ແກັດລະເບີດ ເຮັດໃຫ້ອາພາດເມັ້ນພັງໃນລັດເຊຍ ເສຍຊີວິດແລ້ວ 7 ຄົນ

(Photo by STR / AFP)

ສຳນັກຂ່າວຕ່າງປະເທດລາຍງານ ເມື່ອວັນທີ 31 ທັນວາ 2018 ທີ່ຜ່ານມາວ່າ: ເກີດເຫດແກັດລະເບີດ ໃນເມືອງອຸດສາຫະກຳແມັກນິໂຕກັອກ ແຂວງເຊວຢາບລິງ ປະເທດລັດເຊຍ ຫ່າງຈາກນະຄອນຫຼວງມົດສະກູກວ່າ 1,600 ກິໂລແມັດ ໄປທາງພາກຕາເວັນອອກ, ແຮງລະເບີດເຮັດໃຫ້ອາພາດເມັ້ນສູງ 12 ຊັ້ນ ເຊິ່ງເປັນອາຄານທີ່ຢູ່ອາໄສຍຸບພັງລົງ ໂດຍມີລາຍງານຫຼ້າສຸດວ່າມີຜູ້ເສຍຊີວິດແລ້ວ 7 ຄົນ ແລະ ຍັງບໍ່ຮູ້ຊະຕາກຳອີກ 35 ຄົນ, ພາຍຫຼັງເກີດເຫດເຈົ້າໜ້າທີ່ກູ້ໄພຫຼາຍຮ້ອຍຄົນໄດ້ເລັ່ງຄົ້ນຫາຜູ້ສູນຫາຍໃຕ້ກອງຊາກທີ່ພັງລົງ ທ່າມກາງສະພາບອາກາດໜາວເຢັນ ອຸນຫະພູມຕ່ຳເຖິງ -18 ອົງສາເຊ.

Russian President Vladimir Putin (Photo by Ilya MOSKOVETS / AFP)

ໃນດ້ານຂອງທ່ານ ວະລາດິເມຍ ປູຕິນ ປະທານປະເທດລັດເຊຍ ໄດ້ສັ່ງການໃຫ້ທ່ານ ເຢບເກນີ ຊິນິເຊບ ລັດຖະມົນຕີກະຊວງສະຖານະການສຸກເສີນ ແລະ ທ່ານ ນາງ ເວໂຣນິກາ ສຄອສໂຄວາ ລັດຖະມົນຕີກະຊວງສາທາລະນະສຸກ ເດີນທາງໄປຍັງສະຖານທີ່ເກີດເຫດເພື່ອຕິດຕາມ ແລະ ອຳນວຍຄວາມສະດວກໃນການກູ້ໄພ.

ສຳລັບອາພາດເມັ້ນຫຼັງດັ່ງກ່າວສ້າງຂຶ້ນໃນສະໄໝສະຫະພາບໂຊວຽດ ເມື່ອປີ 1973 ມີຜູ້ອາໄສທີ່ໄດ້ລົງທະບຽນໄວ້ 111 ຄົນ ແຕ່ພາຍຫຼັງເກີດເຫດເຈົ້າໜ້າທີ່ໄດ້ສັ່ງອົບພະຍົບອອກຈາກອາຄານທັງໝົດ.

(Photo by Ilya MOSKOVETS / AFP)
(Photo by Ilya MOSKOVETS / AFP)
(Photo by STR / AFP)
(Photo by STR / AFP)
(Photo by Ilya MOSKOVETS / AFP)