ເກົາຫຼີເໜືອຈະບໍ່ປົດອາວຸດນິວເຄຼຍ ຕາບໃດທີ່ ສ.ອາເມຣິກາ ຍັງມີທ່າທີເປັນໄພຕໍ່ຄວາມໝັ້ນຄົງ

AFP PHOTO / SAUL LOEB

ສຳນັກຂ່າວຕ່າງປະເທດລາຍງານ 20 ທັນວາ 2018 ວ່າ: ຖະແຫຼງການຂອງລັດຖະບານເກົາຫຼີເໜືອ ທີ່ເຜີຍແຜ່ຜ່ານສຳນັກຂ່າວກາງເກົາຫຼີ (KCNA) ລະບຸວ່າ: ສະຫະລັດ ອາເມຣິກາຈະຕ້ອງຮັບຮູ້ເຖິງຄວາມໝາຍທີ່ແທ້ຈິງຂອງການປົດອາວຸດນິວເຄຼຍຢູ່ແຫຼມເກົາຫຼີ ໂດຍສະເພາະຢ່າງຍິ່ງຄວນຈະເຂົ້າໃຈເຖິງສະພາບພູມສາດ ເພາະເມື່ອພວກເຮົາກ່າວເຖິງແຫຼມເກົາຫຼີ ນັ້ນກໍ່ໝາຍເຖິງດິນແດນທັງໝົດຂອງສອງເກົາຫຼີ ເຊິ່ງສະຫະລັດ ອາເມຣິກາເອງກໍ່ມີກຳລັງທະຫານເຂົ້າມາປະຈຳການຢູ່ ແລະ ມີອາວຸດນິເຄຼຍອີກດ້ວຍ ດັ່ງນັ້ນ, ເມື່ອເວົ້າເຖິງການປົດອາວຸດນິວເຄຼຍທັງໝົດອອກຈາກແຫຼມເກົາຫຼີ ກໍ່ໝາຍຄວາມວ່າຈະຕ້ອງຖອດຖອນໄພຮຸກຮານທັງໝົດອອກໄປ ບໍ່ພຽງແຕ່ເກົາຫຼີເໜືອ-ເກົາຫຼີໃຕ້ ແຕ່ລວມເຖິງປະເທດເພື່ອນບ້ານແຫຼມເກົາຫຼີອີກດ້ວຍ, ເຖິງຢ່າງໃດກໍ່ຕາມ ສະຫະລັດ ອາເມຣິກາເຄີຍຖອນອາວຸດນິວເຄຼຍອອກຈາກເກົາຫຼີໃຕ້ຄັ້ງໜຶ່ງ ເມື່ອປີ 1990 ແລະ ສະຫະລັດ ອາເມຣິກາ ກັບ ເກົາຫຼີໃຕ້ຍັງບໍ່ມີຄວາມເຫັນໃດໆຕໍ່ການຖະແຫຼງດັ່ງກ່າວຂອງທາງການເກົາຫຼີເໜືອ.

ການເຄື່ອນໄຫວຫຼ້າສຸດຂອງເກົາຫຼີເໜືອເກີດຂຶ້ນ ເພາະສະຫະລັດ ອາເມຣິກາ ແລະ ເກົາຫຼີເໜືອຍັງຄົງມີຄວາມຄິດເຫັນທີ່ແຕກຕ່າງກັນ ໃນເລື່ອງຂອງຜົນທີ່ຈະຕາມມາຂອງການປົດອາວຸດນິວເຄຼຍຢູ່ແຫຼມເກົາຫຼີ ເຊິ່ງລັດຖະບານສະຫະລັດ ອາເມຣິກາຕ້ອງການໃຫ້ເປັນເຊັ່ນນັ້ນ ແຕ່ເກົາຫຼີເໜືອເອງກໍ່ຕ້ອງການທີ່ຈະໃຫ້ຖອດຖອນມາດຕະການຂວໍ້າບາດທັງໝົດທີ່ປະຊາຄົມໂລກຮ່ວມກັນຂວໍ້າບາດຕໍ່ເກົາຫຼີເໜືອ.