ປະທານທະນາຄານໂລກລາອອກ ກ່ອນຄົບວາລະໃນປີ 2022

World Bank President Jim Yong Kim (Photo by SAUL LOEB / AFP)

ສຳນັກຂ່າວຕ່າງປະເທດລາຍງານເມື່ອວັນທີ 7 ມັງກອນ 2019 ທີ່ຜ່ານມາວ່າ: ທ່ານ ຈິມ ຢອງ-ຄິມ ອາຍຸ 59 ປະທານທະນາຄານໂລກ ຊາວອາເມຣິກາເຊື້ອສາຍເກົາຫຼີ ປະກາດລາອອກຈາກຕຳແໜ່ງໃນວັນທີ 1 ກຸມພາ 2019 ນີ້ ຈາກທີ່ມີວາລະການດຳລົງດຳແໜ່ງເຖິງປີ 2022 ແລະ ອາດຈະເຮັດໃຫ້ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ມີອຳນາດໃນການຕັດສິນໃຈກ່ຽວກັບປະທານຄົນໃໝ່ຂອງສະຖາບັນການເງິນ ເພື່ອການພັດທະນາເສດຖະກິດໂລກ.

ຖະແຫຼງການຂອງທ່ານ ຈິມ ຢອງ-ຄິມ ລະບຸວ່າ: ຖືເປັນກຽດຢ່າງຍິ່ງສຳລັບຕົວທ່ານ ໃນການປະຕິບັດໜ້າທີ່ປະທານສະຖາບັນການເງິນອັນດີເລີດແຫ່ງນີ້ ທີ່ເຕັມໄປດ້ວຍບຸກຄົນທີ່ອຸທິດຕົນໃຫ້ກັບພາລະກິດຢຸດຕິຄວາມທຸກຍາກໃນຊ່ວງຊີວິດຂອງຕົນ ເຊິ່ງທະນາຄານໂລກໄດ້ກຳນົດເປົ້າໝາຍລົບລ້າງຄວາມທຸກຍາກໃຫ້ໝົດໄປພາຍໃນປີ 2030.

ທ່ານ ຈິມ ຢອງ-ຄິມ ທີ່ດຳລົງຕຳແໜ່ງປະທານທະນາຄານໂລກມາແຕ່ປີ 2012 ພາຍຫຼັງລາອອກມີເປົ້າໝາຍຈະໄປຮ່ວມງານກັບບໍລິສັດດ້ານການລົງທຶນ ທີ່ຍັງບໍ່ໄດ້ເປີດເຜີຍຊື່ ໃນປະເທດກຳລັງພັດທະນາ ແລະ ຈະກັບໄປເປັນກຳມະການບໍລິຫານອົງການ Partners-in-Health ທີ່ທ່ານເປັນຜູ້ຮ່ວມສ້າງຕັ້ງຂຶ້ນມາ, ນອກນີ້, ຖະແຫຼງການຂອງທະນາຄານໂລກລະບຸວ່າ: ທ່ານ ນາງ ຄຼິສຕາລິນາ ຈໍຈີວາ ປະທານເຈົ້າໜ້າທີ່ບໍລິຫານຂອງທະນາຄານໂລກຈະປະຕິບັດໜ້າທີ່ຮັກສາການປະທານທະນາຄານໂລກແທນ.