ຈີນບໍ່ພໍໃຈ ສ.ອາເມຣິກາ ທີ່ແຊກແຊງວຽກງານພາຍໃນ ໂດຍການອອກກົດໝາຍຕີເບດ

(Photo by JOHANNES EISELE / AFP)

ສຳນັກຂ່າວຕ່າງປະເທດລາຍງານ 21 ທັນວາ 2018 ວ່າ: ທ່ານ ລູ້ ຄັງ ໂຄສົກກະຊວງການຕ່າງປະເທດຂອງຈີນ ກ່າວເມື່ອວັນພະຫັດ ທີ່ຜ່ານມາ ຕໍ່ການທີ່ທັງສະພາລຸ່ມ ແລະ ສະພາສູງຂອງສະຫະລັດ ອາເມຣິກາມີມະຕິສຽງສ່ວນໃຫຍ່ໃນກອງຊຸມອາທິດນີ້ ປະກາດໃຊ້ກົດໝາຍວ່າດ້ວຍການເຂົ້າສູ່ຕີເບດ ເຊິ່ງມີເນື້ອໃນສຳຄັນຄືການໃຫ້ລັດຖະບານຈີນເປີດກວ້າງຍິ່ງຂຶ້ນ ສຳລັບນັກການທູດ ແລະ ຜູ້ປະກອບທຸລະກິດຂອງສະຫະລັດ ອາເມຣິກາ ລວມໄປຈົນເຖິງນັກທ່ອງທ່ຽວ ແລະ ສື່ມວນຊົນ ໃນການເດີນທາງເຂົ້າສູ່ຕີເບດ ເຂດປົກຄອງຕົນເອງຕີເບດ ໂດຍລັດຖະບານສະຫະລັດ ອາເມຣິກາ ຈະມີມາດຕະການຕອບໂຕ້ເປັນແຕ່ລະກໍລະນີ ຕໍ່ເຈົ້າໜ້າທີ່ຂອງຈີນທີ່ຕໍ່ຕ້ານກົດໝາຍດັ່ງກ່າວ ວ່າເປັນອີກຄັ້ງໜຶ່ງທີ່ສະຫະລັດ ອາເມຣິກາ ສະແດງເຈດຕະນາຮ້າຍຢ່າງຊັດເຈນ ໃນການແຊກແຊງວຽກງານພາຍໃນຂອງປະເທດອື່ນ.

(Photo by STR / AFP)

ເຊິ່ງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງນາມຮັບຮອງກົດໝາຍດັ່ງກ່າວ ເພື່ອໃຫ້ມີຜົນບັງຄັບໃຊ້ແລ້ວເມື່ອວັນພຸດ ທີ່ຜ່ານມາ, ຂະນະທີ່ສະຖານເອກອັກຄະລັດຖະທູດຈີນ ປະຈຳນະຄອນຫຼວງວໍຊິງຕັນໄດ້ຢືນໜັງສືຮຽກຮ້ອງແລ້ວ, ນອກນີ້ ທ່ານ ລູ້ ຄັງ ກ່າວອີກວ່າ: ນັບຕັ້ງແຕ່ປີ 2015 ຈົນເຖິງປັດຈຸບັນ ມີປະຊາຊົນອາເມຣິກາປະມານ 40,000 ຄົນ ທັງນັກການເມືອງ, ນັການທູດ, ນັກທ່ອງທ່ຽວ ແລະ ສື່ມວນຊົນ ມີໂອກາດຢ້ຽມຢາມຕີເບດ, ອີກຢ່າງໜຶ່ງກົດໝາຍຂອງຈີນກໍ່ລະຈຸຊັດເຈນວ່າ: ປະຊາຊົນຕ່າງປະເທດທຸກຄົນ ຕ້ອງດຳເນີນການເພື່ອຂໍຮັບການພິຈາລະນາຈາກທາງການຈີນໃນການເດີນທາງຢ້ຽມຢາມຕີເບດ ເຊິ່ງສ່ວນໃຫຍ່ລັດຖະບານຈີນກໍ່ອະນຸຍາດໃຫ້ສະເພາະກັບນັກທ່ອງທ່ຽວທີ່ມາເປັນກຸ່ມ ແລະ ເປີກໃຫ້ເຂົ້າເຖິງສະເພາະພື້ນທີ່ໆອະນຸຍາດເທົ່ານັ້ນ.

(Photo by PUNIT PARANJPE / AFP)

ເຊິ່ງມີການວິເຄາະວ່າ ສະຫະລັດ ອາເມຣິກາ ແລະ ຈີນອາດມີຄວາມຂັດແຍ່ງກັນຮຸນແຮງຂຶ້ນໃນເລື່ອງຕີເບດ ເນື່ອງຈາກປີ 2019 ເປັນວາລະຄົບຮອບ 60 ປີທີ່ດາໄລ ລາມະ ຜູ້ນຳທາງຈິດວິນຍານຂອງຊາວຕີເບດ ລີ້ໄພອອກຈາກຈີນໄປຍັງເມືອງທຳມະສາລາ ທາງພາກເໜືອຂອງອິນເດຍ.