ເກີດເຫດເຂື່ອນແຕກ ທີ່ບຣາຊິນ, ຄາດມີຜູ້ເສຍຊີວິດ ແລະ ບາດເຈັບຈຳນວນຫຼາຍ (ວິດີໂອ)

(Photo by Douglas Magno / AFP)

ສຳນັກຂ່າວຕ່າງປະເທດລາຍງານເມື່ອວັນທີ 25 ມັງກອນ 2019 ທີ່ຜ່ານມາວ່າ: ເກີດເຫດເຂື່ອນແຕກ ເຮັດໃຫ້ມວນຕົມມະຫາສານໄຫຼເຂົ້າຖ້ວມພື້ນທີ່ທັງໃນ ແລະ ຮອບນອກເມືອງບຼູມາດິນໂຮ ເມືອງທີ່ມີປະຊາຊາກອນ 39,000 ຄົນ ທາງພາກຕາເວັນອອກສຽງໃຕ້ ຂອງປະເທດບຣາຊິນ, ຂະນະນີ້ຍັງບໍ່ຮູ້ຕົວເລກຜູ້ເສຍຊີວິດ ແລະ ບາດເຈັບ ແຕ່ກຳລັງກວດສອບ ເຊິ່ງຄາດວ່າອາດມີຜູ້ເສຍຊີວິດຈຳນວນຫຼາຍ.

Brazilian President Jair Bolsonaro gives a statement in Brasilia on January 25, 2019 after the collapse of a dam near Brumadinho in southeastern Brazil. (Photo by Sergio LIMA / AFP)

ທ່ານ ໂອຕາວິໂອ ຊັນຕານາ ໂດ ເຣໂກ ບາຣອສ ໂຄສົກລັດຖະບານບຣາຊິນຖະແຫຼງວ່າ ທ່ານ ຈາອີ ໂບນໂຊນາໂຣ ປະທານປະເທດບຣາຊິນຈະເດີນລົງຕິດຕາມສະຖະການດັ່ງກ່າວໃນວັນທີ 26 ມັງກອນນີ້, ແຕ່ທ່ານ ຣິຄາໂດ ຊັນເລສ ລັດຖະມົນຕີກະຊວງສິ່ງແວດລ້ອມແມ່ນຢູ່ໃນລະຫວ່າງການເດີນທາງ, ໂດຍປະທານປະເທດບຣາຊິນ ໄດ້ກ່າວສະແດງຄວາມເສຍໃຈກັບການເສຍຊີວິດຂອງປະຊາຊົນ ທີ່ເກີດຂຶ້ນກັບໄພພິບັດຄັ້ງນີ້ ແລະ ຈະຕິດຕາມສະຖານະການຢ່າງໃກ້ຊິດ.

ພາບ ແລະ ວິດີໂອຈາກມຸມສູງສະແດງໃຫ້ເຫັນກອງຕົມໄດ້ໄຫຼແຜ່ໄປເປັນວົງກວ້າງທັບຖົມພື້ນທີ່ທາງກະສິກຳ, ບ້ານເຮືອນປະຊາຊົນໄດ້ຮັບຄວາມເສຍຫາຍເປັນຈຳນວນຫຼາຍຕົມຖ້ວມເຫັນແຕ່ຫຼັງຄາ, ສຳລັບເຂື່ອນທີ່ແຕກນັ້ນເປັນຂອງບໍລິສັດບໍ່ແຮ່ລາຍໃຫຍ່ບຣາຊິນ ວັນ ທີ່ຖະແຫຼງຢືນຢັນວ່າເຂື່ອນແຕກແທ້ ແຕ່ໜ້າທີ່ສຳຄັນທີ່ສຸດໃນຕອນນີ້ຄືຫາທາງປົກປ້ອງຊີວິດຂອງພະນັກງານ ແລະ ປະຊາຊົນທີ່ອາໄສຢູ່ໃນບໍລິເວນດັ່ງກ່າວ ແຕ່ບໍ່ໄດ້ລະບຸສາເຫດການແຕກເທື່ອ.

(Photo by Douglas Magno / AFP)
(Photo by Douglas Magno / AFP)
(Photo by Douglas Magno / AFP)