ສຳນັກຂ່າວຕ່າງປະເທດລາຍງານເມື່ອວັນທີ 24 ມັງກອນ 2019 ທີ່ຜ່ານມາວ່າ: ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການ ເລື່ອງການສັ່ງໃຫ້ເຈົ້າໜ້າທີ່ການທູດປະຈຳປະເທດເວເນຊູເອລາ ໃນສ່ວນທີ່ບໍ່ຈຳເປັນໃຫ້ເດີນທາງກັບປະເທດ ເນື່ອງຈາກສະຖານະການການເມືອງພາຍໃນເວເນຊູເອລາຕອນນີ້ໄດ້ສົ່ງຜົນກະທົບຕໍ່ປະສິດທິພາບດ້ານພາລະກິດໃຫ້ບໍລິການທາງການທູດ ແລະ ກົງສຸນຂອງລັດຖະບານສະຫະລັດ ອາເມຣິກາຕໍ່ພົນລະເມືອງອາເມຣິກາ ທີ່ອາໄສຢູ່ໃນເວເນຊູເອລາ.
ການເຄື່ອນໄຫວດັ່ງກ່າວຂອງສະຫະລັດ ອາເມຣິກາເກີດຂຶ້ນພາຍຫຼັງທີ່ທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ປະກາດເມື່ອວັນພຸດທີ່ຜ່ານມາ ຕັດຂາດສາຍພົວພັນທາງການທູດໃນທຸກລະດັບກັບສະຫະລັດ ອາເມຣິກາ ແລະ ເນລະເທດເຈົ້າໜ້າທີ່ການທູດຂອງສະຫະລັດ ອາເມຣິກາທັງໝົດໃຫ້ອອກນອກປະເທດພາຍໃນ 72 ຊົ່ວໂມງ ເຊິ່ງລັດຖະບານສະຫະລັດ ອາເມຣິກາປະຕິເສດທີ່ຈະປະຕິບັດຕາມຄຳສັ່ງ ໂດຍໃຫ້ເຫດຜົນວ່າທ່ານ ນິໂຄລັສ ມາດູໂຣ ບໍ່ແມ່ນຜູ້ທີ່ມີຄວາມຊອບທຳຕາມກົດໝາຍຂອງເວເນຊູເອລາອີກຕໍ່ໄປ ແລະ ສະຫະລັດ ອາເມຣິກາຍອມຮັບເອົາທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ປະທານສະພາແຫ່ງຊາດໃນຖານະ “ຮັກສາການປະທານປະເທດ”.
ເຊິ່ງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ຫຼີກລ້ຽງທີ່ຈະກ່າວວ່າການຕັດສິນໃຈອົບພະຍົບເຈົ້າໜ້າທີ່ການທູດບາງສ່ວນຄືການຍອມຮັບ ຕໍ່ຄຳສັ່ງຂອງທ່ານ ນິໂຄລັສ ມາດູໂຣ ແຕ່ກ່າວວ່າລັດຖະບານເວເນຊູເອລາຕ້ອງຮັບຜິດຊອບຫາກເກີດອັນຕະລາຍຂຶ້ນກັບນັກການທູດ ແລະ ພົນລະເມືອງຂອງສະຫະລັດ ອາເມຣິກາທີ່ອາໄສຢູ່ໃນເວເນຊູເອລາ ທ່າມກາງການປະທ້ວງຄັ້ງໃໝ່ຕັ້ງແຕ່ວັນພຸດ ທີ່ມີຜູ້ເສຍຊີວິດແລ້ວຫຼາຍກວ່າ 20 ຄົນ.
ໃນມື້ດຽວກັນທ່ານ ນິໂຄລັສ ມາດູໂຣ ຖະແຫຼງຜ່ານສະຖານີໂທລະພາບແຫ່ງຊາດວ່າ ຫາກສະຫລັດ ອາເມຣິກາມີຄວາມເຂົ້າໃຈດີພໍ ກໍ່ຄວນອົບພະຍົບນັກການທູດຂອງຕົນເອງອອກຈາກເວເນຊູເອລາ ທີ່ບໍ່ໄດ້ຕົກເປັນອານານິຄົມຂອງອາເມຣິກາ, ຂະນະດຽວກັນ ທ່ານ ນິໂຄລັສ ມາດູໂຣ ໄດ້ສັ່ງປິດສະຖານເອກອັກຄະລັດຖະທິດເວເນຊູເອລາ ປະຈຳນະຄອນຫຼວງວໍຊິງຕັນ ແລະ ຖອນເຈົ້າໜ້າທີ່ການທູດທັງໝົດກັບປະເທດ, ໃນດ້ານຂອງທ່ານ ພົນເອກ ວະລາດິເມຍ ປາດຼິໂນ ໂລເປສ ລັດຖະມົນຕີກະຊວງປ້ອງກັນປະເທດເວເນຊູເອລາ ຢືນຢັນວ່າ ກອງທັບບໍ່ມີທາງຍອມຮັບ “ລັດຖະບານຄູ່ຂະໜານ” ທີ່ຖືເປັນການພະຍາຍາມກໍ່ການປະຕິວັດລັດຖະປະຫານ ແລະ ຂໍໃຫ້ທ່ານ ຮວນ ກວຍໂດ ມາເຈລະຈາ.
ເຖິງແມ່ນວ່າ ສະຫະລັດ ອາເມຣິກາ, ການາດາ ແລະ ລັດຖະບານຝ່າຍຂວາຂອງຫຼາຍປະເທດໃນອາເມຣິກາລາຕິນ ທີ່ລວມເບິ່ງບຣາຊິນ, ໂກໂລມບີ ແລະ ອູຣູກວາຍ ປະກາດຊັດເຈນຮັບຮອງເອົາທ່ານ ຮວນ ກວຍໂດ ໃນຖານະຜູ້ນຳຮັກສາການຂອງເວເນຊູເອລາ ແຕ່ປະເທດໂບລີວີ, ກູບາ ແລະ ແມັກຊິກ ຢືນຢັນການຍອມຮັບທ່ານ ນິໂຄລັສ ມາດູໂຣ, ຂະນະທີ່ອີກຫຼາຍປະເທດເຊັ່ນ: ປານາມາ ບໍ່ສະແດງທ່າທີ, ໃນອີກດ້ານໜຶ່ງລັດເຊຍ, ຈີນ, ອີຣານ ແລະ ຕວັກກີ ຢືນຢັນການຍອມຮັບທ່ານ ນິໂຄລັສ ມາດູໂຣ ໂດຍສະເພາະລັດເຊຍ ແລະ ຈີນທີ່ເຕືອນວ່າ ສິ່ງທີ່ສະຫະລັດ ອາເມຣິກາກຳລັງກະທຳກັບເວເນຊູເອລານັ້ນ ແມ່ນແບບດຽວກັນກັບທີ່ເຄີຍປະຕິບັດຕໍ່ຫຼາຍປະເທດໃນອາເມຣິກາລາຕິນຫຼືບໍ່, ຕໍ່ມາທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດປະຈຳທຳນຽບຂາວ ກ່າວວ່າສະຫະລັດ ອາເມຣິກາກຳລັງຫາຊ່ອງທາງຕັດທໍ່ນ້ຳລ້ຽງ ທັງໝົດຂອງລັດຖະບານເວເນຊູເອລາ ອາດຈະສື່ເຖິງເງິນຊ່ວຍເຫຼືອຈາກຈີນ ແລະ ລັດເຊຍ.
