ຕຳຫຼວດເນປານ ເລີ່ມດຳເນີນການສືບສວນນັກຈຳສິນຊື່ດັງ ທີ່ຖືກກ່າວຫາລ່ວງລະເມີດທາງເພດຫຼາຍຄັ້ງ

(FILES Nepali spiritual leader Ram Bahadur Bomjan (Photo by PANKAJ SHRESTHA / AFP)

ສຳນັກຂ່າວຕ່າງປະເທດລາຍງານ 7 ມັງກອນ 2019 ວ່າ: ທ້າວ ຣາມะ ບາຮາດູ ບອມຈັນ ທີ່ມີສາຍານາມວ່າພະພຸດທະເຈົ້ານ້ອຍ ເຊິ່ງເລີ່ມມີຊື່ສຽງມາຕັ້ງແຕ່ປີ 2005 ພາຍຫຼັງຜູ້ມີຈິດສັດທາເຫຼື່ອມໃສລະບຸວ່າ: ທ້າວ ບອມຈັນ ນັ່ງສະມາທິໂດຍບໍ່ເຄື່ອນໄຫວໄດ້ດົນຫຼາຍເດືອນໂດຍບໍ່ດື່ມນ້ຳ ແລະ ບໍ່ກິນອາຫານ ຢູ່ໃນປ່າ ປະເທດເນປານ.

ແຕ່ຜູ້ນຳດ້ານຈິດວິນຍານຊາວເນປານ ໃນໄວອາຍຸ 28 ປີຜູ້ມີລູກສິດຈຳນວນໜຶ່ງ ໄດ້ຖືກກ່າວຫາວ່າລ່ວງລະເມີດທາງເພດ ແລະ ຮ່າງກາຍລູກສິດບາງຄົນ.

ເລື່ອງນີ້ທ່ານ ອຸມາ ປຣາສາດ ຊາຕູເບດີ ໂຄສົກສຳນັກງານຕຳຫຼວດສືບສວນສອບສວນສູນກາງຂອງເນປານກ່າວວ່າ ຕຳຫຼວດໄດ້ເລີ່ມດຳເນີນການສືບສວນສອບສວນແລ້ວ ພາຍຫຼັງໄດ້ຮັບການຮ້ອງຟ້ອງຕໍ່ກັບທ້າວ ບອມຈັນ ເນື່ອງຈາກຄອບຄົວລູກສິດ 4 ຄົນໄດ້ມາແຈ້ງຄວາມກັບເຈົ້າໜ້າທີ່ວ່າ: ລູກສິດ 4 ຄົນຫາຍຕົວໄປຈາກອາສົມ (ບ່ອນຈຳສິນລືສີ) ເຊິ່ງການສອບສວນຄະດີນີ້ເປັນພຽງຂະບວນການເລີ່ມຕົ້ນເທົ່ານັ້ນ ຈຶ່ງບໍ່ສາມາດທີ່ຈະໃຫ້ລາຍລະອຽດໄດ້ຫຼາຍກວ່ານີ້.

ທ້າວ ບອມຈັນ ຖືກກ່າວຫາເລື່ອງການລ່ວງລະເມີດມາຢ່າງຕໍ່ເນື່ອງ ເຖິງແມ່ນວ່າຈະມີຜູ້ເຫຼື່ອມໃສສັດທາຈຳນວນຫຼາຍພັນຄົນຍອມເຂົ້າຄິວລໍຖ້າຫຼາຍມື້ ເພື່ອຂໍໃຫ້ໄດ້ມາເບິ່ງມາຊົມການນັ່ງສະມາທິໃນປ່າເລິກ, ເຊັ່ນເມື່ອເດືອນກັນຍາ 2018 ແມ່ຊີອາຍຸ 18 ປີ ກ່າວຫາວ່າທ້າວ ບອມຈັນ ຂົ່ມຂືນໃນອາສົມແຫ່ງໜຶ່ງ ແລະ ມີອີກວ່າສິບຄົນກ່າວຫາຕື່ມອີກວ່າຖືກລ່ວງລະເມີດທາງຮ່າງກາຍ ແຕ່ຜູ້ນຳດ້ານຈິດວິນຍານດັ່ງກ່າວອ້າງວ່າ ຕ້ອງທຸບຕີເພາະມາລົບກວນການນັ່ງສະມາທິຂອງຕົນ.