ຜູ້ນຳລັດເຊຍກ່າວເຕືອນ ນັບມື້ນັບມີຄວາມສ່ຽງທີ່ຈະເກີດ ສົງຄາມນິວເຄຼຍລ້າງຜານໂລກ

(Photo by Alexander NEMENOV / AFP)

ສຳນັກຂ່າວຕ່າງປະເທດລາຍງານເມື່ອວັນທີ 20 ທັນວາ 2018 ວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ຖະແຫຼງຂ່າວປະຈຳປີ ທີ່ນະຄອນຫຼວງມົດສະກູ ໂດຍກ່າວສຽດສີຄຳກ່າວອ້າງຂອງບັນດາປະເທດຕາເວັນຕົກວ່າ: ລັດເຊຍຕ້ອງການຄອງໂລກນັ້ນ ຄວາມຈິງແລ້ວບັນດາປະເທດຕາເວັນຕົກຕ່າງຫາກທີ່ຕໍ່ຕ້ານລັດເຊຍ ເພື່ອຜົນປະໂຫຍດສ່ວນຕົວ ແລະ ສຽງອັນຕະລາຍເອງ, ຜູ້ນຳລັດເຊຍຍັງໄດ້ປະຕິເສດຂໍ້ກ່າວຫາວ່າລັດເຊຍແຊກແຊງວຽກງານພາຍໃນຂອງຕ່າງປະເທດເຊັ່ນ: ການໃຊ້ແກັດພິດເພື່ອຂ້າສາຍລັບສອງໜ້າໃນປະເທດອັງກິດ ແລະ ຂໍ້ກ່າວຫາວ່າເຂົ້າໄປແຊກແຊງໃນສະມາຄົມປືນໄຣເຟີ້ຂອງສະຫະລັດ ອາເມຣິກາ.

(Photo by Alexander NEMENOV / AFP)

ໃນທາງກັບກັນ, ທ່ານ ປູຕິນ ກ່າວວ່າທ່ານຕ້ອງການທີ່ຈະສະແດງພາບລັກຂອງຜູ້ປົກປ້ອງໂລກຫຼາຍກວ່າ ຕົວຢ່າງກໍລະນີທີ່ສະຫະລັດ ອາເມຣິກາ ສະແດງເຈດຕະນາທີ່ຈະຖອນຕົວອອກຈາກສົນສິສັນຍາກອງກຳລັງນິວເຄຼຍພິໄສກາງ (INF) ທີ່ລົງນາມໄປຕັ້ງແຕ່ປີ 1987 ໂດຍຜູ້ນຳລັດເຊຍເຕືອນວ່າ ຫາກສະຫະລັດ ອາເມຣິການຳຂີປະນາວຸດພິໄສກາງໄປຕິດຕັ້ງໄວ້ໃນເອີຣົບ ລັດເຊຍກໍ່ຈະເຮັດແບບນັ້ນເຊັ່ນດຽກັນ, ສ່ວນກໍລະນີທີ່ນັກວິເຄາະປະເທດຕາເວັນຕົກກ່າວເຖິງຄວາມເປັນໄປໄດ້ທີ່ຈະມີການໃຊ້ອາວຸດນິວເຄຼຍນັ້ນ ທ່ານ ປູູຕິນ ກ່າວວ່າເປັນທິດທາງທີ່ຈະນຳໄປສູ່ຈຸດເລີ່ມຕົ້ນ ເຊິ່ງກໍ່ອາດນຳໄປສູ່ຄວາມເສຍຫາຍອັນໃຫຍ່ຫຼວງທີ່ນິວເຄຼຍຈະລ້າງຜານໂລກໄດ້, ຜູ້ນຳລັດເຊຍຍັງກ່າວຢ້ຳເຖິງກໍລະນີທີ່ສະຫະລັດ ອາເມຣິກາ ກຳລັງພິຈາລະນາທີ່ຈະໃຊ້ຂີປະນາວຸດຕິດຫົວຮົບນິວເຄຼຍວ່າ ການຍິງຂີປະນາວຸດດັ່ງກ່າວອາດນຳໄປສູ່ທິດທາງທີ່ຜິດ ເຖິງຂັ້ນເປີດປຸ່ມນິວເຄຼຍໃສ່ກັນ ແລະ ເປັນໄພຕໍ່ໂລກ, ນອກນີ້ ສະຫະລັດ ອາເມຣິກາຍັງສະແດງຄວາມສົນໃຈແຕ່ພຽງເລັກໜ້ອຍເທົ່ານັ້ນ ໃນການທີ່ຈະຂະຫຍາຍສັນຍາຫຼຸດຜ່ອນອາວຸດນິວເຄຼຍສະບັບໃໝ່ ທີ່ກຳລັງຈະໝົດອາຍຸໃນ 2021.

ທ່ານ ປູຕິນ ກ່າວອີກວ່າ: ສະຫະລັດ ອາເມຣິກາຕ່າງຫາກ ບໍ່ແມ່ນລັດເຊຍທີ່ຕ້ອງການຈະຄອງໂລກ ໂດຍຍົກເຫດຜົນຂອງງົບປະມານດ້ານຄວາມໝັ້ນຄົງປະຈຳປີຂອງສະຫະລັດ ອາເມຣິກາ ທີ່ສູງເກີນກວ່າ 700,000 ລ້ານໂດລາສະຫະລັດ ແຕ່ຂອງລັດເຊຍນັ້ນມີພຽງແຕ່ 46,000 ລ້ານໂດລາສະຫະລັດເທົ່ານັ້ນ, ເຖິງຢ່າງໃດກໍ່ຕາມ ຜູ້ນຳລັດເຊຍເຫັນດີກັບການທີ່ສະຫະລັດ ອາເມຣິກາ ຖອນກຳລັງທະຫານອອກຈາກຊີຣີ ຖືເປັນການກະທຳທີ່ຖືກຕ້ອງແລ້ວ ເພາະລັດເຊຍຢືນຢັນມາໂດຍຕະຫຼອດວ່າ ການທີ່ມີກຳລັງທະຫານຂອງສະຫະລັດ ອາເມຣິກາເຂົ້າໄປຢູ່ໃນຊີຣີນັ້ນບໍ່ຖືກຕ້ອງ ເພາະບໍ່ສາມາດອ້າງວ່າເປັນມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ ຫຼື ໄດ້ຮັບຄວາມເຫັນດີຈາກລັດຖະບານຊີຣີ, ເຊິ່ງເມື່ອສະຫະລັດ ອາເມຣິກາຖອນຕົວອອກໄປ ກໍ່ຍິ່ງເປັນການເສີມບົດບາດຂອງລັດເຊຍວ່າດ້ວຍອະນາຄົດຂອງຊີຣີ.