ໜ່ວຍງານໃດລະດົມເງິນເພື່ອຈັດກິດຈະກຳສະເຫຼີມສະຫຼອງວັນສຳຄັນຕ່າງໆ ຈະຖືກປະຕິບັດວິໄນ

ໃນໄລຍະຜ່ານມາ, ຈາກກະແສຝົດເດືອດໃນສັງຄົມ ໂດຍສະເພາະສັງຄົມອອນລາຍ ຈາກກໍລະນີທີ່ມີແຈ້ງຈາກຂອງອົງການຈັດຕັ້ງລັດ ໃນການລະດົມເງິນທັງຈາກພະນັກງານທະຫານ, ຕຳຫຼວດ ແລະ ພໍ່ແມ່ປະຊາຊົນ ເພື່ອໃຊ້ເຂົ້າໃນການສະເຫຼີມສະຫຼອງວັນສຳຄັນຕ່າງໆ ຈົນເກີດກະແສວິພາກວິຈານເຖິງຄວາມບໍ່ເໝາະສົມ ແລະ ບາງໜ່ວຍງານກໍ່ໄດ້ມີການອອກແຈ້ງການຍົກເລີກການກະທຳດັ່ງກ່າວແລ້ວ.

ຕໍ່ມາໃນວັນທີ 20 ທັນວາ 2018 ທີ່ຜ່ານມາ, ຫ້ອງວ່າການສູນກາງພັກປະຊາຊົນປະຕິວັດລາວ ກໍ່ໄດ້ອອກແຈ້ງການ ໂດຍມີເນື້ອໃນວ່າ: ເນື່ອງຈາກສະພາບທາງເສດຖະກິດ-ການເງິນ-ງົບປະມານຂອງປະເທດເຮົາ ຢູ່ໃນສະພາບທີ່ຫຍຸ້ງຍາກ, ບວກກັບເກີດໄພພິບັດອັນໜັກໜ່ວງ, ສະນັ້ນ ການສະເຫຼີມສະຫຼອງວັນສຳຄັນຕ່າງໆຂອງຊາດ ໃຫ້ເນັ້ນດ້ານເນື້ອໃນເປັນຫຼັກ, ບົນຈິດໃຈປະຢັດສູງສຸດ, ການໃຊ້ຈ່າຍເຂົ້າໃນການສະເຫຼີມສະຫຼອງ ແມ່ນບໍ່ໃຫ້ເກີນຈຳນວນງົບປະມານທີ່ລັດໄດ້ອະນຸມັດແລ້ວ ແລະ ບໍ່ໃຫ້ຈັດຕັ້ງລະດົມທຶນສົມທົບຕື່ມອີກ. ຖ້າແຂວງໃດ ຫຼື ການຈັດຕັ້ງຂັນໃດ ໄດ້ມີການຕົກລົງລະດົມການປະກອບສ່ວນຈາກສັງຄົມ ແມ່ນໃຫ້ແຈ້ງໂຈະການປະຕິບັດ; ສ່ວນເງິນທີ່ລະດົມມາໄດ້ກໍ່ໃຫ້ສົ່ງເງິນຄືນເຈົ້າຂອງ.

ຫຼ້າສຸດ, ກອງປະຊຸມລັດຖະບານ ສະໄໝສາມັນ ປະຈຳເດືອນ ທັນວາ 2018 ເມື່ອວັນທີ 24-25 ທັນວາ 2018 ທີ່ຜ່ານມາ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ເນັ້ນໜັກເຖິງບັນຫາດັ່ງກ່າວ ໂດຍຫ້າມບໍ່ໃຫ້ມີການແຜ່ ແລະ ລະດົມເງິນ ຈາກພະນັກງານທະຫານ, ຕຳຫຼວດ ແລະ ປະຊາຊົນ ເພື່ອໃຊ້ເຂົ້າໃນການສະເຫຼີມສະຫຼອງວັນສຳຄັນຕ່າງໆ ແລະ ເລີ່ມແຕ່ປີ 2019 ເປັນຕົ້ນໄປຫ້າມບໍ່ໃຫ້ອົງການໃດ ແລະ ທ້ອງຖິ່ນໃດຂອງລັດຈັດການແຜ່, ລະດົມເງິນຈາກສັງຄົມ ເພື່ອເອົາໄປໃຊ້ໃນກິດຈະກຳຂອງພັກລັດ ແລະ ການເຮັດບຸນ, ເຮັດທານຕ່າງໆຕື່ມອີກ ຖ້າມີການລະເມີດຈະຖືວ່າເປັນການກະທຳຜິດລະບຽບວິໄນ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube