ເສັ້ນທາງລົດໄຟລາວ-ຈີນ ຄືບໜ້າແລ້ວກວ່າ 46%

ກະຊວງໂຍທາທິການ ແລະ ຂົນສົ່ງລາຍງານເມື່ອວັນທີ 12 ທັນວາ 2018 ທີ່ຜ່ານມາວ່າ: ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ຫົວໜ້າຄະນະຄຸ້ມຄອງໂຄງການກໍ່ສ້າງເສັ້ນທາງລົດໄຟລາວ-ຈີນ ໄດ້ຖະແຫຼງກ່ຽວກັບຄວາມຄືບໜ້າຂອງໂຄງການກໍ່ສ້າງເສັ້ນທາງລົດໄຟລາວ-ຈີນວ່າ: ນັບຕັ້ງແຕ່ວັນທີ 25 ທັນວາ 2016 ທີ່ໄດ້ເລີ່ມລົງມືກໍ່ສ້າງເສັ້ນທາງລົດໄຟລາວ-ຈີນ ມາຮອດວັນທີ 30 ພະຈິກ 2018 ສາມາດປະຕິບັດໂຄງການດັ່ງກ່າວຄືບໜ້າແລ້ວ 46.5% ຂອງວຽກງານກໍ່ສ້າງພື້ນຖານໂຄງລ່າງທາງລົດໄຟ ທຽບໃສ່ເດືອນຜ່ານມາ ເພີ່ມຂຶ້ນ 3.19% ໜ້າວຽກລະອຽດໄດ້ລົງມືກໍ່ສ້າງໂຄງການ 778 ຈຸດກໍ່ສ້າງ ໃນນັ້ນຊີເຈາະອຸມົງ 69 ອຸມົງ ລວມ 193 ຈຸດກໍ່ສ້າງ ສາມາດຊີເຈາະໄດ້ 103,654 ແມັດ ເລີ່ມລົງມືກໍ່ສ້າງຂົວ 139 ແຫ່ງໃນນີ້ສ້າງເສົາຂົວສຳເລັດ 1,197 ເສົາ ຊີເຈາະເສົາເຂັມຂົວລວມຄວາມຍາວ 205,863 ແມັດ ສ່ວນວຽກອຳນວຍຄວາມສະດວກໃຫ້ການກໍ່້ສາງແມ່ນໄດ້ກໍ່ສ້າງເສັ້ນທາງ ເພື່ອເຂົ້າຫາສະຖານທີ່ກໍ່ສ້າງໄດ້ 910 ກິໂລແມັດ ແລະ ຂົວ 4,098 ແມັດ ຕິດຕັ້ງສາຍສົ່ງໄຟຟ້າ 860 ກິໂລແມັດ, ຕິດຕັ້ງໝໍ້ແປງ 258 ໜ່ວຍ ແລະ ສ້າງລະບົບນ້ຳປະປາໄດ້ 128 ກິໂລແມັດ.

ສຳລັບການຈ່າຍຄ່າຊົດເຊີຍໃຫ້ປະຊາຊົນ ທີ່ໄດ້ຮັບຜົນກະທົນຈາກໂຄງການ ໄດ້ຈ່າຍທົດແທນຄືນຊັບສິນ (ສິ່ງປຸກສ້າງ), ທີ່ດິນ ແລະ ຜົນລະປູກຂອງປະຊາຊົນທີ່ໄດ້ຮັບຜົນກະທົບ ໃນນັ້ນໄດ້ຈ່າຍຄ່າຊົດເຊີຍໄປແລ້ວສາມງວດຄື: ງວດທີ 1 ຈຳນວນ 56.5 ຕື້ກີບ, ງວດທີ 2 ຈຳນວນ 81.6 ຕື້ກີບ, ງວດທີ 3 ຈຳນວນ 82.9 ຕື້ກີບ ແລະ ງວດທີ 4 ກຳລັງຈະຈ່າຍໃນອາທິດໜ້ານີ້ ຈຳນວນ 134 ຕື້ກີບ.