ສ.ອາເມຣິກາ ກັບມາຕັ້ງເງື່ອນໄຂ ຈາກທີ່ເຄີຍກ່າວວ່າຈະຖອນທະຫານອອກຈາກຊີຣີ

(Photo by DELIL SOULEIMAN / AFP)

ສຳນັກຂ່າວຕ່າງປະເທດລາຍງານ 7 ມັງກອນ 2018 ວ່າ: ສືບເນື່ອງຈາກການທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ປະກາດເມື່ອວັນທີ 19 ທັນວາ 2018 ທີ່ຜ່ານມາ ເລື່ອງການຖອນທະຫານອາເມຣິກາ ທີ່ມີຢູ່ທັງໝົດປະມານ 2,000 ຄົນ ອອກຈາກຊີຣີພາຍໃນໄລຍະເວລາ 30 ວັນ ກ່ອນທີ່ອີກ 2​ ອາທິດຕໍ່ມາໃຊ້ຄຳວ່າຄ່ອຍເປັນຄ່ອຍໄປ ແລະ ຂະຫຍາຍກອບເວລາອອກໄປເປັນ 120 ວັນ, ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງປະຈຳທຳນຽບຂາວ ກ່າວໃນລະຫວ່າງການຢ້ຽມຢາມອິດສະຣາແອນ ເມື່ອວັນອາທິດ ທີ່ຜ່ານມາວ່າ: ເຖິງແມ່ນວ່າການຖອນທະຫານຕ້ອງເກີດຂຶ້ນຕາມຄຳສັ່ງຂອງຜູ້ນຳສະຫະລັດ ອາເມຣິກາ ແຕ່ຈະຕ້ອງຕັ້ງຢູ່ບົນເງື່ອນໄຂທີ່ວ່າ ກຸ່ມ IS ປະລາໄຊຢ່າງຮາບຄາບຈົນບໍ່ສາມາດພື້ນຕົວກັບມາເປັນໄພຄຸກຄາມໄດ້ອີກ.

ຂະນະດຽວກັນ, ສະຫະລັດ ອາເມຣິກາຕ້ອງການຢືນຢັນຄວາມປອດໄພ ໃຫ້ກັບກອງກຳລັງປ້ອງກັນຕົນເອງຊາວເຄິດ (YPG) ທີ່ຕົນໃຫ້ການສະໜັບສະໜູນ ເຊິ່ງປັດຈຸບກຳລັງຢຶດຄອງພື້ນທີ່ທາງພາກເໜືອຂອງຊີຣີ ແລະ ອາດມີການຮັກສາກຳລັງທະຫານໄວ້ບາງສ່ວນກ່ອນ ເພື່ອປ້ອງກັນກິດຈະກຳທາງການທະຫານຂອງອີຣານໃນພື້ນທີ່ນັ້ນ ໂດຍທ່ານ ຈອນ ໂບຕັ້ນ ກ່າວວ່າຈະປຶກສາຫາລືເລື່ອງນີ້ກັບທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ໃນລະຫວ່າງການຢ້ຽມຢາມຕວັກກີເພີ່ມເຕີມ ເຊິ່ງລັດຖະບານຕວັກກີປະກາດລ່ວງໜ້າມາໄດ້ໄລຍະໜຶ່ງແລ້ວວ່າ ໄດ້ກຽມຈະປະຕິບັດການທາງທະຫານຝ່າຍດຽວໃນເຂດພາກເໜືອຂອງຊີຣີ ເພື່ອກວາດລ້າງກຸ່ມ YPG ທີ່ຖືເປັນສ່ວນໜຶ່ງຂອງພັກແຮງງານເຄິດິສຖານ (PKK) ເຊິ່ງສູ້ຮົບກັບກອງທັບຕວັກກີມາຍາວນານກວ່າ 3 ທົດສະຫວັດ ເພື່ອແບ່ງແຍກດິນແດນບາງສ່ວນທາງພາກໃຕ້ຂອງປະເທດ.

ເຊິ່ງຄຳກ່າວຂອງທ່ານ ຈອນ ໂບຕັ້ນ ຖືເປັນການສົ່ງສັນຍານຢ່າງມີຄວາມໝາຍຄວາມສຳຄັນວ່າ ການຖອນທະຫານອາເມຣິກາອອກຈາກຊີຣີ ອາດລ່າຊ້າອອກໄປອີກ, ໃນດ້ານຂອງທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ໃຫ້ຄວາມສຳຄັນກັບບັນຫາພູພຽງໂກລັນຫຼາຍກວ່າ ໂດຍກ່າວວ່າລັດຖະບານອິດສະຣາແອນຈະໃຊ້ໂອກາດນີ້ພະຍາຍາມອີກຄັ້ງ ໃນການໃຫ້ສະຫະລັດ ອາເມຣິກາຍອມຮັບເອົາວ່າອານາເຂດທັງໝົດຂອງພູພຽງໂກລັນແຫ່ງນີ້ເປັນຂອງອິດສະຣາແອນ.

ພູພຽງໂກລັນ ມີອານາເຂດ 1,800 ຕາລາງກິໂລແມັດ ຕັ້ງຢູ່ລະຫວ່າງກາງຊາຍແດນຝັ່ງຕາເວັນຕົກຂອງຊີຣີກັບຝັ່ງຕາເວັນອອກຂອງອິດສະຣາແອນ ແຕ່ອິດສະຣາແອນໄດ້ຢຶດຄອງພື້ນທີ່ 1,200 ຕາລາງກິໂລແມັດ ພາຍຫຼັງຊະນະສົງຄາມອາຣັບ-ອິດສະຣາແອນ ຫຼື ສົງຄາມ 6 ວັນ ເມື່ອປີ 1967 ເຫຼືອພື້ນທີ່ໃຫ້ຊີຣີພຽງ 600 ຕາລາງກິໂລແມັດ, ເຖິງຢ່າງໃດກໍ່ຕາມ ສະຫະປະຊາຊາດບໍ່ເຄີຍຮັບຮອງການຢຶດຄອງພູພຽງໂກລັນຂອງອິດສະຣາແອນ ນອກຈາກນີ້ ທ່ານ ເບນຈາມິນ ເນທັນຢາຮູ ຂໍໃຫ້ທ່ານ ໂດໂນ ທຣຳ ຊ່ວຍຮັບຮອງພູພຽງໂກລັນມາແລ້ວຄັ້ງໜຶ່ງ ເມື່ອປີ 2017 ແຕ່ຜູ້ນຳສະຫະລັດ ອາເມຣິກາຍັງບໍ່ຕອບຮັບ ຫຼື ປະຕິເສດ.