ເກົາຫຼີເໜືອ ພ້ອມທຸກເມື່ອທີ່ຈະເຈລະຈາກັບ ສ.ອາເມຣິກາ ແລະ ເຕືອນຢ່າປະເມີນຄວາມອົດທົນຂອງຕົນຕ່ຳ

ສຳນັກຂ່າວຕ່າງປະເທດລາຍງານເມື່ອວັນທີ 1 ມັງກອນ 2019 ທີ່ຜ່ານມາວ່າ:  ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ກ່າວໃນໂອກາດອວຍພອນປີໃໝ່ ທີ່ຖ່າຍທອດສົດທາງໂທລະພາບໄປທົ່ວປະເທດ ເມື່ອເວລາ 09:00​ໂມງ ຕາມເວລາທ້ອງຖິ່ນວ່າ: ເກົາຫຼີເໜືອພ້ອມທຸກເມື່ອ ທີ່ຈະພົບປະກັບທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາອີກຄັ້ງ ແລະ ຢືນຢັນເຖິງຈຸດຢືນວ່າຈະປົດອາວຸດນິວເຄຼຍໃຫ້ສຳເລັດ.

ເຖິງຢ່າງໃດກໍ່ຕາມ, ສຳນັກຂ່າວຢອນຮັບຂອງເກົາຫຼີໃຕ້ລາຍງານວ່າ: ເກົາຫຼີເໜືອາດຈະປະຕິບັດໃນທາງກົງກັນຂ້າມ ຫາກສະຫະລັດ ອາເມຣິກາ ປະເມີນຄວາມອົດທົນຂອງຜູ້ນຳເກົາຫຼີເໜືອຜິດ ແລະ ຍັງຄົງຢຶດຕິດແຕ່ກັບການຂວໍ້າບາດ.

ທ່ານ ຄິມ ຈອງ-ອຶນ ໄດ້ຮຽກຮ້ອງໃຫ້ສະຫະລັດ ອາເມຣິກາ ປະຕິບັດຕາມຂໍ້ຕົກລົງການປົດນິວເຄຼຍໃນສ່ວນຂອງຕົນ ແລະ ກ່າວວ່າສາຍພົວພັນລະຫວ່າງສອງເກົາຫຼີໄດ້ກ້າວສູ່ໄລຍະໃໝ່ຢ່າງສົມບູນ ແລະ ທ່ານຍິນດີທີ່ຈະກັບມາຮ່ວມໂຄງການດ້ານເສດຖະກິດທີ່ສຳຄັນກັບເກົາຫຼີໃຕ້ອີກຄັ້ງເຊັ່ນ: ນິຄົມອຸດສາຫະກຳເຄຊອງ ແລະ ການທ່ອງທ່ຽວພູຄຶມກັງ (Mount Kumgang) ໂດຍບໍ່ມີເງື່ອນໄຂໃດໆ ເພາະທັງສອງຢ່າງນີ້ເປັນສັນຍາສັນຕິພາບລະຫວ່າງເກົາຫຼີເໜືອ ແລະ ເກົາຫຼີໃຕ້.

ພ້ອມດຽວກັນນີ້, ທ່ານ ຄິມ ຈອງ-ອຶນ ຍັງໄດ້ຮຽກຮ້ອງໃຫ້ເກົາຫຼີໃຕ້ຢຸດຕິການຊ້ອມຮົບຮ່ວມກັບສະຫະລັດ ອາເມຣິກາຢ່າງຖາວອນ ເນື່ອງຈາກເກົາຫຼີເໜືອ ແລະ ເກົາຫຼີໃຕ້ໄດ້ຕັດສິນໃຈທີ່ຈະກ້າວເດີນໄປສູ່ເສັ້ນທາງແຫ່ງສັນຕິພາບ ແລະ ຄວາມຈະເລີນຮຸ່ງເຮືອງແລ້ວ, ໂດຍເນັ້ນຢ້ຳວ່າບໍ່ຄວນຈະອະນຸຍາດໃຫ້ມີການຊ້ອມຮົບຮ່ວມກັບກອງກຳລັງຝ່າຍອື່ນ ລວມທັງຄວນຢຸດຕິການຕິດຕັ້ງອາວຸດສົງຄາມ ແລະ ຍຸດໂທປະກອນທາງການທະຫານຈາກຝ່າຍອື່ນ.