ທາງການກຳປູເຈຍກ່າວວ່າ ໜັງສືຜ່ານແດນກຳປູເຈຍຂອງອະດີດນາຍົກໄທເປັນຂອງປອມ

Former prime minister Yingluck Shinawatra (Photo by LILLIAN SUWANRUMPHA / AFP)

ສຳນັກຂ່າວຕ່າງປະເທດລາຍງານ 11​ ມັງກອນ 2019 ວ່າ: ຈາກກໍລະນີທີ່ South China Mornin Post ເຊິ່ງເປັນໜັງສືພິມຍັກໃຫຍ່ຂອງຮົງກົງ ລາຍານໃນອາທິດນີ້ວ່າ ທ່ານ ນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີຂອງໄທ ໃຊ້ໜັງສືຜ່ານແດນຂອງກຳປູເຈຍໃນການຂຶ້ນທະບຽນເປັນຜູ້ບໍລິຫານສູງສຸດພຽງຄົນດຽວຂອງບໍລິສັດ P.T. Corporation ເມື່ອເດືອນສິງຫາ 2018 ຫຼື ປະມານ 1 ປີຫຼັງຈາກລີ້ໄພທາງການເມືອງຫຼົບໜີອອກຈາກປະເທດໄທ ຖານເປັນໜຶ່ງໃນຜູ້ຕ້ອງຫາຄະດີສໍ້ລາດບັງຫຼວງໂຄງການຈຳນຳເຂົ້າ ທີ່ເຮັດໃຫ້ລັດຂາດທຶນມະຫາສານ, ກາຍເປັນການເພີ່ມນ້ຳໜັກໃຫ້ກັບກະແສຂ່າວທີ່ວ່າ ທ່ານ ນາງ ຫຼົບໜີອອກນອກປະເທດຜ່ານຊ່ອງທາງທຳມະຊາດເຂົ້າສູ່ປະເທດກຳປູເຈຍເປັນປະເທດທຳອິດ.

ທ່ານ ພົນເອກ ເໝົາ ຈັນດາຣາ ເຊິ່ງດຳລົງຕຳແໜ່ງຜູ້ອຳນວຍການສຳນັກງານດ້ານການອອກເອກະສານປະຈຳຕົວ ຂອງກະຊວງພາຍໃນກຳປູເຈຍໃນເວລານັ້ນ ກ່າວກັບໜັງສືພິມ The Phnom Penh Post ເຊິ່ງເປັນກະບອກສຽງຂອງລັດຖະບານສົມເດັດ ຮຸນ ເຊນວ່າ ບໍ່ວ່າໜັງສືຜ່ານແດນເຫຼັ້ມນັ້ນຈະເປັນຂອງຈິງຫຼືບໍ່ ແຕ່ຢືນຢັນວ່າທາງການກຳປູເຈຍບໍ່ເຄີຍອອກໜັງສືຜ່ານແດນໃຫ້ແກ່ພົນລະເມືອງຕ່າງປະເທດ ເນື່ອງຈາກເປັນການລະເມີດກົດໝາຍຂອງກຳປູເຈຍຂັ້ນຮ້າຍແຮງ, ນອກຈາກນີ້ແລ້ວ ທຸກຄົນຮັບຮູ້ດີວ່າ ທ່ານ ນາງ ຍິ່ງລັກ ເປັນພົນລະເມືອງ ແລະ ເປັນອະດີດນາຍົກລັດຖະມົນຕີຂອງໄທ ແລ້ວຈະມີສິດໃຊ້ໜັງສືຜ່ານແດນຂອງກຳປູເຈຍຂຶ້ນທະບຽນບໍລິສັດໃນຕ່າງປະເທດໃນຖານະພົນລະເມືອງກຳປູເຈຍໄດ້ແນວໃດ.

ໃນດ້ານຂອງກະຊວງພາຍໃນກຳປູເຈຍຢືນຢັນວ່າ ໜັງສືຜ່ານແດນຂອງກຳປູເຈຍທີ່ທ່ານ ນາງ ຍິ່ງລັກ ຖືຄອງຢູ່ນັ້ນເປັນຂອງປອມ, ຂະນະທີ່ທ່ານ ເຟີຍ ສີຟັນ ໂຄສົກລັດຖະບານກຳປູເຈຍ ຢືນຢັນວ່າໄດ້ກວດສອບລາຍຊື່ບຸກຄົນທີ່ກະຊວງພາຍໃນອອກໜັງສືເດີນທາງໃຫ້ໃນຮອບ 1-2 ປີຜ່ານມາ ແລະ ບໍ່ປາກົດມີລາຍຊື່ຂອງທ່ານ ນາງ ຍິ່ງລັກໃນລະບົບ.

ສ່ວນທ່ານ ຂິນ ເຟຍ ຜູ້ອຳນວຍການສະຖາບັນສາຍພົວພັນລະຫວ່າງປະເທດກຳປູເຈຍ ຕັ້ງຂໍ້ສົມມຸດຕິຖານໄວ້ 2 ປະເດັນວ່າ: ລາຍງານຂອງ South China Mornin Post ອາດເປັນລາຍງານທີ່ບໍ່ມີມູນຄວາມຈິງ ມາຕັ້ງແຕ່ຕົ້ນ ຫຼື ໜັງສືຜ່ານແດນກຳປູເຈຍ ຂອງທ່ານ ນາງ ຍິ່ງລັກ ເປັນຂອງປອມ ທີ່ໄດ້ມາຈາກຂະບວນການນອກລະບົບ ເຊິ່ງກໍລະນີລັກສະນະນີ້ເຄີຍເກີດຂຶ້ນກັບພົນລະເມືອງຈີນກຸ່ມໜຶ່ງເມື່ອປີ 1998 ທີ່ຖືຄອງໜັງສືຜ່ານແດນຂອງກຳປູເຈຍທີ່ບໍ່ມີໝາຍເລກຢູ່ໃນຖານຂໍ້ມູນຂອງລັດຖະບານກຳປູເຈຍ.