ທ່ານນາຍົກກ່າວທີ່ແຂວງເຊກອງ ການແກ້ໄຂຄວາມທຸກຍາກ ຕ້ອງເນັ້ນຄຸນນະພາບ ຢ່າແລ່ນນຳແຕ່ຕົວເລກ

ສຳນັກງານນາຍົກລັດຖະມົນຕີລາຍງານວ່າ: ເມື່ອວັນທີ 18 ທັນວາ 2018 ທີ່ຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມ ຕໍ່ການນຳຫຼັກແຫຼ່ງ ຂອງແຂວງເຊກອງ ໂດຍມີທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ພ້ອມດ້ວຍ ຄະນະນຳ ແລະ ພາກສ່ວນທີ່ກ່ຽວຂ້ອງຂອງແຂວງ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງ ຢູ່ທີ່ຫ້ອງວ່າການປົກຄອງແຂວງດັ່ງກ່າວ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ຮັບຟັງການລາຍງານຫຍໍ້ ສະພາບການພັດທະນາເສດຖະກິດ-ສັງຄົມ ຂອງແຂວງປະຈຳປີ 2018 ເຫັນວ່າ: ທົ່ວແຂວງ ສືບຕໍ່ມີຄວາມສະຫງົບທາງດ້ານການເມືອງ, ສັງຄົມ ມີຄວາມເປັນລະບຽບຮຽບຮ້ອຍ ໂດຍພື້ນຖານ, ເສດຖະກິດ ຂະຫຍາຍຕົວ 8.3%, ລາຍຮັບສະເລ່ຍຕໍ່ຫົວຄົນ 1,623 ໂດລາ/ຄົນ/ປີ, ການເກັບລາຍຮັບເຂົ້າງົບປະມານ ຮອດປັດຈຸບັນ ປະຕິບັດໄດ້ 93% ຂອງແຜນການ, ຄອບຄົວທຸກຍາກ ຍັງເຫຼືອ 8.7%, ອັດຕາເຂົ້າຮຽນສຸດທິ ຊັ້ນປະຖົມ ກວມ 97%, ມັດທະຍົມຕົ້ນ ກວມ 84.7%, ມັດທະຍົມຕອນປາຍ ກວມ 56.8% ແລະ ອື່ນໆ.

PHOTO: Lao Government office

PHOTO: Lao Government office

ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ຄະນະພັກ, ຄະນະນຳ ແລະ ພາກສ່ວນທີ່ກ່ຽວຂ້ອງ ຂອງແຂວງ ໂດຍໄດ້ຍົກໃຫ້ເຫັນ ສະພາບການພັດທະນາເສດຖະ ກິດ-ສັງຄົມ ທີ່ສຳຄັນຂອງຊາດ, ການພົວພັນຮ່ວມມື ລະຫວ່າງ ສປປ.ລາວ ກັບບັນດາປະເທດຈຳນວນໜຶ່ງ, ສະພາບການ ທີ່ເກີດຂຶ້ນຢູ່ໃນພາກພຶ້ນ ແລະ ສາກົນ ທີ່ພົ້ນເດັ່ນ, ມູນເຊື້ອອັນດີງາມ ຂອງ ປະຊາຊົນບັນດາເຜົ່າ ຊາວແຂວງເຊກອງ ແລະ ອື່ນໆ. ອັນສຳຄັນ, ທ່ານໄດ້ມີຄຳເຫັນຊີ້ນຳ ແກ່ການນຳຂອງແຂວງ ໃຫ້ສືບຕໍ່ເອົາໃຈໃສ່ ຕໍ່ວຽກງານກໍ່ສ້າງຮາກຖານການເມືອງ ໃຫ້ເລິກເຊິ່ງເຖິງຖອງ ແລະ ເປັນ ປົກກະຕິຕໍ່ເນື່ອງ; ສຸມໃສ່ປະຕິບັດວຽກງານແກ້ໄຂຄວາມທຸກຍາກ ຂອງປະຊາຊົນ ໃຫ້ນັບມື້ດີຂຶ້ນເປັນກ້າວໆ ໂດຍເຮັດໃຫ້ປະຊາຊົນ ຮູ້ຈັກວິທີທຳມາຫາກິນ, ມີຢູ່ມີກິນ, ຮູ້ຄ້າ-ຮູ້ຂາຍ, ຮູ້ລົງທຶນ, ຮູ້ທຳການ ຜະລິດແບບໃໝ່ທີ່ທັນສະໄໝ ເຊິ່ງການແກ້ໄຂຄວາມທຸກຍາກນັ້ນ ແມ່ນໃຫ້ເນັ້ນໃສ່ຄຸນນະພາບ ແລະ ຄວາມຍືນຍົງ ເປັນສິ່ງສຳຄັນ (ບໍ່ໃຫ້ແລ່ນນຳຕົວເລກພຽງດ້ານດຽວ); ເອົາໃຈໃສ່ດຶງດູດການລົງທຶນ ໃຫ້ຫຼາຍກວ່າເກົ່າ ໂດຍຄວບຄູ່ໄປດ້ວຍຄຸນນະພາບ ແລະ ມີປະສິດທິຜົນສູງ (ຕ່າງຝ່າຍຕ່າງມີຜົນປະໂຫຍດ ຕະຫຼອດຮອດປະຊາຊົນ ກໍ່ໃຫ້ມີຜົນປະໂຫຍດ); ສືບຕໍ່ຮັກສາມູນເຊື້ອອັນດີງາມຂອງຊາດ, ຂອງ ເຜົ່າ ກໍ່ຄື ມູນເຊື້ອພິລະອາດຫານ, ດຸໝັ່ນຂະຫຍັນພຽນ, ສາມັກຄີຊ່ວຍເຫຼືອຊຶ່ງກັນ ແລະ ກັນ ຂອງປະຊາຊົນຊາວແຂວງເຊກອງ ໃຫ້ກວ້າງຂວາງ ແລະ ຍືນຍົງຕະຫຼອດໄປ. ທັງໝົດນັ້ນ, ກໍ່ເພື່ອສ້າງເງື່ອນ ໄຂເອື້ອອຳນວຍ ໃຫ້ແກ່ການປົກປັກຮັກສາ ແລະ ສ້າງສາພັດທະນາ ແຂວງເຊກອງ ໃຫ້ມີຄວາມໜັກແໜ້ນ, ເຂັ້ມແຂງ ແລະ ກ້າວໜ້າຢ່າງບໍ່ຢຸດຢັ້ງ.

PHOTO: Lao Government office

PHOTO: Lao Government office

ໃນມື້ດຽວກັນ, ທ່ານນາຍົກລັດຖະມົນຕີ ພ້ອມຄະນະ ຍັງໄດ້ໄປພົບປະໂອ້ລົມ ຄູອາຈານ ແລະ ນັກຮຽນ-ນັກສຶກສາ ທີ່ໂຮງຮຽນເຕັກນິກວິຊາຊີບປະສົມຂອງແຂວງ ແລະ ໂຮງຮຽນສາມັນ ກິນ-ນອນຊົນເຜົ່າ ຂອງແຂວງ. ນອກຈາກນັ້ນ, ຍັງໄດ້ໄປຢ້ຽມຢາມໂຄງການປູກອ້ອຍ ແລະ ຜະລິດນໍ້າຕານ ລວມທັງ ຟາມລ້ຽງງົວ ຂອງບໍລິສັດ ແມ່ນໍ້າຂອງຮ່ວມທຸລະກິດ ຈຳກັດ ທີ່ບ້ານຕິ້ວ, ເມືອງລະມາມ ຕື່ມອີກ. ໃນນັ້ນ, ການໄປຢ້ຽມຢາມ ໂຮງຮຽນແຕ່ລະບ່ອນ, ທ່ານນາຍົກລັດຖະມົນຕີ ໄດ້ມອບເຄື່ອງໃຊ້ຫ້ອງການ (ຄອບພິວເຕີ, ເຄື່ອງພິມເອກະສານ ແລະ ອື່ນໆ ຈຳນວນ 2 ຊຸດ) ພ້ອມດ້ວຍເງິນສົດ ຈໍານວນ 20 ລ້ານກີບ.

- Advertisement -