ຜູ້ນຳ ສ.ອາເມຣິກາ ສັ່ງຖອນທະຫານທັງໝົດອອກຈາກຊີຣີ ໃຫ້ເຫດຜົນວ່າບັນລຸຕາມເປົ້າໝາຍແລ້ວ

(Photo by DELIL SOULEIMAN / AFP)

ສຳນັກຂ່າວຕ່າງປະເທດລາຍງານເມື່ອວັນທີ 19 ທັນວາ 2018 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາລົງປະກາດຜ່ານ Twitter ວ່າ: ສະຫະລັດ ອາເມຣິກາມີໄຊຊະນະທາງທະຫານຕໍ່ກຸ່ມ IS ໃນຊີຣີແລ້ວ ໃນເມື່ອພາລະກິດສຳເລັດ ແລະ ລຸລ່ວງເປັນທີ່ຮຽບຮ້ອຍ ທ່ານຈຶ່ງໄດ້ອອກຄຳສັ່ງໃຫ້ກະຊວງປ້ອງກັນປະເທດນຳທະຫານອາເມຣິກາທັງໝົດ ທີ່ປະຈຳການຢູ່ໃນຊີຣີໃຫ້ເດີນທາງກັບປະເທດ.

(Photo by Brendan Smialowski / AFP)

ຂະນະດຽວກັນ, ທ່ານ ໂດໂນ ທຣຳ ກ່າວວ່າ: ໄດ້ມອບໝາຍໃຫ້ທ່ານ ໄມ ເພນ ຮອງປະທານປະເທດສະຫະລັດ ອາເມຣິກາ ປຶກຫາລືກັບເຈົ້າໜ້າທີ່ລະດັບສູງຂອງກະຊວງປ້ອງກັນປະເທດ ເພື່ອກຽມຄວາມພ້ອມໃນການດຳເນີນການ ເຊິ່ງມີລາຍງານວ່າຜູ້ນຳສະຫະລັດ ອາເມຣິກາຕັດສິນໃຈຂັ້ນສຸດທ້າຍ ເມື່ອວັນອັງຄານທີ່ຜ່ານມາ, ໃນດ້ານຖະແຫຼງການຂອງກະຊວງປ້ອງກັນປະເທດສະຫະລັດ ອາເມຣິກາລະບຸພຽງແຕ່ວ່າ: ກຳລັງກະກຽມທີ່ຈະດຳເນີນການໃນຂັ້ນຕໍ່ໄປ ແລະ ຄາດວ່າເຈົ້າໜ້າທີ່ອາເມຣິກາພາກພື້ນດິນທຸກຄົນ ຈະເດີນທາງອອກຈາກຊີຣີພາຍໃນກາງເດືອນມັງກອນ 2019, ເຊິ່ງສະຫະລັດ ອາເມຣິກາບໍ່ເຄີຍລະບຸຈຳນວນທະຫານຢ່າງຊັດເຈນໃນຊີຣີ ໂດຍໃຊ້ຄຳວ່າປະມານ 2,000 ຄົນ ມາໂດຍຕະຫຼອດ ແລະ ບໍ່ຮຽກທະຫານໂດຍກົງແຕ່ໃຊ້ຄຳວ່າ ທີ່ປຶກສາທາງທະຫານ.

ເຖິງແມ່ນວ່າຍັງບໍ່ເປັນທີ່ຊັດເຈນວ່າປັດໄຈໃດທີ່ເປັນຕົວຊຸກດັນ ໃຫ້ທ່ານ ໂດໂນ ທຣຳ ຕັດສິນໃຈເຊັ່ນນັ້ນ ແຕ່ການເຄື່ອນໄຫວທີ່ເກີດຂຶ້ນຈະສົ່ງຜົນຢ່າງໃຫຍ່ຫຼວງຕໍ່ພູມມິສາດການເມືອງ ແລະ ການທະຫານໃນຊີຣີ ທີ່ຍັງຄົງແບ່ງແຍກອອກເປັນຫຼາຍຝັກຫຼາຍຝ່າຍ ໂດຍສະເພາະໃນພາກເໜືອຂອງຊີຣີທີ່ຍັງຄົງເປັນເຂດທີ່ໝັ້ນຂອງກອງກຳລັງນັກຮົບຊາວເຄຼິດ ແລະ ຕວັກກີສົ່ງສັນຍານມາໄລຍະໜຶ່ງແລ້ວວ່າອາດປະຕິບັດການທາງທະຫານພຽງຝ່າຍດຽວຢູ່ບໍລິເວນນັ້ນພາຍໃນອີກບໍ່ດົນນີ້, ໃນດ້ານຂອງທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ກ່າວວ່າ ອິດສະຣາແອນກຳລັງສຶກສາຢ່າງລະອຽດຕໍ່ການຕັດສິນໃຈຂອງທ່ານ ໂດໂນ ທຣຳ ໃນການຖອນທະຫານທັງໝົດອອກຈາກຊີຣີ ແລະ ຢືນຢັນວ່າຕໍ່ຈາກນີ້ໄປອິດສະຣາແອນຈະເພີ່ມຄວາມພ້ອມ ໃນການປົກປ້ອງອະທິປະໄຕຂອງຕົນເອງ, ສ່ວນລັດເຊຍ ແລະ ອິຣານ ຫຼື ແມ່ນແຕ່ລັດຖະບານຊີຣີເອງຍັງບໍ່ສະແດງທ່າທີຢ່າງເປັນທາງການຕໍ່ກໍລະນີດັ່ງກ່າວ.

ອີກຢ່າງໜຶ່ງ, ສະຫະລັດ ອາເມຣິກາ ໄດ້ເລີ່ມມີບົດບາດທາງທະຫານຕໍ່ສົງຄາມກາງເມືອງໃນຊີຣີ ທີ່ແກ່ຍາວມາເປັນປີທີ 8 ນັບຕັ້ງແຕ່ປີ 2014 ແລະ ຊັດເຈນຍິ່ງຂຶ້ນເມື່ອທ່ານ ໂດໂນ ທຣຳ ສັ່ງການໃຫ້ເຮືອຮົບລະດົມຍິງຂີປະນາວຸດໂຈມຕີຖານທັບອາກາດແຫ່ງໜຶ່ງໃນພາກຕາເວັນຕົກຂອງຊີຣີ ເມື່ອເດືອນເມສາ 2017 ດ້ວຍຂໍ້ກ່າວຫາວ່າເປັນຄັງອາວຸດເຄມີທີ່ລັດຖະບານຊີຣີໃຊ້ໂຈມຕີປະຊາຊົນ, ໂດຍຍານພາຫະນະຫຸ້ມເກາະ, ຍານພາຫະນະທາງອາກາດ ແລະ ເຮືອຮົບສ່ວນໃຫຍ່ທີ່ສະຫະລັດ ອາເມຣິກາໃຊ້ປະຕິບັດການທາງທະຫານໃນຊີຣີ ມາຈາກຖານທັບທີ່ມີຢູ່ໃນຫຼາຍປະເທດໃນເຂດຕາເວັນອອກກາງ ລວມເຖິງອິຣັກ ແລະ ກາຕາ.