ຍີ່ປຸ່ນເລີ່ມເກັບພາສີຂາອອກຈາກປະເທດກັບທຸກສັນຊາດ 1,000 ເຢນຕໍ່ຄົນ

(Photo by Kazuhiro NOGI / AFP)

ສຳນັກຂ່າວຕ່າງປະເທດລາຍງານ 7 ມັງກອນ 2019 ວ່າ: ສຳນັກງານນາຍົກລັດຖະມົນຕີຍີ່ປຸ່ນອອກຖະແຫຼງການວ່າ ການເກັບພາສີຂາອອກສຳລັບນັກທ່ອງທ່ຽວ ແລະ ນັກທຸລະກິດທຸກຄົນ ບໍ່ວ່າຈະຖືສັນຊາດໃດກໍ່ຕາມທີ່ຮຽກວ່າ “ພາສີຊາໂຢນາຣະ” ຫຼື ຄ່າທຳນຽບການອອກຈາກແຜ່ນດິນ ໃນອັດຕາຄົນລະ 1,000​ ເຢນ (ປະມານ 80,000 ກີບ) ມີຜົນບັງຄັບໃຊ້ແລ້ວຢ່າງເປັນທາງການ ເຊິ່ງລາຄາດັ່ງກ່າວຈະລວມຢູ່ໃນປີ້ໂດຍສານຖ້ຽວບິນໂດຍອັດຕະໂນມັດ ແລະ ມີຜົນກັບພົນລະເມືອງທີ່ມີອາຍຸ 2 ປີຂຶ້ນໄປ ແຕ່ຜູ້ໂດຍສານທີ່ແວ່ພັກປ່ຽນຖ້ຽວບິນຢູ່ຍີ່ປຸ່ນພາຍໃນໄລຍະເວລາບໍ່ເກີນ 24 ຊົ່ວໂມງຈະໄດ້ຮັບການຍົກເວັ້ນ.

ເຊິ່ງລັດຖະບານຍີ່ປຸ່ນພາຍໃຕ້ການນຳຂອງທ່ານ ຊິນໂຊ ອາເບະ ຕັ້ງເປົ້າເກັບພາສີດັ່ງກ່າວໃຫ້ໄດ້ 50,000 ລ້ານເຢນ ໃນປີງົບປະມານ 2019 ເພື່ອນຳໄປພັດທະນາລະບົບພື້ນຖານໂຄງລ່າງດ້ານການທ່ອງທ່ຽວທີ່ກ່ຽວຂ້ອງເຊັ່ນ: ການປະຕິຮູບລະບົບກວດຄົນເຂົ້າເມືອງ ແລະ ການສ້າງກະແສທ່ອງທ່ຽວເມືອງທີ່ຍັງບໍ່ທັນມີຊື່ສຽງ.

ໂດຍສະຖິຕິນັກທ່ອງທ່ຽວຕ່າງປະເທດເຂົ້າສູ່ຍີ່ປຸ່ນເມື່ອປີທີ່ຜ່ານມາ ມີຫຼາຍກວ່າ 30 ລ້ານຄົນ ສູງທີ່ສຸດເປັນປະຫວັດສາດ ແລະ ລັດຖະບານຕັ້ງເປົ້າດຶງດູດນັກທ່ອງທ່ຽວໃຫ້ໄດ້ 40 ລ້ານຄົນພາຍໃນປີ 2020 ເຊິ່ງເປັນປີທີ່ນະຄອນຫຼວງໂຕກຽວຈະເປັນເຈົ້າພາບຈັດການແຂ່ງຂັນກີລາໂອລິມປິກ.