ຊີຣີຍົກພົນຂຶ້ນເໜືອ ເພື່ອຊ່ວຍນັກຮົບເຄິດງັດດັນປະຕິບັດການທາງທະຫານຂອງຕວັກກີ

(Photo by Delil souleiman / AFP)

ສຳນັກຂ່າວຕ່າງປະເທດລາຍງານ 29 ທັນວາ 2018 ວ່າ: ອົງການສັງເກດການດ້ານສິດທິມະນຸດຊີຣີ (SOHR) ລາຍງານເມື່ອວັນສຸກ ທີ່ຜ່ານມາວ່າກອງທັບຊີຣີໄດ້ເລີ່ມການລຳລຽງທັງອາວຸດຍຸດໂທປະກອນ ແລະ ກຳລັງພົນຂຶ້ນສູ່ເມືອງມານບິນ ໃນແຂວງອະເລບໂປ ທີ່ຢູ່ພາກເໜືອຂອງປະເທດຢ່າງຕໍ່ເນື່ອງຕະຫຼອດໄລຍະ 2-3 ມື້ທີ່ຜ່ານມາ ເຊິ່ງຖືເປັນຄັ້ງທຳອິດໃນຮອບ 6 ປີ ທີ່ທະຫານຂອງຝ່າຍລັດຖະບານເຂົ້າໄປຕັ້ງເຂດທີ່ໝັ້ນໃນບໍລິເວນດັ່ງກ່າວ ນັບຕັ້ງແຕ່ກອງກຳລັງປ້ອງກັນຕົນເອງຊາວເຄິດ (YPG) ເຂົ້າຢຶດຄອງພື້ນທີ່ດັ່ງກ່າວເມື່ອປີ 2012.

ເຊິ່ງ SOHR ປະເມີນຈຳນວນທະຫານຊີຣີໄວ້ເບື້ອງຕົ້ນປະມານ 300 ຄົນ ແຕ່ຄາດວ່າອາດມີການເພີ່ມຈຳນວນອີກ ໂດຍການເຂົ້າສູ່ພື້ນທີ່ເມືອງມານບິນຂອງທະຫານລັດຖະບານ ເປັນຜົນມາຈາກການເຈລະຈາລະຫວ່າງລັດຖະບານຊີຣີກັບກອງກຳລັງນັກຮົບເຄິດ ທີ່ສະຫະລັດ ອາເມຣິກາໃຫ້ການສະໜັບສະໜູນ ເຊິ່ງຍອມຮັບວ່າຕ້ອງການການຄວາມຊ່ວຍເຫຼືອ ຈາກການທີ່ທະຫານອາເມຣິກາປະມານ 2,000 ຄົນກຽມຖອນກຳລັງກັບປະເທດຕາມຄຳສັ່ງຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຖືວ່າເປັນຂໍ້ຕົກລົງລະຫວ່າງຜູ້ນຳສະຫະລັດ ອາເມຣິກາ ກັບທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ເພື່ອເປີດທາງໃຫ້ກອງທັບຕວັກກີເປີດສາກປະຕິບັດການທາງທະຫານຕາມເຂດຊາຍແດນພາກເໜືອຂອງຊີຣີ ທີ່ເຕັມໄປດ້ວຍນັກຮົບເຄິດທີ່ລັດຖະບານຕວັກກີຖືວ່າເປັນກຸ່ມກໍ່ການຮ້າຍ ເຊັ່ນດຽວກັບພັກແຮງງານເຄີດິດສະຖານ (PKK) ທີ່ສູ້ຮົບກັບກອງທັບຕວັກກີມາຍາວນານກວ່າ 3 ທົດສະວັດ ເພື່ອແບ່ງແຍກດິນແດນບາງສ່ວນທາງພາກໃຕ້ຂອງປະເທດ.

ຂະນະທີ່ທ່ານ ເອີໂດກັນ ກ່າວເຖິງສະຖານະການຕາມແນວຊາຍແດນພາກໃຕ້ຂອງຕວັກກີ ທີ່ຕິດກັບພາກເໜືອຂອງຊີຣີວ່າ ລັດຖະບານຕວັກກີບໍ່ໄດ້ຮີບຮ້ອນ ຕາບໃດທີ່ບໍ່ມີພຶດຕິກຳເປັນໄພຮຸກຮານເກີດຂຶ້ນກ່ອນຈາກຝ່າຍກອງກຳລັງນັກຮົບເຄິດ ແລະ ທ່ານ ເອີໂດກັນ ໄດ້ສົ່ງຄະນະເຈົ້າໜ້າທີ່ລະດັບສູງຢ້ຽມຢາມນະຄອນຫຼວງມົດສະກູໃນທ້າຍອາທິດນີ້ ເພື່ອປຶກສາຫາລືກັບເຈົ້າໜ້າທີ່ລະດັບສູງຂອງລັດເຊຍກ່ຽວກັບສະຖານະການໃນຊີຣີ.