ທ່ານນາຍົກ ເນັ້ນໃຫ້ເລັ່ງເຮັດເຮືອນຖາວອນໃຫ້ປະຊາຊົນທີ່ໄດ້ຮັບຜົນກະທົບຈາກເຂື່ອນແຕກ

ສຳນັກງານນາຍົກລັດຖະມົນຕີລາຍງານວ່າ: ເມື່ອວັນທີ 17 ທັນວາ 2018 ທີ່ຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍບັນດາລັດຖະມົນຕີ, ຮອງລັດຖະມົນຕີ ແລະ ຜູ້ຕາງໜ້າ ຈາກກະຊວງ-ອົງການທີ່ກ່ຽວຂ້ອງ ໄດ້ໄປເຄື່ອນໄຫວຢ້ຽມຢາມ ແລະ ພົບປະໂອ້ລົມກັບປະຊາຊົນ ທີ່ຖືກຜົນກະທົບ ຈາກໄພພິບັດນໍ້າຖ້ວມ ທີ່ເມືອງສະໜາມໄຊ, ແຂວງອັດຕະປື.

PHOTO: Lao Government office

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ພົບປະໂອ້ລົມກັບປະຊາຊົນ ຢູ່ຈຸດພັກຊົ່ວຄາວ ຈຸດດົງບາກ, ຈຸດປິນດົງ ແລະ ຈຸດຕະມໍຢອດ ທີ່ໄດ້ຮັບ ຜົນກະທົບຈາກໄພພິບັດນໍ້າຖ້ວມ ໃນທ້າຍເດືອນກໍລະກົດ ທີ່ຜ່ານມາ. ໃນນັ້ນ, ການໄປແຕ່ລະສະຖານທີ່ ທ່ານນາຍົກລັດຖະມົນຕີ ໄດ້ພົບປະໂອ້ລົມ, ມີຄວາມເປັນຫວ່ງເປັນໄຍຕໍ່ປະຊາຊົນ ໂດຍໄດ້ຖາມ ເຖິງສະພາບການດຳລົງຊີວິດຂອງເຂົາເຈົ້າ, ການຮຽນ-ການສອນ ຂອງຄູອາຈານ ແລະ ລູກຫຼານນັກຮຽນ, ຄວາມຄືບໜ້າໃນການແກ້ໄຂ ແລະ ປັບປຸງຊີວິດການເປັນຢູ່ຂອງປະຊາຊົນ ໂດຍສະເພາະແມ່ນ ການສ້າງທີ່ພັກຊົ່ວຄາວ ແລະ ຖາວອນ, ແຜນການປັບປຸງ ແລະ ຟື້ນຟູວຽກງານດ້ານຕ່າງໆ, ລວມທັງການປະເມີນຜົນເສຍຫາຍ, ແຜນການຊົດເຊີຍຜົນເສຍຫາຍ, ແຜນການ ປັບປຸງປົວແປງວຽກງານດ້ານ ຕ່າງໆ ແລະ ອື່ນໆ ຕາມແນວທາງຂອງພັກ ແລະ ນະໂຍບາຍຂອງລັດຖະບານ, ທັງໃຫ້ແທດເໝາະກັບສະພາບ ແລະ ເງື່ອນໄຂຕົວຈິງ. ພ້ອມດຽວກັນນັ້ນ, ທ່ານນາຍົກລັດຖະມົນຕີ ຍັງໄດ້ຮັບຟັງການປະກອບ ຄຳຄິດເຫັນ ແລະ ຂໍ້ສະເໜີຈາກປະຊາຊົນ. ຫຼັງຈາກນັ້ນ, ທ່ານນາຍົກລັດຖະມົນຕີ ກໍ່ໄດ້ໃຫ້ຄວາມກະຈ່າງແຈ້ງຕໍ່ແຕ່ລະບັນຫາທີ່ປະຊາຊົນ ໃຫ້ຄວາມສົນໃຈ.

PHOTO: Lao Government office

PHOTO: Lao Government office

ໃນມື້ດຽວກັນ, ທ່ານ ທອງລຸນ ສີສຸລິດ ຍັງໄດ້ໃຫ້ກຽດ ໂອ້ລົມຕໍ່ການນຳຫຼັກແຫຼ່ງຂອງແຂວງອັດຕະປື ແລະ ເມືອງສະໜາມໄຊ ກໍ່ຄື ຄະນະຮັບຜິດຊອບແກ້ໄຂ ແລະ ຟື້ນຟູເມືອງສະໜາມໄຊ ຢູ່ ທີ່ສະໂມສອນຂອງເມືອງດັ່ງກ່າວ. ກ່ອນອື່ນແມ່ນໄດ້ຮັບຟັງການລາຍງານຫຍໍ້ ກ່ຽວກັບຄວາມຄືບໜ້າໃນການຊ່ວຍເຫຼືອ ແລະ ຟື້ນຟູຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບ ຈາກໄພພິບັດ ນໍ້າຖ້ວມ ຢູ່ເມືອງສະໜາມໄຊ ຈາກທ່ານ ເລັດ ໄຊຍະພອນ, ເຈົ້າແຂວງໆອັດຕະປື. ການໂອ້ລົມຂອງທ່ານ ນາຍົກລັດຖະມົນຕີນັ້ນ, ທ່ານໄດ້ກ່າວຍ້ອງຍໍຊົມເຊີຍ ຕໍ່ພາກສ່ວນກ່ຽວຂ້ອງ ທີ່ສາມາດປະຕິບັດ ວຽກງານມີຜົນສຳເລັດ ແລະ ຄືບໜ້າເປັນກ້າວໆ; ໄດ້ຍົກໃຫ້ເຫັນ ສະພາບການແກ້ໄຂໄພພິບັດ ໃນຂອບເຂດທົ່ວປະເທດ; ສະພາບຄວາມຮຽກຮ້ອງ ຄວາມຕ້ອງການ ໂດຍສະເພາະ ຄວາມຕ້ອງການການ ຊ່ວຍເຫຼືອທີ່ແທ້ຈິງ ຂອງປະຊາຊົນ. ອັນສຳຄັນ, ທ່ານນາຍົກລັດຖະມົນຕີ ໄດ້ມີຄຳເຫັນຕັ້ງຂຶ້ນ ເພື່ອໃຫ້ພາກສ່ວນທີ່ກ່ຽວຂ້ອງ ໄດ້ນຳໄປຄົ້ນຄວ້າ ແລະ ເພີ່ມຄວາມເອົາໃຈໃສ່ຕື່ມ ເປັນຕົ້ນ ເຮັດແນວໃດໃຫ້ ປະຊາຊົນ ທີ່ຖຶກຜົນກະທົບ ໄດ້ໄປຢູ່ເຮືອນຊົ່ວຄາວ ທັງໝົດໄວເທົ່າທີ່ໄວ ໂດຍໃຫ້ປຸກລະດົມຜູ້ຮັບຜິດຊອບ ເລັ່ງປະຕິບັດ, ຖ້າພາກສ່ວນກ່ຽວຂ້ອງ ມີຄວາມຫຍຸ້ງຍາກ ຫຼື ຕ້ອງການຊ່ວຍເຫຼືອຫຍັງ ກໍ່ໃຫ້ສຸມ ໃສ່ແກ້ໄຂ ຫຼື ແນະນຳຕາມຄວາມເໝາະສົມ; ເລັ່ງເຮັດເຮືອນຖາວອນໃຫ້ປະຊາຊົນ ໃຫ້ໄປຕາມຂັ້ນຕອນ ແລະ ລະບຽບການ ບົນພື້ນຖານຮັບປະກັນຄຸນນະພາບ ແລະ ມີປະສິດທິຜົນ; ຮີບຮ້ອນຄົ້ນຄວ້າ ຈັດສັນທີ່ຢູ່ອາໃສຖາວອນ, ພື້ນທີ່ທຳການຜະລິດ ແລະ ຟື້ນຟູອາຊີບໃຫ້ປະຊາຊົນ ໂດຍສະເພາະ ເນັ້ນໃສ່ການປູກ-ການລ້ຽງ ກໍ່ຄື ຕາມທ່າແຮງ ແລະ ມູນເຊື້ອຂອງປະຊາຊົນ (ຂໍໃຫ້ລົງເລິກຊ່ວຍປະ ຊາຊົນແທ້ໆ); ໃຫ້ສະຫຼຸບສັງລວມງົບປະມານ ທີ່ໄດ້ນໍາໃຊ້ໄປແລ້ວ ໃນໄລຍະຜ່ານມາ ເພື່ອສາມາດວາງແຜນ ປະຕິບັດໂຄງການຕ່າງໆຢ່າງຖືກຕ້ອງ ແລະ ມີປະສິດທິຜົນ; ສືບຮັກສາມູນເຊື້ອ ອັນດີງາມຂອງ ປະຊາຊົນ ເມືອງສະໜາມໄຊ ໂດຍສະເພາະ ມູນເຊື້ອຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ມູນເຊື້ອດຸໝັ່ນ-ອາດຫານ, ຄວາມເດັດດ່ຽວ ໜຽວແໜ້ນ ສູ້ຊົນຜ່ານອຸປະສັກຕ່າງໆ ເພື່ອພ້ອມກັນຟື້ນ ຟູຊິວິດ ການເປັນຢູ່ໃຫ້ນັບມື້ດີຂຶ້ນ ເປັນກ້າວໆ, ກາຍເປັນບ້ານ ແລະ ເມືອງພັດທະນາໃນອະນາຄົດ.

PHOTO: Lao Government office

ໃນໂອກາດຢ້ຽມຢາມ ແລະ ພົບປະໂອ້ລົມ ກັບປະຊາຊົນ ໃນຄັ້ງນີ້ ທ່ານນາຍົກລັດຖະມົນຕີ ໄດ້ມອບເງິນຊ່ວຍເຫຼືອເມືອງສະໜາມໄຊ ຈຳນວນ 100 ລ້ານກີບ ແລະ ບັນດາບ້ານ ທີ່ໄດ້ຮັບຜົນກະ ທົບບ້ານລະ 10 ລ້ານກີບ, ເຊິ່ງລວມເງິນຊ່ວຍເຫຼືອ ຢູ່ເມືອງສະໜາມໄຊໃນຄັ້ງນີ້ ເປັນເງິນຈຳນວນ 190 ລ້ານກີບ.

- Advertisement -