ການເມືອງເວເນຊູເອລາເຂົ້າສູ່ພາວະວຸ້ນວາຍ ພາຍນອກແຊກແຊງ ແບ່ງຂົ້ວອຳນາດຊ້າຍ-ຂວາຢ່າງຊັດເຈນ

ສຳນັກຂ່າວຕ່າງປະເທດລາຍງານເມື່ອວັນທີ 26 ມັງກອນ 2019 ທີ່ຜ່ານມາວ່າ: ທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ປະທານສະພາແຫ່ງຊາດ ທີ່ສະຖາປະນາຕົນເອງຂຶ້ນເປັນ “ຜູ້ນຳຮັກສາການ” ຂອງເວເນຊູເອລາ ກ່າວເມື່ອວັນສຸກ ທີ່ຜ່ານມາ ປະຕິເສດການເຈລະຈາກັບທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ໂດຍໃຫ້ເຫດຜົນວ່າອີກຝ່າຍບໍ່ມີຄວາມຈິງໃຈ ພ້ອມທັງປຸກລະດົມໃຫ້ປະຊາຊົນອອກມາປະທ້ວງຂັບໄລ່ທ່ານ ນິໂຄລັສ ມາດູໂຣ ອີກຄັ້ງໃໝ່, ແຕ່ກ່ອນໜ້ານັ້ນພຽງວັນດຽວ ທ່ານ ຮວນ ກວຍໂດໄດ້ເຜີຍແຜ່ວິດີໂອຄຳຖະແຫຼງຂອງຕົນເອງຈາກສະຖານທີ່ແຫ່ງໜຶ່ງທີ່ບໍ່ເປີດເຜີຍ ຍື່ນຂໍ້ສະເໜີອະໄພຍະໂທດໃຫ້ແກ່ທ່ານ ນິໂຄລັສ ມາດູໂຣ ຫາກຍອມລົງຈາກຕຳແໜ່ງໂດຍດີ.

(Photo by Luis ROBAYO / AFP)

ຂະນະດຽວກັນ, ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ອອກມາຕຳໜິລັດຖະບານສະຫະລັດ ອາເມຣິກາ ພາຍໃຕ້ການນຳຂອງທ່ານ ໂດໂນ ທຣຳ ທີ່ໃຫ້ການສະໜັບສະໜູນການກໍ່ລັດຖະປະຫານ ໃນເວເນຊູເອລາ, ຂະນະທີ່ສື່ຫຼາຍແຫ່ງຂອງລັດເຊຍລາຍງານວ່າ ລັດຖະບານລັດເຊຍໄດ້ສົ່ງເຈົ້າໜ້າທີ່ພິເສດ ຈຳນວນໜຶ່ງໄປຍັງເວເນຊູເອລາຢ່າງຕໍ່ເນື່ອງ ນັບຕັ້ງແຕ່ທ່ານ ຮວນ ກວຍໂດ ປະກາດຕົນເອງເປັນຜູ້ນຳຄູ່ຂະໜານກັບທ່ານ ນິໂຄລັສ ມາດູໂຣ.

Venezuelan President Nicolas Maduro (Photo by Yuri CORTEZ / AFP)

ໃນອີກດ້ານໜຶ່ງ, ສະພາຄວາມໝັ້ນຄົງແຫ່ງສະຫະປະຊາຊາດ ໄດ້ກຽມປະຊຸມສຸກເສີນເລື່ອງວິກິດທາງການເມືອງໃນເວເນຊູເອລາ ໃນວັນເສົາ 26 ມັງກອນ ນີ້, ເຊິ່ງທ່ານ ຮໍເກ ອາຣີເອຊາ ລັດຖະມົນຕີກະຊວງການຕ່າງປະເທດເວເນຊູເອລາຈະເຂົ້າຮ່ວມການປະຊຸມ ເຊິ່ງຫຼາຍຝ່າຍຄາດການວ່າບັນຍາກາດຈະເປັນໄປຢ່າງດຸເດືອດ ເມື່ອທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາຈະເຂົ້າຮ່ວມປະຊຸມເອງເຊັ່ນກັນ ແລະ ກ່າວລ່ວງໜ້າອີກວ່າຈະໃຊ້ໂອກາດນີ້ຮຽກຮ້ອງສະມາຊິກສະພາຄວາມໝັ້ນຄົງແຫ່ງສະຫະປະຊາຊາດໃຫ້ຮັບຮອງເອົາທ່ານ ຮວນ ກວຍໂດ ເປັນຜູ້ນຳເວເນຊູເອລາ ແຕ່ 2 ໃນ 5 ຂອງສະມາຊິກຖາວອນຄື ລັດເຊຍ ແລະ ຈີນ ທີ່ຄັດຄ້ານຊຸດຕົວ ແລະ ໃຫ້ການສະໜັບສະໜູນທ່ານ ນິໂຄລັສ ມາດູໂຣ ຢ່າງຊັດເຈນ.

ຕໍ່ມາກະຊວງການເງິນຂອງສະຫະລັດ ອາເມຣິກາ ໄດ້ສົ່ງສັນຍານຈະເພີ່ມແຮງກົດດັນທາງເສດຖະກິດຕໍ່ລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັດ ມາດູໂຣ ແຕ່ຍັງບໍ່ສະແດງທ່າທີເລື່ອງການຢຶດຊັບສິນຂອງອີກຝ່າຍທີ່ມີຢູ່ໃນສະຫະລັດ ອາເມຣິກາຫຼືບໍ່, ໃນສ່ວນທ່າທີຂອງປະເທດອື່ນນັ້ນ ແອັດສະປາຍໄດ້ຮຽກຮ້ອງໃຫ້ມີການເລືອກຕັ້ງໃໝ່ໂດຍໄວທີ່ສຸດ, ດ້ານແມັກຊິກສະເໜີໜ້າທີ່ຜູ້ແທນເຈລະຈາລະຫວ່າງທ່ານ ນິໂຄລັສ ມາດູໂຣ ກັບທ່ານ ຮວນ ກວຍໂດ.

ຂ່າວທີ່ກ່ຽວຂ້ອງ:

– ສ.ອາເມຣິກາ-ເວເນຊູເອລາ ສາຍພົວພັນການທູດແຕກຫັກ ຈາກການແຊກແຊງການເມືອງພາຍໃນ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube