ຈີນປະສົບຄວາມສຳເລັດ ໃນການນຳຍານລົງຈອດ “ດ້ານມືດ“ ຂອງດວງຈັນ

ສຳນັກຂ່າວຕ່າງປະເທດລາຍງານ 3 ມັງກອນ 2019 ວ່າ: ອົງການບໍລິຫານອະວະກາດແຫ່ງຊາດຈີນ (CNSA) ອອກຖະແຫຼງການວ່າ: ຍານສຳຫຼວດ “ສາງເອີ-4” ເຊິ່ງເປັນຊື່ຂອງເທບທິດາແຫ່ງດວງຈັນຕາມຄວາມເຊື່ອຂອງຄົນຈີນ ປະສົບຄວາມສຳເລັດໃນການລົງຈອດບໍລິເວນເຂດຫ່າງໄກຂົ້ວໃຕ້ ຫຼື ດ້ານມືດຂອງດວງຈັນ ເມື່ອເວລາ 10:26 ນາທີ ຕາມເວລາທ້ອງຖິ່ນນະຄອນຫຼວງປັກກິ່ງ (09:26 ນາທີ ຕາມເວລາໃນປະເທດລາວ) ສ້າງປະຫວັດສາດເປັນຍານສຳຫຼວດທີ່ສ້າງໂດຍມະນຸດອັນທຳອິດທີ່ສາມາດລົງຈອດໃນສ່ວນດັ່ງກ່າວຂອງດວງຈັນໄດ້ສຳເລັດ.

ຂະນະດຽວກັນ, ຍານສາງເອີ-4 ໄດ້ສົ່ງພາບຖ່າຍທຳອິດຂອງພື້ນຜິວດວງຈັນໃນບໍລິເວນນັ້ນກັບມາຍັງສູນປະຕິບັດການໃນໂລກຄື ສູນອະວະກາດຊີຊາງ ໃນມົນທົນເສສວນ ຜ່ານດາວທຽມສື່ສານ “ເຊວຍສຽວ” ທີ່ໝາຍເຖິງ “ຂົວນົກກາງເຂນ” ເຊິ່ງອອກເດີນທາງຈາກໂລກເມື່ອທ້າຍເດືອນພຶດສະພາ ປີທີ່ຜ່ານມາ. ນອກຈາກນີ້, ສິ່ງທີ່ເດີນທາງໄປພ້ອມກັບຍານສຳຫຼວດສາງເອີ-4 ຄືຍານຫຸ່ນຍົນສຳຫຼວດຂະໜາດນ້ອຍທີ່ສາມາດຂັບເຄື່ອນໄດ້ເອງເທິງພື້ນຜິວຂອງດວງຈັນ ເພື່ອເກັບກຳຂໍ້ມູນຈາກອີກຝາກໜຶ່ງຂອງດວງຈັນ ທີ່ບໍ່ເຄີຍເຫັນມາຍັງໂລກ.

ເຊິ່ງຍານສຳຫຼວດສາງເອີ-4 ອອກເດີນທາງຈາກໂລກເມື່ອວັນທີ 8 ທັນວາ 2018 ແລະ ເຂົ້າສູ່ວົງໂຄຈອນຂອງດວງຈັນເມື່ອວັນທີ 30 ທັນວາ 2018 ເປັນຍານສຳຫຼວດດວງຈັນລຳທີ 2 ຂອງຈີນໃນຮອບ 5 ປີ ຕໍ່ຈາກຍານສຳຫຼວດ “ຢວີທູ” ທີ່ແປວ່າ “ກະຕ່າຍຢົກ” ເຊິ່ງລົງຈອດເທິງດວງຈັນເມື່ອເດືອນທັນວາ 2013 ແຕ່ບໍ່ໄດ້ລົງຈອດບໍລິເວນດ້ານມືດສ່ວນນີ້. ອີກຢ່າງໜຶ່ງ, ອົງການບໍລິຫານອະວະກາດແຫ່ງຊາດຈີນ ກໍ່ກຳລັງພັດທະນາ “ສາງເອີ-5” ສຳລັບໄປເກັບກັບຕົວຢ່າງຫິນເທິງດວງຈັນ ໂດຍມີກຳນົດອອກເດີນທາງພາຍໃນປີນີ້.