊຍເປັນຝ່າຍລະເມີດ ແຕ່ບໍ່ເຄີຍມີການສະແດງຫຼັກຖານຢ່າງຊັດເຈນ.

ເຊິ່ງສະຫະລັດ ອາເມຣິກາ ກຳລັງພະຍາຍາມຢ່າງສຸດຂີດໃນການສ້າງກອບແນວຄິດໃຫ້ກັບຕົວເອງວ່າ ສະຫະລັດ ອາເມຣິກາ ກຳລັງປະເຊີນກັບໄພຮຸກຮານດ້ານຂີປະນາວຸດ ເຊິ່ງມີໄລຍະການຍິງເກີນກວ່າທີ່ກຳນົດໄວ້ໃນ INF ນັ້ນກໍ່ຄືລະຫວ່າງ 500-5,500 ກິໂລແມັດ ແລະ ຍິ່ງສະແດງທ່າທີຢ່າງເປີດເຜີຍຫຼາຍຂຶ້ນວ່າຕ້ອງການພັດທະນາຂີປະນາວຸດໃຫ້ມີໄລຍະການຍິງເໜືອກວ່າທີ່ລະບຸໄວ້ໃນສົນທິສັນຍາ ເຊິ່ງຫາກສະຫະລັດ ອາເມຣິກາຕ້ອງການເຊັ່ນນັ້ນຈິງ ການຕອບສະໜອງຂອງລັດເຊຍບໍ່ແມ່ນເລື່ອງຍາກ ໂດຍລັດເຊຍກໍ່ຈະປະຕິບັດເຊັ່ນດຽວກັນ.

ຂະນະທີ່ທ່ານ ພົນເອກ ວາເລີຣີ ເກຣາຊິມັອບ ປະທານຄະນະເສນາທິການທະຫານຮ່ວມຂອງລັດເຊຍ ກ່າວວ່າຕໍ່ຈາກນີ້ລັດເຊຍຈະຍົກລະດັບຄວາມສາມາດໂຄງການພັດທະນາຂີປະນາວຸດນຳວິຖີຈາກພື້ນສູ່ພື້ນພາຍໃຕ້ລະຫັດ SSC-8 ຫຼື 9M729 ໃຫ້ໄກເກີນກວ່າທີ່ກຳນົດໄວ້ໃນ INF.

ທ່າທີດັ່ງກ່າວຂອງທ່ານ ປູຕິນ ແລະ ທ່ານ ພົນເອກ ເກຣາຊິມັອບ ເກີດຂຶ້ນພາຍຫຼັງທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວເມື່ອວັນອັງຄານ ທີ່ຜ່ານມາວ່າ: ຫາກລັດເຊຍຍອມຢຸດຕິໂຄງການພັດທະນາຂີປະນາວຸດລຸ້ນໃໝ່ພາຍໃນໄລຍະເວລາ 60 ວັນ ເລີ່ມຕັ້ງແຕ່ວັນທີ 1 ມັງກອນ 2019 ລັດຖະບານສະຫະລັດ ອາເມຣິກາຈະຍັງຄົງຮ່ວມເປັນພາຄີຂອງ INF ຕໍ່ໄປ, ໂດຍຫາກບໍ່ໄດ້ຮັບການຕອບສະໜອງຈາກລັດເຊຍ ສະຫະລັດ ອາເມຣິກາຈະພັດທະນາໂຄງການຂີປະນາວຸດຂອງຕົນເອງທັນທີ.

- Advertisement -