ທ່ານນາຍົກເນັ້ນໜັກ 15 ບັນຫາໃນຂະແໜງແຜນການ-ການເງິນ 2019

Thongloun Sisoulith Prime Minister of Laos (PHOTO: KPL)

ສຳນັກຂ່າວສານປະເທດລາວ (KPL) ລາຍງານວ່າ: ໃນວັນທີ 8 ມັງກອນ 2019 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເຂົ້າຮ່ວມ ແລະ ໂອ້ລົມຕໍ່ກອງປະຊຸມສະຫຼຸບການຈັດຕັ້ງປະຕິບັດ ວຽກງານແຜນການ-ການເງິນ ປະຈຳປີ 2018 ແລະ ທິດທາງແຜນການ ປະຈຳປີ 2019, ເຊິ່ງທ່ານນາຍົກລັດຖະມົນຕີ ໄດ້ຕີລາຄາດ້ານດີ ທີ່ຕັ້ງໜ້າໃນການຈັດຕັ້ງປະຕິບັດວຽກງານຂອງຂະແໜງແຜນການ-ການລົງທຶນ ແລະ ການເງິນໃນໄລຍະຜ່ານມາ ແລະ ໄດ້ຕີລາຄາ ບັນຫາທີ່ຍັງບໍ່ທັນຈັດຕັ້ງປະຕິບັດໄດ້ດີເທົ່າທີ່ຄວນ.

PHOTO: KPL

ໃນໂອກາດນີ້, ທ່ານ ທອງລຸນ ສີສຸລິດ ໄດ້ມີທິດຊີ້ນຳ ແລະ ເນັ້ນໜັກໃສ່ບາງບັນຫາເພື່ອຂະຫຍາຍຈຸດດີທີ່ເປັນພື້ນຖານ, ແກ້ໄຂຂໍ້ຄົງຄ້າງ ເຮັດໃຫ້ວຽກງານແຜນການ-ການລົງທຶນ ແລະ ວຽກງານການເງິນ ໃຫ້ມີການຫັນປ່ຽນຢ່າງຕັ້ງໜ້າ ແລະ ປະກອບສ່ວນສຳຄັນ ເຂົ້າໃນການພັດທະນາລວມທົ່ວປະເທດ ໃນປີ 2019 ເປັນຕົ້ນແມ່ນ:

  1. ຜັນຂະຫຍາຍມະຕິກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ແລະ ດໍາລັດວ່າດ້ວຍການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ປະຈຳປີ 2019 ໃຫ້ເປັນຮູບປະທໍາ,
  2. ໃນປີ 2019 ລັດຖະບານຈະແຕ່ງຕັ້ງຄະນະຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດວຽກຈຸດສຸມຕົ້ນຕໍຂອງລັດຖະບານ ໂດຍມອບໃຫ້ບັນດາຮອງນາຍົກລັດຖະມົນຕີ ເປັນຫົວໜ້າຄະນະ ເພື່ອລົງເລິກຊີ້ນໍາໃນແຕ່ລະຂົງເຂດວຽກຈຸດສຸມ;
  3. ເພື່ອເຮັດໃຫ້ເສດຖະກິດ ສືບຕໍ່ຂະຫຍາຍຕົວຕາມລໍາດັບຄາດໝາຍທີ່ວາງໄວ້ (6.7% ຂຶ້ນໄປ) ທຸກຂະແໜງການ ແລະ ທ້ອງຖິ່ນ ຕ້ອງປະສານສົມທົບກັນໃນການສືບຕໍ່ຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ ໃຫ້ມີຄວາມຄືບໜ້າຢ່າງເປັນຮູບປະທໍາ ແລະ ລາຍງານຄວາມຄືບໜ້າຄືນ ໃຫ້ລັດຖະ ບານໃນແຕ່ລະໄລຍະ;
  4. ເລັ່ງປະຕິຮູບວຽກງານການເງິນຢ່າງຮອບດ້ານ ແລະ ແຂງແຮງ ຕາມຍຸດທະສາດທີ່ ລັດຖະບານ ໄດ້ຮັບຮອງໃຫ້ມີຄວາມຄືບໜ້າໄວ ແລະ ຮັບປະກັນການເກັບລາຍຮັບ ໃຫ້ໄດ້ຕາມແຜນ ແລະ ລື່ນແຜນໄດ້ຍິ່ງເປັນການດີ;
  5. ປະຕິຮູບລະບົບການລົງທຶນຂອງລັດ ໃຫ້ມີການຫັນປ່ຽນ, ເຄັ່ງຄັດຕາມລະບຽບກົດໝາຍ ໃຫ້ການລົງທຶນມີຈຸດສຸມ, ມີປະສິດທິຜົນ ແລະ ສອດຄ່ອງຕາມງົບປະມານ ບໍ່ໃຫ້ມີໜີ້ສິນ ສະສົມເພີ່ມຂຶ້ນ;
  6. ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ ຢູ່ໃນຂົງເຂດແຜນການ-ການລົງທຶນ ແລະ ຂົງເຂດການເງິນ ໃຫ້ມີຄວາມຈົ່ງຮັກພັກດີ, ມີຈັນຍາບັນຮັກວິຊາຊີບ, ປະຕິບັດວິໄນທາງດ້ານແຜນການ-ການເງິນ ຢ່າງເຄັ່ງຄັດ, ຍົກສູງສະຕິຄວາມຮັບຜິດຊອບໜ້າທີ່ການເມືອງ ທີ່ໄດ້ຮັບມອບ ໝາຍ ແລະ ຖືເອົາຜົນປະໂຫຍດຂອງປະເທດຊາດເປັນຫລັກ ເພື່ອຫລຸດປະກົດການຫຍໍ້ທໍ້ ໃຫ້ຂາດໂຕ, ຖ້າຍັງມີປະກົດການເກີດຂຶ້ນ ແມ່ນໃຫ້ປະຕິບັດຕາມກົດໝາຍ ແລະ ລະບຽບການຢ່າງເດັດຂາດ;
  7. ສືບຕໍ່ປັບ ປຸງລັດວິສາຫະກິດ ໂດຍສະເພາະ ຄົ້ນຄ້ວາບັນດາມາດຕະການໄລຍະຍາວ ໃນການປັບປຸງລັດວິສາຫະກິດ ໃຫ້ມີຄວາມເຂັ້ມແຂງ ໄປຄຽງຄູ່ກັບການປະຕິຮູບລັດວິສາຫະກິດ ຍຸດທະສາດຈໍານວນໜຶ່ງທີ່ຂາດທຶນ ແລະ ດຳເນີນທຸລະກິດບໍ່ມີປະສິດທິຜົນ ດ້ວຍຫລາຍຮູບແບບ ເປັນຕົ້ນການ ຊອກຄູ່ຮ່ວມທຸລະກິດຍຸດທະສາດເຂົ້າມາດຳເນີນທຸລະກິດ ແລະ ປັບປຸງຮູບແບບການບໍລິຫານ ໃຫ້ໄດ້ມາດຕະຖານສາກົນ;
  8. ສືບຕໍ່ຍູ້ແຮງການລົງທຶນເອກະຊົນພາຍໃນ ແລະ ຕ່າງປະເທດ ໃຫ້ເປັນກໍາລັງຕົ້ນຕໍໃນການຊຸກຍູ້ການເຕີບໂຕຂອງເສດຖະ ກິດ ໂດຍສະເພາະຕ້ອງປະສານງານຢ່າງໜັກແໜ້ນ ລະຫວ່າງບັນດາຂະແໜງການ ເພື່ອປັບປຸງບັນດາລະ ບຽບການ ແລະ ກົນໄກຕ່າງໆ ທີ່ຕິດພັນກັບ 10 ຕົວຊີ້ວັດຄວາມສະດວກໃນການດໍາເນີນທຸລະກິດ;
  9. ພັດທະນາເຂດເສດຖະກິດພິເສດ ໃຫ້ກາຍເປັນທ່າແຮງໜຶ່ງທີ່ສໍາຄັນ ໃນການດຶງດູດການລົງທຶນຂອງພາກເອກະຊົນ;
  10. ການປະເມີນຜົນໂຄງການລົງທຶນຂອງລັດ ຕ້ອງປະຕິບັດຢ່າງເຂັ້ມງວດ ຖືກຕ້ອງຕາມຫລັກວິຊາການ ແລະ ສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງ;
  11. ວຽກງານຂົນຂວາຍ ດຶງດູດການຊ່ວຍເຫລືອທາງການ ເພື່ອການພັດທະນາ ທັງໃນກອບຫລາຍຝ່າຍ ແລະ ສອງຝ່າຍ ຈະຕ້ອງມີລັກສະນະເປັນເຈົ້າການ ແລະ ສ່ອງແສງຄວາມຕ້ອງການດ້ານການພັດທະນາຂອງປະເທດໃຫ້ຫລາຍຂຶ້ນ. ພ້ອມທັງ, ໃຫ້ເພີ່ມທະວີການເປັນເຈົ້າການ ໃນວຽກງານການຮ່ວມມືສອງຝ່າຍ ລາວ-ຫວຽດນາມ ແລະ ລາວ-ຈີນ, ໂດຍສະເພາະການຮ່ວມມື ລາວ-ຈີນ ຈະຕ້ອງເອົາໃຈໃສ່ໃນການຊຸກຍູ້ການຈັດຕັ້ງປະຕິບັດໂຄງການ 4 ຕື້ຢວນ ໃຫ້ໄດ້ເລີ່ມຕົ້ນໂດຍໄວ ແລະ ຂະຫຍາຍໂຄງການທົດລອງໄປສູ່ແຂວງອື່ນໆ ໃຫ້ຫລາຍເທົ່າທີ່ຈະຫລາຍໄດ້;
  12. ປັບປຸງລະບົບຂໍ້ມູນສະຖິຕິ ໃຫ້ມີຄຸນນະພາບສູງຂຶ້ນ ແລະ ສາມາດເຂົ້າເຖິງໄດ້ຢ່າງສະດວກ ໂດຍການຜັນຂະຫຍາຍກົດໝາຍ ແລະ ຍຸດທະສາດ ທີ່ໄດ້ຮັບຮອງແລ້ວນັ້ນໃຫ້ເປັນຮູບປະທໍາ;
  13. ໃຫ້ເຄັ່ງຄັດປະຕິບັດມາດຕະການປະຢັດ ໃນທົ່ວຂົງເຂດບໍລິຫານລັດ ເພື່ອເປັນແບບຢ່າງໃຫ້ແກ່ສັງຄົມ ໂດຍເຂັ້ມງວດການຈັດຕັ້ງປະຕິບັດຄໍາສັ່ງວ່າດ້ວຍມາດຕະການປະຢັດລາຍຈ່າຍງົບປະມານຂອງລັດເລກທີ 09/ນຍ;
  14. ກໍານົດຄືນການແບ່ງງານ ແລະ ຄວາມຮັບຜິດຊອບ ລະຫວ່າງ ກະຊວງ ແລະ ທ້ອງຖິ່ນ ໃນການຈັດຕັ້ງປະ ຕິບັດວຽກງານຕາມທິດສາມສ້າງເປັນຕົ້ນ ການຄຸ້ມຄອງການລົງທຶນຂອງລັດ, ການຄຸ້ມຄອງການລົງທຶນຂອງເອກະຊົນ, ການຄຸ້ມຄອງລາຍຮັບ-ລາຍຈ່າຍງົບປະມານ ເພື່ອໃຫ້ມີຄວາມເປັນເອກະພາບ, ຄວາມເປັນເຈົ້າການສູງ ໃນການຈັດຕັ້ງປະຕິບັດວຽກງານໃນຄວາມຮັບຜິດຊອບຂອງຕົນ.
  15. ພ້ອມນີ້, ທ່ານນາຍົກລັດຖະມົນຕີ ຍັງໄດ້ເນັ້ນອີກບັນຫາໜຶ່ງທີ່ສໍາຄັນຂອງປີ 2019 ແມ່ນຈະໄດ້ກະ ກຽມສະຫລຸບທ້າຍສະໄໝຂອງແຜນການ 5 ປີ ຄັ້ງທີ VIII (2016-2020), ໃຫ້ຄົ້ນຄວ້າ ແລະ ກະກຽມສ້າງແຜນ 5 ປີ ຄັ້ງທີ IX (2021-2025) ເພື່ອເປັນພື້ນຖານທາງດ້ານເນື້ອໃນ ໃຫ້ແກ່ບົດລາຍງານການເມືອງຕໍ່ກອງປະຊຸມໃຫຍ່ຂອງພັກ ຄັ້ງທີ XI.