ລາວ-ກຳປູເຈຍ ຈະສືບຕໍ່ຕາມຂໍ້ຕົກລົງສອງນາຍົກ ຕ່າງຝ່າຍຕ່າງຖອນ ເພື່ອຮ່ວມກັນແກ້ໄຂຢ່າງສັນຕິ

ໜັງສືພິມກອງທັບປະຊາຊົນລາວລາຍງານວ່າ: ເມື່ອວັນທີ 27 ທັນວາ 2018 ທີ່ຜ່ານມາ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດຂອງລາວ ພ້ອມດ້ວຍຄະນະໄດ້ເດີນທາງຢ້ຽມຢາມ ແລະ ປະຕິບັດໜ້າທີ່ຢູ່ກຳປູເຈຍ ຕາມການເຊື້ອເຊີນຂອງສົມເດັດ ປີໄຈ ເສນາ ເຕຍບັນ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດກຳປູເຈຍ.

ໃນການພົບປະຄັ້ງນີ້ ທັງສອງຝ່າຍເຫັນດີເປັນເອກະພາບ ຕາມແນວທາງເນື້ອໃນຈິດໃຈຂອງການພົບປະລະຫວ່າງສອງນາຍົກລາວ-ກຳປູເຈຍ ວ່າດ້ວຍການຖອດກຳລັງທະຫານອອກຈາກເຂດທີ່ຍັງຄົງຄ້າງ ແລະ ຮ່ວມກັນແກ້ໄຂ, ເປັນຕົ້ນແມ່ນຮ່ວມກັນລາດຕະເວນສອດສ່ອງເພື່ອເຮັດໃຫ້ເຂດດັ່ງກ່າວກັບມາສູ່ສະພາບປົກກະຕິ ແລະ ປະຊາຊົນໄປມາຫາສູ່ກັນໄດ້ແບບເພື່ອນມິດຍາດພີ່ນ້ອງ, ຮ່ວມກັນຄ້າຂາຍຕາມທີ່ເຄີຍມີມູນເຊື້ອມາແຕ່ຍາວນານ.

ເຊິ່ງທ່ານ ພົນເອກ ຈັນສະໝອນ ຈັນຍາລາດ ໄດ້ສະເໜີໃຫ້ມີການເພີ່ມການພົບປະແລກປ່ຽນລະຫວ່າງຄະນະນຳຂັ້ນກົມໃຫຍ່, ຫ້ອງວ່າການກະຊວງ, ບັນດາເລົ່າຮົບ ແລະ ບາງຂະແໜງການລົງຮອດຂັ້ນທ້ອງຖິ່ນ ທີ່ທັງສອງຝ່າຍເຫັນດີຮ່ວມກັນ, ທັງເປັນການຮັດແໝ້ນຄວາມສາມັກຄີທີ່ມີມູນເຊື້ອຮ່ວມກັນມາຍາວນານ.

ນອກຈາກນີ້ທ່ານ ພົນເອກ ຈັນສະໝອນ ຈັນຍາລາດ ຍັງໄດ້ເຊື້ອເຊີນສົມເດັດ ປີໄຈ ເສນາ ເຕຍບັນ ມາຮ່ວມພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຕອບ 70 ປີອີກດ້ວຍ.