ເຫດແກັດລະເບີດທີ່ນະຄອນຫຼວງປາຣີສ ມີຜູ້ເສຍຊີວິດແລ້ວ 4 ຄົນ

Photo by Carl LABROSSE / AFP)

ສຳນັກຂ່າວຕ່າງປະເທດລາຍງານເມື່ອວັນທີ 13 ມັງກອນ 2019 ທີ່ຜ່ານມາວ່າ: ຈາກເຫດແກັດລະເບີດໃນອາຄານແຫ່ງໜຶ່ງໃຈກາງນະຄອນຫຼວງປາຣີສ ປະເທດຝຣັ່ງ ເມື່ອວັນເສົາ 12 ມັງກອນ ທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດແລ້ວ 3 ຄົນ ເປັນເຈົ້າໜ້າທີ່ດັບເພີງ 2 ຄົນ ແລະ ນັກທອ່ງທ່ຽວ 1 ຄົນ ແລະ ບາດເຈັບອີກ 50 ຄົນ, ໂດຍໃກ້ຈຸດເກີດເຫດຍັງມີອາຄານອາພາດເມັ້ນທີ່ໄດ້ຮັບຄວາມເສຍຫາຍ ເຈົ້າໜ້າທີ່ຕ້ອງໄດ້ອົບພະຍົບປະຊາຊົນອອກຈາກພື້ນທີ່ໃກ້ຄຽງ 150 ຄົນ.

(Photo by Thomas SAMSON / AFP)

ນອກນີ້, ເຈົ້າໜ້າທີ່ກູ້ໄພ ພ້ອມດ້ວຍໝາດົມກິ່ນໄດ້ຄົ້ນຫາຜູ້ຍິງຄົນໜຶ່ງທີ່ອາໄສຢູ່ຊັ້ນເທິງຂອງອາຄານທີ່ເກີດເຫດລະເບີດ ແລະ ເຊື່ອວ່າຍັງຕິດຢູ່ໃຕ້ກອງຊາກອາຄານທີ່ພັງລົງມາ ໂດຍເຈົ້າໜ້າທີ່ກູ້ໄພພົບສົບແລ້ວ.

ສຳລັບພື້ນທີ່ເກີດເຫດຢູ່ໃນເຂດປົກຄອງທີ 9 ຂອງນະຄອນຫຼວງປາຣີສ ເປັນທີ່ຕັ້ງຂອງຮ້ານອາຫານ ແລະ ແຫ່ງທ່ອງທ່ຽວຫຼາຍແຫ່ງເຊັ່ນ: ພິພິທະພັນຫຸ່ນຂີ້ເຜິ້ງກຣີແວງ ແລະ ຕະຫຼາດ Rue des Martyrs.