ຜູ້ນຳເກົາຫຼີເໜືອຢ້ຽມຢາມຈີນຢ່າງເປັນທາງການ ທ່າມກາງກະແສຂ່າວກຽມພົບຜູ້ນຳ ສ.ອາເມຣິກາ ຮອບ 2

PHOTO: Korean Central News Agency

ສຳນັກຂ່າວຕ່າງປະເທດລາຍງານ 8 ມັງກອນ 2019 ວ່າ: ສຳນັກຂ່າວ Xinhua ຂອງທາງການຈີນ ແລະ ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອ ລາຍງານໃນເວລາໃກ້ຄຽງກັນວ່າ: ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ພ້ອມດ້ວຍທ່ານ ນາງ ຣີ ຊອນ-ຈູ ພັນລະຍາ ແລະ ຄະນະ ເດີນທາງຢ້ຽມຢາມນະຄອນຫຼວງປັກກິ່ງຢ່າງເປັນທາງການ ໃນລະຫວ່າງວັນທີ 7-10 ມັງກອນ ນີ້, ໂດຍເປັນການເດີນທາງດ້ວຍຂະບວນລົດໄຟອອກຈາກນະຄອນຫຼວງປຽງຢາງ ເມື່ອວັນຈັນ ຖືເປັນການຢ້ຽມຢາມຈີນຄັ້ງທຳອິດໃນປີນີ້ຂອງທ່ານ ຄິມ ຈອງ-ອຶນ ແລະ ເປັນການພົບປະຫາລືຄັ້ງທີ 4 ກັບທ່ານ ສີ ຈິ້ນຜິງ ປະທານປະເທດຈີນ.

ເຊິ່ງທ່ານ ຄິມ ຈອງ-ອຶນ ພົບປະຫາລືກັບທ່ານ ສີ ຈິ້ນຜິງ 3 ຄັ້ງທີ່ຈີນເມື່ອປີທີ່ຜ່ານມານັ້ນ ທຸກຄັ້ງລ້ວນເປັນການປະຊຸມທີ່ເກີດຂຶ້ນກ່ອນ ແລະ ຫຼັງການພົບປະຫາລືລະຫວ່າງຜູ້ນຳເກົາຫຼີເໜືອ ກັບ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ທ່ານ ມູນ ແຈ-ອິນ ປະທານປະເທດເກົາຫຼີໃຕ້, ໂດຍຫຼາຍຝ່າຍວິເຄາະການຢ້ຽມຢາມນະຄອນຫຼວງປັກກິ່ງຂອງຜູ້ນຳເກົາຫຼີເໜືອໃນຄັ້ງນີ້ ອາດເປັນການສົ່ງສັນຍານວ່າການພົບປະຫາລືລະຫວ່າງຜູ້ນຳເກົາຫຼີເໜືອ ກັບ ຜູ້ນຳສະຫະລັດ ອາເມຣິກາ ຄັ້ງທີ 2 ກຳລັງຈະເກີດຂຶ້ນໃນໄວໆນີ້ຫຼືບໍ່ ພາຍຫຼັງການພົບປະກັນຄັ້ງປະຫວັດສາດທີ່ສິງກະໂປ ເມື່ອເດືອນມິຖຸນາ 2018 ທີ່ຜ່ານມາ.

ຂະນະດຽວກັນ, ເນື້ອໃນຕອນໜຶ່ງຂອງຄຳກ່າວອວຍພອນປີໃໝ່ປີນີ້ຂອງຜູ້ນຳເກົາຫຼີເໜືອ ມີເນື້ອໃນວ່າ ເຖິງແມ່ນວ່າລັດຖະບານເກົາຫຼີເໜືອຈະຍັງຄົງເປີດກວ້າງສະເໝີສຳລັບໂອກາດໃນການເຈລະຈາເປັນຄັ້ງທີ 2 ກັບຜູ້ນຳສະຫະລັດ ອາເມຣິກາ ແຕ່ທິດທາງຂອງສາຍພົວພັນໃນອະນາຄົດອັນໃກ້ນີ້ ອາດປ່ຽນແປງ ຕາບໃດທີ່ລັດຖະບານສະຫະລັດ ອາເມຣິກາ ຍັງຄົງຂວໍ້າບາດເກົາຫຼີເໜືອຢູ່ແບບນີ້ອີກຕໍ່ໄປ. ນອກນີ້, ການພົບປະລະຫວ່າງຜູ້ນຳເກົາຫຼີເໜືອ ກັບ ຜູ້ນຳຈີນໃນຄັ້ງນີ້ຄາດວ່າເກົາຫຼີເໜືອ ອາດຈະຂໍການສະໜັບສະໜູນຈາກລັດຖະບານຈີນ ໃນການຊຸກດັນໃຫ້ເກີດການຜ່ອນຜາຍມາດຕະການຂວ້ຳບາດ.