ລັດເຊຍຈະຊ້ອມຮົບຄັ້ງໃຫຍ່ທີ່ສຸດໃນປະຫວັດສາດ ໂດຍຈະມີຈີນ ແລະ ມົງໂກລີເຂົ້າຮ່ວມດ້ວຍ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhdvS4e6kKUlswW-XO8FJCC9HsbNv92BLcNZtdNf70S3LxeiSDcCnPHTN9pRF5Zt9ufRDqieVytX7EUVxCm0xyhyIBSxYVqYLM9FVNYmapSOUVRz-DnCPzkywEbt3LKV0J3ZJWX1017O6w/s1600/000_SL37U.jpg)
ສຳນັກຂ່າວຕ່າງປະເທດລາຍງານເມື່ອວັນທີ 28 ສິງຫາ 2018 ທີ່ຜ່ານມາວ່າ: ທ່ານ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍຖະແຫຼງວ່າ ລັດເຊຍຈະຈັດຊ້ອມຮົບຄັ້ງຍິ່ງໃຫຍ່ໃນລະຫວ່າງວັນທີ 11-15 ກັນຍາ 2018 ນີ້ ພາຍໃຕ້ຊື່ລະຫັດ “Vostok-2018” (ຕາເວັນອອກ-2018) ໃນພື້ນທີ່ເຂດທະຫານພາກກາງ ແລະ ພາກຕາເວັນອອກຂອງລັດເຊຍ ເຊິ່ງຈະມີກຳລັງພົນເຂົ້າຮ່ວມທັງໝົດ 300,000 ຄົນ, ພາຫະນະທາງອາກາດ 1,000 ລຳ, ກອງເຮືອຂອງລັດເຊຍອີກ 2 ກອງເຮືອ ແລະ ທະຫານອາກາດທັງໝົດ ລວມທັງຍັງມີກອງທະຫານຈາກຈີນ ແລະ ມົງໂກລີເຂົ້າຮ່ວມຊ້ອມຮົບອີກດ້ວຍ.
ການຊ້ອມຮົບໃນຄັ້ງນີ້ເກີດຂຶ້ນໃນຊ່ວງທີ່ສະຖານະການເຂົ້າຂັ້ນເຄັ່ງຕຶງລະຫວ່າງລັດເຊຍ ກັບ ບັນດາປະເທດຕາເວັນຕົກ ເຊິ່ງຫຼາຍຝ່າຍສະແດງຄວາມເປັນຫ່ວງວ່າ ຈະເປັນການເສີມສ້າງກຳລັງທາງທະຫານຢ່າງບໍ່ຖືກຕ້ອງເພື່ອຕໍ່ຕ້ານກຳລັງທະຫານຂອງອົງການສົນທິສັນຍາອາກລັງຕິກເໜືອ (NATO) ໃນຝັ່ງຕາເວັນຕົກຂອງລັດເຊຍ ເຊິ່ງທາງຝ່າຍ NATO ເອງກໍ່ກຽມຄວາມພ້ອມໄວ້ເຊັ່ນກັນໃນເອີຣົບຕາເວັນອອກ ເພື່ອປ້ອງກັນຫາກເກີດການໃຊ້ປະຕິບັດການທາງທະຫານ ຫຼັງຈາກລັດເຊຍໄດ້ລວມເອົາດິນແດນໄຄຼເມຍຈາກອູແກຣນເມື່ອປີ 2014.
ນອກຈາກນັ້ນການຊ້ອມຮົບໃນຄັ້ງນີ້ຍັງອາດສ້າງຄວາມບໍ່ພໍໃຈໃຫ້ກັບຍີ່ປຸ່ນ ເຊິ່ງໄດ້ຮຽກຮ້ອງໄປແລ້ວວ່າລັດເຊຍກຳລັງເສີມກຳລັງທາງທະຫານໃນພາກຕາເວັນອອກໄກ ເຊິ່ງທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນມີກຳນົດໄປຮ່ວມປະຊຸມທີ່ເມືອງວະລາດິວອສຕັອກໃນຊ່ວງທີ່ມີການຊ້ອມຮົບພໍດີ ແລະ ເຈົ້າໜ້າທີ່ກະຊວງການຕ່າງປະເທດຂອງຍີ່ປຸ່ນກ່າວວ່າ ລັດຖະບານຍີ່ປຸ່ນໃຫ້ຄວາມສຳຄັນກັບການຮ່ວມມືທາງທະຫານລະຫວ່າງລັດເຊຍກັບຈີນ.
ລັດຖະມົນຕີກະຊວງປ້ອງກັນປະເທດລັດເຊຍກ່າວຢືນຢັນອີກວ່າ: ການຊ້ອມຮົບ “Vostok-2018” ຖືວ່າໃຫຍ່ທີ່ສຸດນັບຕັ້ງແຕ່ການຊ້ອມຮົບສະໄໝສະຫະພາບໂຊວຽດ ພາຍໃຕ້ຊື່ລະຫວັດຊາປາດ-81 (ຕາເວັນຕົກ-81) ໃນປີ 1981.
ໃນດ້ານຂອງທ່ານ ດະມິທຣີ ເປສຄັອບ ໂຄສົກປະທານປະເທດລັດເຊຍຖະແຫຼງວ່າ ການທີ່ກອງທັບຈີນເຂົ້າຮ່ວມການຊ້ອມຮົບດ້ວຍສະແດງໃຫ້ເຫັນເຖິງການຮ່ວມມືທາງດ້ານການທະຫານຢ່າງເຂັ້ມແຂງລະຫວ່າງລັດເຊຍກັບຈີນ ແລະ ສຳນັກຂ່າວຊິນຫົວຂອງທາງການຈີນລາຍງານວ່າ ຈີນມີແຜນທີ່ຈະສົ່ງກຳລັງພົນ 3,200ຄົນ ແລະ ໜ່ວຍອາວຸດອີກ 900 ໜ່ວຍເຂົ້າຮ່ວມຊ້ອມຮົບກັບລັດເຊຍ.
(ພາບການຊ້ອມຮົບ ຊາປາດ 2017)
![](https://blogger.googleusercontent.com/img/b/R29vZ2xl/AVvXsEiwqakgqHHoQqEXb45aMvWatqsp-Eyd1exuQJK74_50UUO7MmFsktLTtadFRsEx9ZxHzLf867EWuKDspnlbvGyzrP_WANVatTiHsSuC3Dit4l7xDR3g3nrYNgSCieNv3SoajZLkzZFLprs/s1600/000_SL371.jpg)
![](https://blogger.googleusercontent.com/img/b/R29vZ2xl/AVvXsEgY-ZI96j3qdBUDauXkQf9Bv9Ty6llGlUCofMJwDuE0LjqKOvz-Da1t06gxGuJOFkbOH8B8x5NAtKFXUX6fH_Djt1H1iprcCWUHb8hStCaHcR13_qt7h0NSV0iHkJKRxwbRbpS2eWe8cVs/s1600/000_SJ64P.jpg)
![](https://blogger.googleusercontent.com/img/b/R29vZ2xl/AVvXsEjcauAYd0pwhHWsOE-GGru3uTM0BZEjaZeA3_OpQF3Kso3UZUWOrVlkeHh7oNTKYbyRASxqXb8enZfweB5MIcu13tPNY2-6w_XOMbCjtxhuqoZDzI61JPQ_ma1JEstWQUoBEDRhrQLW4xU/s1600/000_SJ643.jpg)
![](https://blogger.googleusercontent.com/img/b/R29vZ2xl/AVvXsEiqi6qY7CJ5-p5IUjtN7BTD7PtIsuaTHEnxdoRzqqdUZK4L2AdA-nCDltoI_DVxNl8zQHJlnrFRixJ5ToLhRvjdAiyQN0yxPeJEmDa1NDpGyG5g1WS5NiG5Qdxbre8_8_ohoGjzqYrYwsA/s1600/000_SL3W7.jpg)
![](https://blogger.googleusercontent.com/img/b/R29vZ2xl/AVvXsEg-M571ExSBvFk2xPgR9VCUCCkB4O-jG-Ln1TTkkb8Ocl3IRlLJzAtrsd5_h03lFuMkZCLYzLtdn2vunfmc0Q5b_w-8_PoyCpFsEZb0nLPGfBv-h-xQElbMDtZisk9ZMmtL9Hc3211SVrM/s1600/000_SK3X2.jpg)
![](https://blogger.googleusercontent.com/img/b/R29vZ2xl/AVvXsEims8iQhksQ3Qp06ysDWVqMHXlFvbuQloztjcim-NQyFZgU258FpHTFY9HsFPROjhJAq_tJpwaPH9fLm3N__hOktWd9Q2xkLW1WQ9mlLAp5jv18J2sX5zWxvTWcv0YkVAv9LrZHn_Ysf1U/s1600/000_SI500.jpg)
![](https://blogger.googleusercontent.com/img/b/R29vZ2xl/AVvXsEhutTH7jb4XFAwN13Ogv2r45hxTw9gQ8kclY-pD6iGnnXsrxDHp13aHuqceIqCcBiVn1t6R0SbBhKINKFRajYOAw2c-BeKlqlcv6Gz_6cltF9v0UGsL1k_qiqO7y9Q2WTmnGWNcpd4ijik/s1600/000_SL3X1.jpg)
![](https://blogger.googleusercontent.com/img/b/R29vZ2xl/AVvXsEiGXyH6dqTdeO_C5LuLZM8anTsLeD20mcKRslGq2wha6lXCBEneoeBXOM_bcFigDsGp7vHnyC1ckOwh2MHTJ29Ev7Y9iu_SVVHeUZnLFVAUc9DkjN3b1ORS8iTgGbpKlh0eZ94232DCZ8I/s1600/000_SL3XT.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ