ວິລະກຳກອງລຳລຽງແບກຫາບ 368 ແລະ ກອງກຳລັງໄຟເພດຍິງ 769 ຕໍ່ສູ້ຜາບສັດຕູ້ຄຽງບ່າຄຽງໄລ່ອ້າຍນ້ອງ

ກອງລຳລຽງແບກຫາບ 368 ສ້າງຕັ້ງຂຶ້ນໃນວັນທີ 6 ມີນາ 1968 ເອີ້ນຊື່ວ່າ “ກອງຮ້ອຍລຳລຽງແບກຫາບ 368” ຫຼື “ເຊ 368” (ເອີ້ນຕາມເດືອນປີສ້າງຕັ້ງ) ມີກຳລັງຢູ່ 120 ຄົນ ຂຶ້ນກັບກອງບັນຊາການທະຫານເຂດຊຽງຂວາງ ເຊິ່ງຄະນະປະກອບມີ:

1. ສະຫາຍ ທິດອຸ່ນຫຼ້າ ເປັນຫົວໜ້າການທະຫານ

2. ສະຫາຍ ຄຳມູນ ເປັນຮອງຫົວໜ້າການທະຫານ

3. ສະຫາຍ ນາງ ໄມຈັນ ເປັນຫົວໜ້າການເມືອງ

4. ສະຫາຍ ນາງ ຄຳເພັດ ເປັນຮອງຫົວໜ້າການເມືອງ

ສະພາບເອື້ອຍນ້ອງທີ່ເຂົ້າຮ່ວມກອງລຳລຽງແບກຫາບ 368 ສ່ວນຫຼາຍແມ່ນລູກຫຼານຂອງຊາວຊຽງຂວາງ, ອາຍຸຍັງອ່ອນນ້ອຍພຽງແຕ່ 12-20 ປີ ໃນນີ້ລວມທັງຄະນະກອງຮ້ອຍຄື: ເຂົາເຈົ້າມາຈາກຄອບຄົວທຸກຍາກ, ລະດັບການສຶກສາບໍ່ສູງ, ບາງຄົນຍັງກືກໜັງສື, ບໍ່ເຄີຍເຮັດວຽກໜັກໜ່ວງ ແລະ ອັນຕະລາຍ, ສະພາບແນວຄິດກໍ່ຄັບແຄບເຫັນແກ່ໂຕ. ທັງໝົດນີ້ສຳພັດຢູ່ໃນສະພາບສົງຄາມກຳລັງດຸເດືອດ-ຂ້ຽວຂາດອັນຕະລາຍເຖິງຕາຍມີຢູ່ໃນທຸກບາດກ້າວ, ແຕ່ຄວາມຮຽກຮ້ອງຕ້ອງການ ແລະ ຄວາມຮັບຜິດຊອບສູງສົ່ງ, ຄະນະບັນຊາການເຂດກໍ່ຕ້ອງອອກແຮງຢ່າງໜັກໃນການສຶກອົບຮົມຈັດຕັ້ງນຳພາ ນັບແຕ່ການດຳລົງຊີວິດ, ການກິນຢູ່ລວມໝູ່, ມີລະບຽບວິໄນ, ປະຕິບັດວຽກງານ ໃນນັ້ນໄດ້ຈັດຕັ້ງສຶກສາຮ່ຳຮຽນໜັງສືຜູ້ຮູ້ສອນຜູ້ບໍ່ຮູ້, ຈັດຕັ້ງການຮຽກຮ້ອງເພງຈາກພະນັກງານສິລະປະກອນແຂວງ, ຫຼິ້ນກີລາກາຍະກຳ, ຈັດຕັ້ງໜ່ວຍຊາວໜຸ່ມ, ແມ່ຍິງ, ສະມາຊິກພັກ, ເອົາວຽກດີເດັ່ນ, ຜູ້ເປັນແບບຢ່າງ, ເອົາການສຳຫຼວດກວດກາຕຳນິກໍ່ສ້າງກັນ ປັບປຸງກັນໄປເທື່ອລະກ້າວຈຶ່ງມີຄວາມກ້າວໜ້າ ສາມັກຄີກັນຊ່ວຍເຫຼືອໃນດ້ານດຳລົງຊີວິດ ແລະ ເຮັດໜ້າທີ່ດ້ວຍຄວາມຕື່ນຕົວ ແລະ ເປັນເຈົ້າການ.

ສຳນັກກອງກຳລັງແບກຫາບ 368 ເວລານັ້ນຕັ້ງຢູ່ຕີນພູແຮ້, ຄັງໄຂ ແຂວງຊຽງຂວາງ, ໜ້າທີ່ຕົ້ນຕໍຄື: ປັບປຸງມ້ຽນເຄື່ອງໃນສາງ, ຕັ້ງສາງມ້ຽນເຄື່ອງ ເພື່ອລໍຮັບການຂົນສົ່ງເຂົ້າປາອາຫານມາຈາກຫວຽດນາມ, ອະນາໄມຜັດເຊັດປືນ ແລະ ລູກປືນ. ແບກຫາບສິ່ງຂອງຂຶ້ນລົດ ແລະ ເຂົ້າເກັບມ້ຽນໃນສາງ.

ວັນທີ 5 ກໍລະກົດ 1968 ກອງລຳລຽງແບກຫາບ 368 ໄດ້ມີການປັບປຸງການຈັດຕັ້ງຂັ້ນກອງຮ້ອຍຄືນໃໝ່ໂດຍໃຫ້ແຕ່ເພດຍິງບັນຊາຄື:

1. ສະຫາຍ ນາງ ທຸມມີ ທຳມະວົງ ເປັນຫົວໜ້າການທະຫານ

2. ສະຫາຍ ນາງ ທອງດີ ເປັນຮອງຫົວໜ້າການທະຫານ

3. ສະຫາຍ ນາງ ວັນດີ ເປັນຫົວໜ້າການເມືອງ

4. ສະຫາຍ ນາງ ອ່ອນສີ ເປັນຮອງຫົວໜ້າການເມືອງ

ໃນທ້າຍເດືອນ 7 ຕໍ່ຕົ້ນເດືອນ 8 ປີ 1968 ເອື້ອຍນ້ອງກອງ 368 ແຕ່ລະມື້ເວລາປະມານ 18:00 ໂມງ ຈະຕ້ອງໄດ້ລໍຖ້າຂົນເຄື່ອງທີ່ມາຈາກປະເທດຫວຽດນາມຢູ່ຕູບ ແຄມນ້ຳຍວນ, ເມື່ອລົດມາຮອດກໍ່ເລີ່ມຂຸ້ນຂ້ຽວຂົນເຄື່ອງລົງຈາກລົດເຂົ້າເກັບມ້ຽນໃນສາງລໍຖ້າແຈກຢາຍລົງສູ່ບັນດາກົມກອງ.

ທ້າຍເດືອນ 8 ປີ 1968 ໝວດ 3 ເຊິ່ງບັນຊາໂດຍສະຫາຍນາງ ອ່ອນສີ ໄດ້ນຳກຳລັງໄປປະຈຳຢູ່ດ້ານຮົບ ເມືອງງານ ແຂວງຊຽງຂວາງ ເພື່ອລຳລຽງບັນດາເຄື່ອງ, ເຂົ້າກິນ, ສະບຽງອາຫານ ແລະ ເຄື່ອງຍຸດໂທປະກອນໄປສູ່ດ້ານຮົບທາງທິດໃຕ້ຊຽງຂວາງ, ເມືອງງານ, ເມືອງພ່າງ ສົ່ງໃຫ້ອ້າຍນ້ອງກອງພັນ 24 ທີ່ປະຈຳຢູ່ເຂດທ່າໂທມ, ເມືອງເກົ່າ, ເມືອງເຫືອງ.

ເດືອນ 3 ປີ 1969 ຄະນະບັນຊາການເຂດມີຄຳສັ່ງດ່ວນໃຫ້ໝວດ 3 ຂອງກອງ 368 ກັບຄືນສຳນັກ ເພື່ອລຳລຽງຮັບໃຊ້ການຕ່າວໂຈມຕີບັ້ນຮົບໂອເດແອນ ດ້ານຮົບພູກູດຈອມເຫຼັກ. ໂດຍເຮັດໜ້າທີ່ລຳລຽງເຂົ້າປາອາຫານ,​ ອາວຸດຍຸດທະພັນແຕ່ຖ້ຳຜາຂໍ ດົງດ່ານ ໄປສູ່ດ້ານຮົບພູແຄ.

ກຳລັງອີກສ່ວນໜຶ່ງຂອງກອງ 368 ໄດ້ຂົນສົ່ງອາວຸດ, ລູກກະສຸນ, ສະບຽງອາຫານ, ເຄື່ອງນຸ່ງຫົ່ມໃຫ້ແກ່ອ້າຍນ້ອງທີ່ກຳລັງສູ້ຮົບຢູ່ແນວໜ້າເຊັ່ນ: ພູແຄ, ບ້ານຖ້ຳ, ບ້ານຫອຍ ແລະ ກອງພັນ 166 ເຮັດໜ້າທີ່ສູ້ຮົບປົດປ່ອຍເມືອງງານ.

ທ້າຍປີ 1969 ກອງລຳລຽງແບກຫາຍ 368 ໄດ້ອອກຮັບໃຊ້ດ້ານຮົບພູກູດ ເຊິ່ງມີກອງພັນ 13, ກອງພັນ 701 ຮັກສາຢູ່ປ້ອມດັ່ງກ່າວ ໂດຍໝວດທີ 1 ບັນຊາໂດຍສະຫາຍ ນາງ ບົວພາ ກຳລັງໄດ້ຕັ້ງຢູ່ເຂດບ້ານຍົ່ມ ແຕ່ລະຄົນເປ້ເຄື່ອງຂອງປະມານ 20 ກິໂລກຣາມ ບອກໃສ່ແກັດລູກປືນປະມານ 50 ກິໂລກຣາມຕື່ມອີກ; ໝວດທີ 2 ບັນຊາໂດຍສະຫາຍ ນາງ ບົວວັນ ສຳນັກງານຕັ້ງຢູ່ບ້ານຍົ່ມ ມີໜ້າທີ່ກໍ່ສ້າງສາງມ້ຽນເຄື່ອງ, ຂົນເຄື່ອງລົງລົດແລ້ວຈັດມ້ຽນເຂົ້າສາງ, ໂດຍບັນດາປະເທດສັງຄົມນິຍົມ ແລະ ເພື່ອນມິດທີ່ໃຫ້ການຊ່ວຍເຫຼືອຜ່ານມາທາງຫວຽດນາມແລ້ວເຂົ້າສູ່ລາວ. ແຕ່ລະຄືນພໍເຖິງເວລາ 20:00​ ໂມງຂະບວນລົດຈາກຫວຽດນາມ ຈະມາຣອດທີ່ຕັ້ງສາງມ້ຽນເຄື່ອງແຕ່ລະຈຸດ ໝວດທີ 2 ກໍ່ຈະເລີ່ມເຮັດວຽກທັນທີ, ແຕ່ລະເທື່ອມາບໍ່ຕ່ຳກວ່າ 50-100 ຄັນ; ໝວດທີ 3 ບັນຊາໂດຍສະຫາຍ ນາງ ອ່ອນສີ ນຳກຳລັງໄປປະຈຳຢູ່ດ້ານຮົບ ພູລາດໄຕ ບ້ານແລ ເມືອງເສັງ ໝວດນີ້ເຮັດໜ້າທີ່ລຳລຽງຂົນສົ່ງສະບຽງອາຫານ, ອາວຸດ ແລະ ລູກກະສຸນ ຈາກບ້ານແຫຼ້ວ ເມືອງເຄິງໄປທາງທິດນາກູດ, ນ້ຳປາຍ, ຄັງມະໂນ ເພື່ອໃຫ້ກອງພັນທີ 2, ກອງພັນ 15.

ກອງກຳລັງໄຟເພດຍິງ 769 ສ້າງຕັ້ງຂຶ້ນໃນວັນທີ 15 ກໍລະກົດ 1970 ໂດຍການຊັບຊ້ອນເອົາພະນັກງານກອງຮ້ອຍ 368 ແລະ ກອງຮ້ອຍ 769 ຈຳນວນ 80 ຄົນ ຢູ່ຖ້ຳນ້ຳຕຽນ ເມືອງຄຳ ແຂວງຊຽງຂວາງ ເຊິ່ງຄະນະປະກອບມີ:

1. ສະຫາຍ ນາງ ສີສຸກ ແກ້ວບຸນລ້ອມ ເປັນຫົວໜ້າການທະຫານ

2. ສະຫາຍ ນາງ ທຸມມີ ທຳມະວົງ ເປັນຫົວໜ້າການເມືອງ

3. ສະຫາຍ ນາງ ບົວຄຳ ພົມມະຈັນ ເປັນຮອງການເມືອງ

ລະດູຝົນ ປີ 1970 ຝ່າຍວຽງຈັນໄດ້ເປີດບັ້ນເຄື່ອນທັບທີ່ເອີ້ນວ່າບັ້ນຮົບ “ທະນົງກຽດ” ແຕ່ເດືອນ 8 ເຖິງເດືອນ 10 ປີ 1970 ໜ້າທີ່ຂອງກອງ 368 ເວລານັ້ນແມ່ນລຳລຽງຫາບຂົນສົ່ງເຂົ້າປາ-ອາຫານ ແລະ ລູກກະສຸນ ເພື່ອຮັບໃຊ້ດ້ານຮົບດັ່ງກ່າວ.

ພາຍຫຼັງບັ້ນຮົບ “ທະນົງກຽດ” ສິ້ນສຸດລົງດ້ວຍໄຊຊະນະກອງກຳລັງກອງທັບປົດປ່ອຍ, ກອງບັນຊາທະຫານເຂດສັ່ງໃຫ້ກອງ 368 ຄັດເລືອກເອົາຜູ້ແຂງແຮງ 10 ຄົນໄປສົບທົບກັບອ້າຍນ້ອງກອງລຳລຽງຮັບໃຊ້ດ້ານຮົບພູລານ ປ່າໄຜ່ (ເຂດຜາລະແວກ, ທ່າວຽກ, ຊຽງຄົງ), ສ່ວນຄະນະກອງລຳລຽງແບກຫາບ 368 ນຳພາເອື້ອຍນ້ອງອອກຮັບໃຊ້ດ້ານຮົບເມືອງສູ້ຍ.

ລະດູແລ້ງປີ 1971-1972 ກອງບັນຊາການທະຫານເຂດຊຽງຂວາງໄດ້ເປີດບັ້ບຮົບປົດປ່ອຍເມືອງສູ້ຍ, ສາລາພູຄູນ ແນ່ໃສ່ເປີດກວ້າງເຂດປົດປ່ອຍປັບປຸງຮາກຖານເຂດບ້ານຈຽງ, ບ້ານລ້ອງປົດ ແລະ ຫຼາຍບ້ານໃນເມືອງພູຄູນ. ກອງ 368 ໄດ້ລຳລຽງຂົນສົ່ງສະບຽງອາຫານ, ເຂົ້າ-ປາ,​ອາວຸດຍຸດໂທປະກອນອອກຮັບໃຊ້ດ້ານຮົບດັ່ງກ່າວ.

ທ້າຍປີ 1972 ຈັກກະພັດອາເມຣິກາ ຖືກປະລາໄຊໜັກໜ່ວງຢູ່ງສະໜາມຮົບອິນດູຈີນ, ເວົ້າສະເພາະແມ່ນຢູ່ຫົ່ງໄຫຫິນ-ຊຽງຂວາງ, ພວກເຂົາຕ້ອງໄດ້ປະຕິບັດຕາມສັນຍາວຽງຈັນ ຄັ້ງວັນທີ 21 ມີນາ 1973 ກ່ຽວກັບການຟື້ນຟູສັນຕິພາບ ແລະ ປະຕິບັດຄວາມຖືກຕ້ອງປອງດອງຊາດຢູ່ລາວ.

ພາຍຫຼັງປະຕິບັດຢຸດຍິງທົ່ວປະເທດກອງບັນຊາການສູງສຸດ ຈຶ່ງມີຄຳສັ່ງໃຫ້ກອງລຳລຽງ 368 ຂຶ້ນປັບປຸງກຳລັງຢູ່ເມືອງວຽງໄຊ ແຂວງຫົວພັນ, ບ້ານຊຽງຊື້ ທັງແຕ່ງຕັ້ງໃຫ້ເປັນກອງກຳລັງໄຟເພດຍິງ ຮ່ວມກັບກອງ 769 ເປັນກອງກຽດຕິຍົດ. ກອງ 368 ຍັງໄດ້ຫັນລົງໄປສ້າງນິຄົມຢູ່ບ້ານຝາຍ ເມືອງຄຳ ແລະ ນິຄົມລາດຫຼວງ ເຊິ່ງເປັນຂອງເຂດຊຽງຂວາງ. ນິຍົມບ້ານຝາຍ ເປັນນິຍົມສູນກາງ, ກອງ 368 ເຮັດວຽກຢູ່ເຂດນັ້ນເປັນເວລາ 2​ ປີ.

 

ເດືອນ 10 ປີ 1972 ກອງກຳລັງໄຟເພດຍິງ 769 ໄດ້ເຄື່ອນທັບຮ່ວມກັບກອງພັນທີ 13, ກອງພັນ 701 ເຮັດໜ້າທີ່ຍິງຊ່ວຍໜູນປົດປ່ອຍສາລາພູຄູນ. ແກ່ຍາວເຖິງ 3 ວັນ 3 ຄືນ ແຕ່ສັດຕູກໍ່ຍັງບໍ່ແຕກ. ເຖິງຕອນທ່ຽງຂອງມື້ທີສາມ ສັດຕູຮູ້ຂ່າວວ່າມີກອງກຳລັງໄຟເພດຍິງ 769 ມາຕີບສົມທົບ ສັດຕູກໍ່ຂວັນອ່ອນຢ້ານກົວ ແລະ ປົບໜີຕາຍຈາກສາລາພູຄູນ.

ວັນທີ 21 ມັງກອນ 1973 ກອງຮ້ອຍ 769 ສົມທົບກັບກອງພັນ 605 ຍິງຊ່ວຍໜູນໃຫ້ກອງທະຫານຮາບ ກອງພັນ 15, ກອງພັນ 48 ບຸກໂຈມຕີທະຫານຮັບຈ້າງໄທ ຢູ່ບ້ານສອດ ເມືອສູ້ຍ. ເມື່ອປົດປ່ອຍໜອງຕັ້ງ ເມືອງສູ້ຍສຳເລັດ ໃນເວລາຕັ້ງທັບຢູ່ທີ່ນັ້ນ ກອງຮ້ອຍ 769 ໄດ້ເຮັດໜ້າທີ່ລຳລຽງອາວຸດ,​ ກະສຸນ, ສະບຽງອາຫານ ໃຫ້ແກ່ກອງພັນທະຫານທີ່ເຮັດໜ້າທີ່ສູ້ຮົບກັບສັດຕູຢູ່ຂອບເຂດຊຽງຊາ-ນາຕໍ.

ວັນທີ 25 ກຸມພາ 1973 ກອງຮ້ອຍ 769 ໄດ້ມີການປັບປຸງການຈັດຕັ້ງຄືນໃໝ່:

1. ສະຫາຍ ນາງ ບົວພອນ ເປັນຫົວໜ້າການທະຫານ

2. ສະຫາຍ ນາງ ພາສີ ເປັນຮອງການທະຫານ

3. ສະຫາຍ ນາງ ບົວຄຳ ພົມມະຈັນ ເປັນຫົວໜ້າການເມືອງ

4. ສະຫາຍ ນາງ ບົວທອງ ເປັນຮອງການເມືອງ

ກ້າວເຂົ້າປີ 1975 ເພື່ອກຽມໃຫ້ແກ່ການຍຶດອຳນາດ ແລະ ສະແດງກຳລັງ ຂັ້ນເທິງຈຶ່ງມີຄຳສັ່ງໃຫ້ ຄະນະກອງ 368 ແລະ ກອງບັນຊາການທະຫານເຂດແຂວງຊຽງຂວາງລົງມາຊັບຊ້ອນ ແລະ ຄັດເລືອກເອົາເອື້ອຍນ້ອງ 368 ຜູ້ແຂງແຮງ, ໜຸ່ມນ້ອຍຫ້າວຫັນຈຳນວນໜຶ່ງ ແລ້ວຈັດຕັ້ງເປັນກອງ 875 ທີ່ຄັງໄຂ ເພື່ອກະກຽມເຂົ້າຍຶດອຳນາດທີ່ວຽງຈັນ ທັງເຮັດໜ້າທີ່ສະແດງກຳລັງ ແລະ ທັງເປັນກອງກຽດຕິຍົດ ຕ້ອນຮັບແຂກຕ່າງປະເທດທີ່ມາຢ້ຽມຢາມລາວ, ໃນນັ້ນຂັ້ນເທິງປະກອບປືນເດກາເບ (DKB) ໃຫ້ໂດຍມີ:

1. ສະຫາຍ ນາງ ວັນຄຳ ທິບພະວົງ ເປັນຫົວໜ້າການທະຫານ

2. ສະຫາຍ ນາງ ສີພາ ຫົວໜ້າການເມືອງ.

ວັນທີ 5 ພຶດສະພາ 1975 ຂັ້ນເທິງສັ່ງໃຫ້ກອງຮ້ອຍ 769 ເຄື່ອນກຳລັງເຂົ້າເມືອງວຽງຈັນ ເພື່ອກະກຽມຍຶດອຳນາດທົ່ວປະເທດ.

ທ້າຍເດືອນ 7 ປີ 1975 ກອງຮ້ອຍ 769 ເຄື່ອນກຳລັງມາຕັ້ງຢູ່ເຂດທີ່ໝັ້ນດ່ານສູງ ນາຍາງ ເມືອງນາຊາຍທອງ ກຳແພງນະຄອນວຽງຈັນ ເພື່ອກຽມເຂົ້າຍຶດອຳນາດຢູ່ວຽກຈັນ ເວລາລໍຖ້າເອື້ອຍນ້ອງກອງຮ້ອຍ 769 ໄດ້ຮ່ຳຮຽນການເມືອງ, ຫັດແອບການທະຫານຈາກນັ້ນພາກສ່ວນໜຶ່ງແມ່ນລົງພື້ນຖານປະຊາຊົນ ແລະ ພາກສ່ວນໜຶ່ງກໍ່ຮຽນຍິງປືນໃຫຍ່, ຮອດເວລາປະມານ 4:00​ ໂມງເຊົ້າຂອງວັນທີ 23 ສິງຫາ 1975 ກອງກຳລັງໄຟເພດຍິງ 769 ໄດ້ລາກແກ່ປືນ H12 ມມ ເດືອນເຂົ້າເດີ່ນທາດຫຼວງ, ພາຍຫຼັງສຳເລັດການຍຶດອຳນາດ ຂັ້ນເທິງໄດ້ສັ່ງໃຫ້ກອງກຳລັງໄຟເພດຍິງ 769 ມາຕັ້ງຄ້າຍຢູ່ດົງປາແຫຼບ ໂດຍເຮັດໜ້າທີ່ລົງພື້ນຖານ ໂຄສະນາຂົນຂວາຍປະຊາຊົນ.

 

ປີ 1977 ສະເພາະຢູ່ວຽງຈັນປະຕິການຂວາຈັດໄທ ສົມທົບລາວພັດຖິ່ນ ໄດ້ເຂົ້າຍຶດຕັ້ງທັບຢູ່ດອນຊິງຊູ້ (ຕອນກາງແມ່ນ້ຳຂອງ ຕັ້ງຢູ່ດ້ານເໜືອເມືອງວຽງຈັນ ຍາວ 800 ແມັດ ຫ່າງຈາກໄທ 100​ ແມັດ) ແລ້ວຍຶດເອົາດອນສັງຄີ ຢູ່ເຂດເມືອງຫາດຊາຍຟອງອີກ (ທິດໃຕ້ຂອງນະຄອນຫຼວງວຽງຈັນ).

ຕໍ່ສະພາບການດັ່ງກ່າວພັກ ແລະ ລັດຖະບານໄດ້ມີຄຳສັ່ງວ່າ ຕ້ອງດັບສູນສັດຕູຢ່າງທັນການ ແລ້ວຟື້ນຟູສອງດອນນີ້ໃຫ້ຄືນສູ່ສະພາບເດີມ.

ວັນທີ 11 ເມສາ 1977 ກຳລັງທະຫານຮາບກອງທັບປົດປ່ອຍປະຊາຊົນລາວໄດ້ຂ້າມໄປດອນຊິງຊູ້ຢ່າງວ່ອງໄວ ແລະ ບຸກຍຶດເອົາຢ່າງຄ່ອງແຄ້ວ ບວກໃສ່ກຳລັງປືນໃຫຍ່ກອງກຳລັງໄຟເພດຍິງ 769, ກອງ 875 ຍິງຊ່ວຍໜູນເຂົ້າໃສ່ເປົ້າໝາຍ ເໝືອນດັ່ງສາຍຟ້າແມບ ສັດຕູທີ່ຍັງເຫຼືອໜີຕາຍຂ້າມໄປຝັ່ງໄປ.

ພາຍຫຼັງກອງກຳລັງໄຟເພດຍິງ 769 ໄດ້ສຳເລັດເຂົ້າຮ່ວມສູ້ຮົບບັ້ນປົດປ່ອຍດອນຊິງຊູ້ແລ້ວ ກໍ່ໄດ້ກັບຄືນມາປັບປຸງກຳລັງ, ຮ່ຳຮຽນການເມືອງຢູ່ດົງປາແຫຼບ ນະຄອນຫຼວງວຽງຈັນ, ເຮັດໜ້າທີ່ຮັບແຂກພາຍໃນ ແລະ ຕ່າງປະເທດ.

 

ກອງລຳລຽງແບກຫາບ 368 ຕະຫຼອດໄລຍະແຫ່ງການຮັບໃຊ້ບັນດາສະໜາມຮົບຕ່າງສູ່ຮົບູຄຽງບ່າ-ຄຽງໄຫຼ່ກັບອ້າຍນ້ອງເພດຊາຍ ມີຜົນງານດີເດັ່ນໂດຍໄດ້ຮັບນາມມະຍົດ “ກອງວິລະຊົນແຫ່ງຊາດ”, ຫຼຽນໄຊອິດສະຫຼະຊັ້ນ, ຫຼຽນກາແຮງງານ ແລະ ທຸງໄຊ. ນອກຈາກນີ້ຍັງມີຫຼາຍສະຫາຍໄດ້ຮັບນາມມະຍົດເປັນບຸກຄົນດີເດັ່ນນາມມະຍົດນັກຮົບແຂ່ງຂັນ ພ້ອມທັງໄດ້ຮັບຫຼຽນໄຊ-ຫຼຽນກາຕ່າງໆ.

ກອງກຳລັງໄຟເພດຍິງ 769 ຈາກຜົນງານຂອງການປະຕິບັດໜ້າທີ່ໄດ້ສ້າງມາໃນໄລຍະຕໍ່ສູ່ປົດປ່ອຍຊາດ ຈົນປະເທດຊາດໄດ້ຮັບການປົດປ່ອຍຢ່າງສົມບູນ ຈາກຂະບວນວິວັດດັ່ງກ່າວ ແລະ ພຶດຕິກຳຕົວຈິງຂອງເອື້ອຍນ້ອງສ້າງຜົນງານອັນໂດດເດັ່ນ ແລະ ສະຫງ່າງາມໄດ້ຮັບກາຍຍ້ອງຍໍຈາກພັກ-ລັດຖະານ ໂດຍໄດ້ຮັບຫຼຽນໄຊອິດສະຫຼະ, ຫຼຽນຍາມນະຍົດກົມກອງວິລະຊົນ, ຫຼຽນໄຊພິລະອາດຫານ, ຫຼຽນໄຊແຮງງານ ແລະ ທຸງໄຊ. ນອກຈາກນີ້ ຍັງໄດ້ຮັບນາມມະນຸດວິລະຊົນ 1 ສະຫາຍ ແລະ ນັກຮົບແຂ່ງຂັນອີກ 5 ສະຫາຍ.

ບັນດາທຸງໄຊ, ຫຼຽນໄຊ ແລະ ຫຼຽນກາຕ່າງໆທີ່ເປັນຂອງກົມກອງລວມໝູ່ ພາຍຫຼັງປະກາດຍຸບກົມກອງແລ້ວ ສະຫາຍ ນາງ ທອງຈັນ ວິໄລວົງ ຮອງການເມືອງກອງຮ້າຍ ໄດ້ນຳໄປມອບໃຫ້ຫໍພິພິທະພັນກອງທັບ ເປັນຜູ້ເກັບກຳປົກປັກຮັກສາໄວ້ ເປັນສັນຍາລັກ ພະຍານຫຼັກຖານແຫ່ງມູນເຊື້ອພິລະອາດຫາຍ ກຽດສັກສືປະຫວັດມູນເຊື້ອອັນສະຫງ່າງາມ ຂອງກອງກຳລັງໄຟເພດຍິງ 368, 769 ເປັນສົມບັດຂອງກອງທັບກໍ່ຄືຂອງຊາດຕະຫຼອດໄປ ເຖິງແມ່ນວ່າກົມກອງຈະບໍ່ມີການຈັດຕັ້ງເຄື່ອນໄຫວແລ້ວກໍ່ຕາມ ແຕ່ຜົນງານຄວາມດີຂອງພວກປ້າ, ພວກແມ່, ພວກເອື້ອຍ… ຍັງສະຖິດໄວ້ຢູ່ໃນດວງໃຈຂອງພວກເຮົາຕະຫຼອດໄປ.