ຜູ້ນຳຍີ່ປຸ່ນກ່າວ ພ້ອມທີ່ຈະຊຸກດັນໃຫ້ເກີດສົນທິສັນຍາສັນຕິພາບ ຮ່ວມກັບລັດເຊຍ

Russian President Vladimir Putin (R) meets with Japan's Prime Minister Shinzo Abe in Singapore on November 14, 2018. (Photo by Alexey DRUZHININ / SPUTNIK / AFP)

ສຳນັກຂ່າວຕ່າງປະເທດລາຍງານ 4 ມັງກອນ 2019 ທີ່ຜ່ານມາວ່າ: ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ໄດ້ປະກາດເຖິງຄວາມຕັ້ງໃຈທີ່ຈະຊຸກດັນໃຫ້ເກີດສົນທິສັນຍາສັນຕິພາບສົງຄາມໂລກ ຄັ້ງທີ 2 ຮ່ວມກັບລັດເຊຍ ຫຼັງຈາກທີ່ບັນຫາຄວາມຂັດແຍ່ງເໜືອດິນແດນລະຫວ່າງສອງປະເທດ ກາຍເປັນອຸປະສັກທີ່ສົ່ງຜົນໃຫ້ເລື່ອງດັ່ງກ່າວແກ່ຍາວມາຫຼາຍທົດສະວັດ ໃນກອງປະຊຸມທີ່ຈະຈັດຂຶ້ນໃນທ້າຍເດືອນນີ້ ທີ່ລັດເຊຍ.

ໂດຍກອງປະຊຸມດັ່ງກ່າວຈະເປັນການປະຊຸມຄັ້ງທີ 25 ລະຫວ່າງທ່ານ ຊິນໂຊ ອາເບະ ແລະ ທ່ານ ວະລາດິເມຍ ປູຕິນ ປະທານປະເທດລັດເຊຍ ທີ່ມີຈຸດປະສົງເພື່ອຢຸດຕິຄວາມຂັດແຍ່ງໃນໝູ່ເກາະທີ່ເຄີຍຖືກຢຶດຄອງໂດຍກອງທັບໂຊວຽດ ໃນໄລຍະທ້າຍຂອງສົງຄາມ.

ທ່ານ ຊິນໂຊ ອາເບະກ່າວວ່າ: ຂ້າພະເຈົ້າຈະເດີນທາງໄປຍັງລັດເຊຍໃນທ້າຍເດືອນນີ້ ແລະ ມີຄວາມຕັ້ງໃຈຈະຊຸກດັນໃຫ້ເກີດການເຈລະຈາກ່ຽວກັບສົນທິສັຍາສັນຕິພາບ ພ້ອມທັງກ່າວວ່າບັນຫາດັ່ງກ່າວບໍ່ມີຄວາມຄືບໜ້າທີ່ເປັນຮູບປະທຳມາຍາວນານກວ່າ 70 ປີແລ້ວ.

ເຖິງແມ່ນວ່າຈະຍັງບໍ່ມ່ສິ່ງໃດຮັບຮອງໄດ້ວ່າສົນທິສັນຍາດັ່ງກ່າວຈະເກີດຂຶ້ນຈິງ ແຕ່ທັງສອງປະເທດກໍ່ໄດ້ໃຫ້ການຮ່ວມມືກັນໃນບັນຫາທີ່ບໍ່ກ່ຽວຂ້ອງກັບເກາະເຊັ່ນ: ເສດຖະກິດເປັນຢ່າງດີ ໃນໄລຍະ 2 ປີຜ່ານມາຢ່າງບໍ່ເຄີຍມີມາກ່ອນ.

ໃນການປະຊຸມທີ່ເມືອງວະລາດິວອສຕັອກ ປີ 2018 ທ່ານ ປູຕິນ ໄດ້ສະເໜີໃຫ້ລັດເຊຍ ແລະ ຍີ່ປຸ່ນ ຮ່ວມລົງນາມໃນສົນທິສັນຍາສັນຕິພາບພາຍໃນປີ 2018 ໂດຍບໍ່ມີເງື່ອນໄຂໃດໆ ເຊິ່ງທ່ານ ຊິນໂຊ ອາເບະ ກໍ່ໄດ້ປະຕິເສດໃນພາຍຫຼັງ ໂດຍກ່າວຢ້ຳເຖິງຈຸດຢືນຂອງຍີ່ປຸ່ນວ່າ ຈະຕ້ອງຕອບຄຳຖາມໃຫ້ໄດ້ຢ່າງຊັດເຈນກ່ອນວ່າ ອຳນາດອະທິປະໄຕໃນໝູ່ເກາະເຫຼົ່ານັ້ນເປັນຂອງຝ່າຍໃດ.

ເຖິງຢ່າງໃດກໍ່ຕາມ, ຫຼັງຈາກທີ່ຜູ້ນຳສອງປະເທດໄດ້ພົບກັນອີກຄັ້ງ ທີ່ປະເທດສິງກະໂປ ເມື່ອເດືອນພະຈິກ 2018 ທີ່ຜ່ານມາ ທ່ານ ຊິນໂຊ ອາເບະ ກໍ່ໄດ້ໃຫ້ສຳພາດກັບນັກຂ່າວວ່າ: ຍີ່ປຸ່ນ ແລະ ລັດເຊຍເຫັນດີຮ່ວມກັນທີ່ຈະເລັ່ງເຈລະຈາ ໂດຍໃຊ້ເນື້ອໃນຈາກຖະແຫຼງການຮ່ວມປີ 1956 ທີ່ນະຄອນຫຼວງມົດສະກູ ອັນໄດ້ຕົກລົງໄວ້ວ່າຈະໂອນໝູ່ເກາະນ້ອຍໆ ທັງສອງໃຫ້ແກ່ຍີ່ປຸ່ນ ຫຼັງຈາກມີການລົງນາມໃນສົນທິສັນຍາສັນຕິພາບຮຽບຮ້ອຍແລ້ວ ມາເປັນຂໍ້ສະຫຼຸບ ໂດຍທ່ານ ຊິນໂຊ ອາເບະ ກ່າວອີກວ່າ ທັງສອງປະເທດບໍ່ຕ້ອງການໃຫ້ບັນຫາດັ່ງກ່າວແກ່ຍາວອອກໄປອີກຕື່ມ.